VANDREDI 3

Koulè Vèt

PREMYE LEKTI

"Jezikri yè ak jodi a, li menm nan tout pou tout tan".

NAN LÈT EBRE 13, 1-8

Frè m’ yo:

Se pou charite frè yo rete nan nou; pa bliye resevwa etranje lakay nou: se konsa kèk te resevwa zanj yo lakay yo san yo pa konnen. Sonje moun ki nan prizon yo kòmsi nou prizonye ansanm avèk yo, sonje moun k’ap sibi tray yo paske nou menm tou se nan yon kò nou ye.

Se pou n’ respekte maryaj la nou tout, se pou kabann nan ret entak; sèke Bondye ap jije moun k’ap fè move plezi yo ak sa k’ap fè adiltè yo.

Se pou konduit nou pa nan kesyon renmen lajan, kontante nou ak sa nou genyen koulye a; se li menm menm ki di: "Mwen p’ap lage ou, mwen p’ap abandone ou". A tèl pwen nou kapab di avèk konfyans : "Granmèt la pote m’ sekou, mwen p’ap pè sa pou moun fè m’".

Sonje responsab nou yo, ki te pale nou pawòl Bondye a; konsidere dèn­ye moman lavi yo, pran modèl sou lafwa yo.

Jezikri yè ak jodi a; li menm nan tout pou tout tan.

Pawòl Granmèt la.

SÒM REPONS: 26, 1. 3. 5. 8b-9abc

R/ Granmèt la se limyè m’ak sove mwen.

Granmèt la se limyè m’ak sove mwen, ki moun pou m’ pè?

Granmèt la se pwoteksyon lavi m’, devan ki moun pou m’ tranble?

Si yon lame kanpe kont mwen, kè m’ p’ap pè; si lagè leve kont mwen,

Se nan sa mwen menm m’ap espere.R.

Sèke l’ap kache m’ nan tant li, jou malè yo l’ap kache m’ nan kachèt tant li,

nan wòch la l’ap leve m’. R.

Se fas ou, Granmèt, m’ap chèche. Pa vire fas ou lwen m’, pa vire do bay sèvitè ou la nan kòlè.

Se sekou m’ ou ye, pa lage m’.R.

LEVANJIL

"Jan, sa mwen te fè koupe tèt li a, se li menm ki leve sot nan pami mò yo".

MEN BÒN NOUVÈL JEZIKRI A DAPRÈ MAK KI SEN 6, 14 -29

Lè sa a:

Wa Ewòd te tande pale (sèke non Jezi te vin gen repitasyon), li t’ap di: "Se Jan Batis ki resisite sot nan pami mò yo, se pousa mèvèy sa yo ap fèt nan li a". Dòt menm t’ap di: "Se Eli ki la"; dòt menm t’ap di: "Se pwofèt la, tankou youn nan pwofèt yo. Lè Ewòd tande sa, li di; "Se Jan mwen te fè koupe tèt li a ki resisite sot nan pami mò yo".

Sèke Ewòd te voye arete Jan, li te mete l’ nan prizon akoz Ewod­yad, madanm Filip, frè l’ la paske li te marye avèk li. Jan t’ap di Ewòd: "Ou pa gen dwa gen madanm frè w’ la". Ewodyad menm t’ap fè konplo kont li, li te vle touye l’, li pa t’kapab. Ewòd te pè Jan, li te konnen se te yon moun ki kòrèk, ki sen, li te pwoteje l’, li te konn koute l’, pou l’ fè anpil bagay, se avèk plezi li te konn koute l’.

Lè jou a rive ki bay bon okazyon an, Ewòd te fè yon resepsyon pou fèt li avèk chèf yo ak majistra yo avèk moun gran ras nan Galile a. Pitit fi Ewodyad la vin antre, li danse, sa fè Ewòd plezi ansanm ak lòt envite yo, wa a di ti fi a. "Mande m’ sa ou vle, m’ap ba ou l’. Li fè l’ sèman: "Nenpòt ki sa ou mande, m’ap ba ou l’, te mèt se mwatye peyi wa mwen an". Li menm, li sòti li di manman l’: "Ki sa pou m’ mande"? Li di: "Tèt Jan Ba­tis".

Li antre byen vit ankò kot wa a, li mande l’, li di: "Mwen vle pou koulye a menm ou ban m’ tèt Jan Batis sou yon plat". Wa a pran chagren: poutèt sèman an epi poutèt envite yo, li pa t’ vle kontrarye l’, li voye yon gad, li pase lòd pou yo pote tèt li sou yon plat. Yo koupe tèt li nan prizon an, yo pote l’ sou yon plat, yo bay ti fi a li, ti fi a menm bay manman l’ li. Lè disip yo tande sa, yo vini, yo pote kò l’, yo mete l’ nan kavo.

An nou fè lwanj ak konpliman pou pawòl Bondye a.

REFLEKSYON

Chak fwa n’ fè byen pou youn nan frè nou yo, se pou Bondye menm nou fè l’.Mesaj Jezi a ankouraje nou ren­men nèt ale, renmen tout moun san distenksyon, san mezire, paske devan Granmèt la tout moun se moun. Jezi menm di nou tout sa n’ fè pou youn nan pi piti yo, se pou li nou fè l’; zanmi mwen, si kè ou kontan, pataje lajwa ou ak moun ki nan lapenn; pa tann vant ou fin plen avan ou pata­je ak sila a ki grangou; pandan w’ap chèche libète, fòk ou sonje sila yo ki nan prizon; si w’ gen kay pou w’ dòmi, ou gen yon kabann pou w’ kou­che, ou pa ka rete endiferan devan si­tiyasyon sila yo k’ap dòmi anba galri, anba pon nan lari oubyen sou laplas piblik sou moso katon. Genyen anpil nan frè ak sè nou yo ki mouri, paske yo pa kapab achte medikaman. Èske nou konn pran tan pou n’ reflechi, pou n’ sonje, tout sa nou genyen, se Bon­dye ki ba nou yo? Se pou nou aprann pataje; yon jou l’ap di nou: “lè w’ te fè byen pou youn nan frè w’ oubyen sè w’ yo, se pou mwen w’ te fè l’; vini fete avèk mwen” (Mt 25,40).

Men pou n’ rive fè byen fòk nou gen anpil renmen nan kè nou, fòk nou fè sakrifis, imite Jezi nan tout bagay pandan n’ap sèvi l’ temwen. Gade ki­jan Jan Batis mouri pou verite, tout moun ki pa dwat devan Bondye pa kapab tande pawòl verite a. Ewòd fè mete Jan Batis nan prizon pou verite, aprè sa, li voye touye l’ nan prizon pou satisfè yon moun: paske Jan te di l’ li pa gen dwa pran madanm frè l’, Ewodyad te kenbe l’ nan kè pou sa, Ewòd t’ap chèche yon okazyon pou l’ vanje l’; vwala jou fèt Ewòd la, Ewo­dyad pwofite, paske pitit fi li danse pou Ewòd yon dans ki te fè l’ anpil plezi, li di ti fi a mande m’ sa w’ vle, ti fi a menm kouri al mande manman l’; manman l’ menm di, ba l’ tèt Jan Batis sou yon plato, malgre Ewòd te renmen pawòl Jan Batis yo e li te gen anpil moun dèyè l’; men akoz sèman Wa Ewòd te fè a, li pa t’ kapab refize l’ demand sa a.

Jodi a nan tan n’ap viv la, ann mande Bondye padon pou chak fwa nou tounen yon Ewòd ak yon Ewodyad pou frè ak sè nou yo.

LAPRIYÈ: Bondye Papa, tanpri aprann nou kontante n’ak sa nou genyen, pou mechanste pa anva­yi kè nou; tanpri, fè n’ kado Les­pri w’ la, pou nou ka pratike sa ki byen, sa ki fè ou plezi. Pa pouvwa Jezikri.

PWOPOZISYON: M’ap kontante m’ak sa Bondye ban mwen, san m’ pa chèche retire sa lòt genyen.