SAMDI 4

Koulè Vèt

PREMYE LEKTI

"Bondye lapè a, ki delivre gran gad­yen an sot nan lanmò a, l’ap aprann nou fè tou sa ki bon".

NAN LÈT POU EBRE YO

13, 15-17. 20-21

Frè m’ yo:

Pa lentèmedyè Jezi se pou nou ofri sakrifis lwanj tout tan pou Bondye, sa vle di fwi bouch nou k’ap fè lwanj pou non l’. Pa bliye fè dibyen, viv ak lapè antre nou; se kalite sakrifis sa yo ki fè Bondye plezi.

Obeyi responsab nou yo, ret anba lòd yo, se yo menm k’ap veye antan yo gen pou yo rann kont pou nanm nou, pou yo kapab fè sa avèk kè kontan san yo pa plenn; sa pa ta nan avantaj nou.

Bondye lapè a, li menm ki te kon­dui gran gadyen mouton yo sot nan lanmò a avèk san alyans tout tan an, Granmèt nou Jezikri, se pou l’ mete tout sa k’ bon nan nou, pou nou fè volonte l’, pou nou fè sa k’ fè l’ plezi pa pouvwa Jezikri, konpliman pou li pou tout tan gen tan. Amèn.

Pawòl Granmèt la.

SÒM REPONS: 22, l-3a. 3b-4. 5. 6

R/ Granmèt la swen m’, mwen p’ap manke anyen.

Granmèt la ap kondui m’, anyen p’ap manke m’;nan zèb vèt li enstale m’, sou bò dlo trankil li mennen m’, li refè nanm mwen.R.

Li kondui m’ nan santye jistis pou­tèt non l’.Sèke menm si m’ap mache nan bafon lonbraj lanmò, mwen p’ap pè malè, paske ou avèk mwen ; ba­ton ou ak bagèt ou se yo k’ap konsole m’.R.

Ou pare yon tab devan fas mwen kont sa yo k’ap fè m’ pase tray yo; ou swen tèt mwen ak losyon, kalis mwen ap debòde. R.

Reyèlman se bon kè ak gras k’ap rapousuiv mwen tout tan lavi m’, m’ap abite nan kay Granmèt la pou tout longè tan yo.R.

LEVANJIL

"Yo te tankou mouton ki pa gen gadyen".

MEN BÒN NOUVÈL JEZIKRI A DAPRÈ MAK KI SEN 6, 30-34

Lè sa a:

Apot yo rasanble kot Jezi, yo rakonte l’ tout sa yo te fè, ak sa yo te anseye. Li di yo: "Vini apa, yon kote ki pa gen pèsonn, pran yon ti repo". Sèke moun yo ki t’ap vini, ki t’a pra­le, yo te anpil, pa t’ gen espas pou yo te manje.

Yo monte nan batiman an, y’al nan yon kote ki dezè, ki apa. Lè yo wè y’a prale, anpil moun konprann; yo sòti a pye nan tout vil yo yo vin rankontre yo la, yo rive anvan yo.

Lè Jezi sòti, li wè anpil foul, li pran pitye pou yo, paske yo te tankou mouton ki pa gen gadyen, li kòmanse ba yo ansèyman anpil.

An nou fè lwanj ak konpliman pou pawòl Bondye a.

REFLEKSYON

Jodi a, nan Levanjil la, nou wè jan apot yo te kontan lè yo te wè jan gras Bondye te reyalize selon sa yo te fè ak sa yo te anseye. Epi tou jan Gran­mèt la te envite yo vin pran yon ti repo; epoutan lè Jezi wè foul moun sa ki t’ap suiv li a, li deside pale yo sou Wayòm syèl la, paske yo te tankou yon ekip mouton san gadyen.

Jezi bliye tout bezwen pèsonèl li pou li kapab pran zwen nou, li se Bon Gadyen ki te bay lavi l’ e ki toujou prè pou l’ bay tout sa l’ ye pou l’ sove nou. Nou dwe obeyi Li. Se Li k’ap kondwi nou nan chemen lavi ak lave­rite a. Li ta bon pou poze tèt ou kes­yon pou w’ ekzamine ki kalite mou­ton ou ye, si reyèlman ou toujou prè pou koute vwa Bondye oubyen ou se yon mouton rebèl ki pa vle mache sou zòd Granmèt la.

Tout sèvitè Bondye dwe fè lwanj pou li, paske se li menm ki ban nou tout sa nou genyen ak sa nou ye. Se poutèt sa pawòl la fè sonje jodi a sa­krifis pou nou fè pou Granmèt la, se fè lwanj pou li nan tout moman nan lavi nou; rakonte ak bouch nou ke Jezikri se li menm menm, ayè, jodi a e pou toutan. Rekonesans lanmou ak respè nou genyen pou Bondye anga­je pou n’ aprann renmen frè ak sè n’ yo, fè yo dibyen, se konsa n’a toujou viv nan lapè jan Jezi gran frè nou an mande n’ nan; paske li te ofri tèt li pou nou pou n’ ka viv nan lapè ak kè kontan.

LAPRIYÈ: Bondye Papa, ban mwen yon kè senp ak yon lespri dosil pou n’ ka koute vwa ou, ede m’obeyi lòd ou yo; konsa m’a viv jan ou vle, tankou yon mouton nan men bon gadyen l’. Amèn

PWOPOZISYON: Pran yon mo­man nan jounen jodi a pou w’ di Bon­dye mèsi, poutèt li se Bon Gadyen ki toujou la pou l’ kondwi lavi ou.