MÈKREDI 1

Koulè Vyolèt

KÒMANSMAN TAN KARÈM ANE-A

MÈKREDI LÈSANN

PREMYE LEKTI

"Chire kè nou, pa chire rad nou".

NAN LIV PWOFÈT JOWÈL 2, 12-18

Koulye a, deklarasyon Granmèt la, tounen vin jwenn mwen ak tout kè nou, nan jèn, ak dlo nan je, nan rèl ; chire kè nou, pa chire rad nou, tounen vin jwenn Bondye nou an, paske li bon, li gen mizerikòd, li gen pasyans, ak anpil mizerikòd, li siperyè anlè mechanste. Ki moun ki konnen, si l’ ta tounen, pou l’ padonnen, pou l’ kite yon benediksyon aprè l’, sakrifis ak ofrann likè pou Granmèt la, Bondye nou an ?

Sonnen twonpèt nan Siyon, deklare yon jèn sakre, rele foul, rasanble pèp, konsakre kominote, rasanble vye granmoun yo, rasanble timoun yo ak sa k’nan tete; se pou mesye ki marye a kite kabann li, se pou madanm ki marye a kite chanm li.

Ant kote yo mete rad yo ak lotèl la, se pou prèt yo kriye, yo menm sèvitè Granmèt la, se pou yo di : "Pitye, Granmèt, pitye pou pèp ou a, pa renmèt eritaj ou a nan mank dega, pou nasyon yo pa kòmande sou yo. Pouki pou yo ta di nan pèp yo: Kote Bondye yo a"?

Granmèt la vin jalou pou peyi l’ la, li menaje pèp li a.

Pawòl Granmèt la.

SÒM 50, 3-4. 5-6a. 12-13. 14 e 17

R/ Pitye, Granmèt, paske nou fè peche.

Pitye pou mwen, Bondye, daprè mizerikòd ou a; daprè kantite mizerikòd ou, efase fot mwen an. Lave m’ byen lave sot nan fot mwen an, pwòpte m’sot nan peche m’ nan.R.

Sèke fot mwen an mwen konnen l’, peche m’ nan kont mwen tout tan.Se kont ou, kont ou sèl mwen fè peche, sa k’ mal devan w’ nan mwen fè l’.R.

Kreye yon kè pwòp nan mwen, Bondye, refè yon lespri fèm nan zantray mwen yo.Pa jete m’ lwen fas ou, Lespri Sen w’ nan, pa wete l’ sot nan mwen.R.

Renmèt mwen kè kontan sove ou sove a, asire m’ak lespri ki pi vif la.Granmèt, louvri po bouch mwen, bouch mwen anonse lwanj ou.R.

DEZYÈM LEKTI

"Rekonsilye ak Bondye : men tan gras la koulye a".

NAN DEZYÈM LÈT APOT PÒL KI SEN, POU KORENTYEN 5, 20- 6, 2

Frè m’yo :

Pou Jezikri, n’ap fè sèvis komisyonè, tankou se Bondye k’ap ankouraje pa lentèmedyè nou. Nou ensiste pou Jezikri : rekonsilye ak Bondye ; li menm ki pa t’ konnen peche, Bondye fè l’ vin tounen pechè pou nou, pou jistis Bondye te kapab reyalize nan li.

Kòm n’ap plede, nou ankouraje nou, pou nou pa resevwa gras Bondye a pou granmesi. Sèke li di : "Nan tan gras la mwen reponn ou, jou sove a, mwen pote ou sekou". Men li koulye a, tan gras la, men li koulye a, jou sove a.

Pawòl Granmèt la.

LEVANJIL

"Papa ou, ki wè nan kote ki kache, l’ap renmèt ou sa".

MEN BÒN NOUVÈL JEZIKRI A DAPRÈ MATYE KI SEN 6, 1-6. 16-18

Lè sa a: Jezi di disip li yo:

Fè atansyon, pou nou pa fè aksyon kòrèk nou devan moun yo, pou yo wè nou; otreman nou pa ta gen rekonpans devan Papa nou ki nan syèl la.

Lè w’ap fè charite, pa sonnen twonpèt devan ou, tankou ipokrit yo ap fè nan sinagòg yo ak sou plas yo, pou moun yo kapab fè lwanj yo. Amèn mwen di nou, yo resevwa rekonpans yo. Ou menm lè w’ap fè charite, pa kite men goch ou konnen sa men dwat ou ap fè, pou charite w’la kapab ret kache; konsa Papa w’ki wè nan kote ki kache a, l’ap renmèt ou sa.

Lè n’ap priye, pa fè tankou ipokrit yo, ki renmen ret kanpe nan sinagòg yo ak nan kalfou plas yo, pou yo priye, pou moun yo kapab wè yo. Amèn mwen di nou, yo resevwa rekonpans yo. Ou menm, lè w’ap priye, antre nan chanm ou, fèmen pòt la, priye Papa ou nan kote ki kache a. Papa ou, ki wè nan kote ki kache a, l’a renmèt ou sa.

Lè n’ap fè jèn, pa ret chagren tankou ipokrit yo, yo fè figi yo dekonpoze, pou moun yo kapab wè y’ap fè jèn. Amèn mwen di nou, yo resevwa rekonpans yo. Ou menm, lè w’ap fè jèn, met losyon sou tèt ou, lave figi ou, pou moun yo pa wè w’ap fè jèn, men pou se Papa ou ki wè, li menm ki nan kote ki kache a; Papa ou, ki wè nan kote ki kache a, l’a renmèt ou sa".

An nou fè lwanj ak konpliman pou pawòl Bondye a.

REFLEKSYON:Jodi a, nou kòmanse kòmanse wout k’ap mennen nou nan Pak la, e Levanjil la fè nou sonje obligasyon fondamantal ke nou genyen kòm kretyen, pa sèlman pou nou prepare yon tan litijik, men tou pou nou prepare nou pou lavi k’ap dire pou toutan an: «Fè atansyon, pou nou pa fè aksyon kòrèk nou devan moun yo, pou yo wè nou; otreman nou pa ta gen rekonpans devan Papa nou ki nan syèl la» (Mt 6,1). Jezi vle montre nou kijan li enpòtan pou nou viv selon prensip Levanjil la, san li pa bliye «si nou pa viv pi byen pase farizyen yo ak direktè lalwa yo, nou p'ap kapab antre nan Peyi Wa ki nan syèl la» (Mt 5,20).

Jistis la mennen nou nan lanmou, ki manifeste nan charite ak nan zèv mizerikòd yo: «Ou menm lè w’ap fè charite, pa kite men goch ou konnen sa men dwat ou ap fè » (Mt 6,3). Jezi envite nou fè sa ki byen san nou pa chèche konpliman, paske rekonpans nou se nan men Bondye, se lavi pou toutan.

Pap Benwa XVI te souliye: ede yon moun ki nan bezwen, se yon obligasyon jistis la menm, anvan menm li se yon zèv lacharite: «charite a ale pi lwen ke jistis la (…) men li pa janm ekziste san jistis la ki pouse nou bay lòt la sa ki pou nou, sa vle di sa li merite pa rapò ak sa li ye a ak fason li aji a». Nou pa dwe bliye sa: nou pa mèt byen ki nan men nou yo, sèlman yo nan men nou pou nou byen jere yo. Kris la aprann nou vrè charite a se pa lè nou fè yon moun kado yon bagay, men se lè nou bay pwòp tèt pa nou, antan nou ofri nou bay Bondye tankou yon sakrifis ki sen (Wom. 12,1). Se nan fason sa nou ta kapab reyalize jistis ak charite Kris la, e «konsa Papa w’ki wè nan kote ki kache a, l’ap renmèt ou sa» (Mt 6,4).

Pandan n’ap batay kont tout move tandans nou yo, limyè Fèt Pak la deja ap klere nou. Lavi ki sòti nan kavo lanmò Kris la deja anvayi nou nan jefò n’ap fè pou nou pwoche pi pre Bondye, pi pre frè ak sè nou yo. Sakrifis ak soufrans n’ap andire yo, se pa yon gwo chay pou nou paske sa n’ap chèche nan yo a deja prezan nan lavi nou. Pandan nou pran wout pou n’al chèche delivrans la, delivrans la deja ap dòmi nan fon kè nou. Nou swete tout moun pase yon bon tan karèm ak Jezi!

LAPRIYÈ: Bondye Papa, nan kòmansman Tan karèm sa a, kote Legliz la envite nou fè jèn ak penitans, tanpri n’ap mande w’ ba nou Lespri w’ la pou nou kapab pote lavikwa sou tout fòs ki vle koupe relasyon nou genyen avèk ou depi jou batèm nou. Ede nou fè yon jèn ki fè w’ plezi pou nou kapab mouri e leve byen vivan ansanm ak Kris la.

PWOPOZISYON: Pwofite tan Karèm sa a pou w’ lapriyè pi plis, pataje sa yo genyen pi plis, fè plis sakrifis ak tèt ou (fè rezistans ak tantasyon).