MÈKREDI 5

Koulè Vyolèt

PREMYE LEKTI

«Li voye Mesaje l’ la, li delivre sèvitè l’ yo».

LEKTI LIV PWOFÈT DANYÈL                        3,14-20. 91.92.95

Jou sa yo:

Wa Nabikodonozò di: «Èske se vre, Sidrak, Mizak avèk Abdenago, nou pa sèvi dye m’ yo, nou pa adore pòtre mwen fè avèk lò a? Koulye a, si nou pare, nenpòt kilè n’ap tande sonnen twonpèt, flit, gita, mandolin, bandjo, akòdeyon avèk tout kalite mizik, se pou nou ajenou, pou nou adore pòtre a mwen te fè a. Si nou pa adore l’, menm lè a m’ap lage nou nan boukan dife a k’ap chofe byen fò a, epi kilès Bondye k’ap delivre nou sot nan men m’»?

Sidrak, Mizak avèk Abdenago reponn, yo di wa Nabikodonozò: «nou pa bezwen reponn ou sou kesyon sa a; men Bondye nou an, li menm n’ap sèvi a, li kapab delivre nou sot nan boukan dife cho a ak nan men ou, mon wa, l’ap delivre nou. Si l’ pa vle, ou mèt konn sa, mon wa, nou p’ap sèvi dye ou yo, epi pòtre ou fè ak lò a, nou p’ap adore l’.

Lè sa a, Nabikodonozò vin plen ak raj, aparans figi l’ vin chanje alega Sidrak, Mizak avèk Abdenago; li pase lòd pou yo chofe boukan an sèt fwa plis pase jan yo konn abitye chofe l’; li pase lòd pou mesye ki gen fòs nan lame l’ la, yo mare pye Sidrak, mizak avèk Abdenago, pou yo jete yo nan boukan dife k’ap boule a.

Aprè sa, wa Nabikodonozò vin sezi, li leve byen vit, li di minis li yo: «Èske nou pa t’ lage twa mesye yo nan mitan dife a avèk pye yo mare»? Yo reponn wa a, yo di: «Se vre, mon wa». Li pran lapawòl, li di: «men mwen wè kat misye ki lib, k’ap pwonmnen nan mitan dife a, yo pa gen okenn dega nan yo, aparans katriyèm nan sanble ak yon pitit Bondye».

Nabikodonozò leve li di: «Konpliman pou Bondye yo a, Bondye Sidrak, Mizak avèk Abdenago, li menm ki voye Mesaje l’ la, li delivre sèvitè l’ yo, ki te kwè nan li, yo dezobeyi pawòl wa a, yo renmèt kò yo, pou yo pa sèvi, pou yo pa adore dòt dye, sof Bondye yo a».

Pawòl Granmèt la.

SÒM REPONS Dan 3, 52. 53. 54. 55. 56

Konpliman pou ou, Granmèt, Bondye zansèt nou yo, konpliman pou non bèlte ou la ki sen an.

R/ Li merite lwanj, li anlè nèt pou tout tan.

Konpliman pou ou nan kay sakre bèlte ou la ki sen an.

R/ Ou merite lwanj anlè nèt ak bèlte anlè nèt pou tout tan.

Konpliman pou ou sou fotèy rèy ou a.

R/ Ou merite lwanj, anlè nèt, ou anlè nèt pou tout tan.

Konpliman pou ou, ou menm ki sonde bafon yo, ou menm ki chita anlè cheriben yo.

R/Ou merite lwanj, sou anlè nèt pou tout tan.

Konpliman pou ou nan platfòm syèl la,

R/ Ou merite lwanj, ak bèlte pou tout tan.

LEVANJIL

«Si Pitit la delivre nou, n’ap lib tout bon vre».

MEN BÒN NOUVÈL JEZIKRI A DAPRÈ JAN KI SEN 8, 31-42

Lè sa a:

Jezi t’ap di Juif yo ki te kwè nan li yo: «Si nou rete nan pawòl mwen an, n’ap disip mwen tout bon vre, n’ap konnen verite a, verite a ap delivre nou».

Yo reponn li: «Se ras Abraam nou ye, nou pa janm esklav pèsòn; kòman ou fè di: «N’a vin lib»?

Jezi reponn yo: «An verite, an verite mwen di nou, tout moun ki fè peche, li esklav peche a. Men, esklav la pa ret nan kay la tout tan; se pitit la ki rete tout tan. Konsa si nou menm, Pitit la delivre nou, n’ap lib tout bon vre. Mwen konnen se pitit Abraam nou ye; men n’ap chèche touye m’, paske pawòl mwen pa pran nan nou. Mwen menm se sa m’ wè kay Papa m’, se sa mwen pale, men nou menm se sa nou wè kay papa nou, se li menm n’ap fè».

Yo pran lapawòl: yo di l’: «papa nou se Abraam». Jezi di yo: «Si nou te pitit Abraam, nou ta fè travay Abraam. Koulye a menm, n’ap chèche touye m’, mwen menm yon moun k’ap pale nou laverite mwen fin tande kot Bondye a; bagay sa a, Abraam pa t’ fè l’. Nou menm n’ap fè travay papa nou».

Yo di l’: «nou menm se pa nan move relasyon nou fèt: se yon sèl papa nou genyen, se Bondye». Jezi di yo:«Si Bondye te papa nou, nou ta renmen m’ sètènman; mwen menm se nan Bondye mwen sòti pou m’ vini. Mwen pa vini ak pwòp fòs mwen, men se li menm, ki voye m’».

An nou fè lwanj ak konpliman pou pawòl Bondye a.

REFLEKSYON: Jezi envite juif yo gen lafwa: «Si nou kwè nan pawòl mwen an, n’ap disip mwen tout bon vre, n’ap konnen verite a, verite a ap delivre nou».

Men Juif yo ki pa t’ konprann vrè sans pawòl Jezi a, yo reponn Li : «Se ras Abraam nou ye, nou pa janm esklav pèsòn ; kòman ou fè di : «N’ap vin lib?» Se lè sa Jezi devwale yo sans esklavaj ke li t’ap pale yo a. Li di yo : «An verite, an verite mwen di nou, tout moun ki fè peche, li esklav peche a». E nou menm nou te ka ajoute, tout moun ki viv selon pawòl Granmèt la viv nan libète. Ekzanp sa a klè nan premye lekti a : Sidrak, Mizak avèk Abdenago, pa t’ doute ke Bondye lavi a te kapab delivre yo nan flanm dife a. Lafwa yo te pèmèt yo kwè ke Bondye te kapab retire yo nan tout tribilasyon. Pou yo menm, viv korèk selon pawòl Bondye se chemen ki bay lavi pou toutan an, se viv lib. Se rekonèt ke Bondye se Papa yo. Yon rekonesans ki pa t’ envite yo fèmen sou pwòp tèt yo, men ki te ede yo rekonèt ke se sèl Bondye Papa a pou yo te adore. Yon rekonesans ki te ede wa a konprann vrè sans renmen Granmèt la nan fidelite ak sila yo ki kwè nan Li a. Se menm mesaj sa ke Jezi t’ap anonse Jwif yo. Pou Jezi, rekonèt nou se pitit Bondye, se aksepte viv nan renmen epi aksepte «fè travay li a».

Men, an menm tan, Jezi t’ap repwoche Jwif yo tou, pou jan li te wè yo avèg, yo mal pou konprann. Aksyon jwif yo ak sa yo t’ap di, pa t’ montre nan yo vrèman moun ki rekonèt ke Bondye Abraam nan se Papa yo.

Ann gade nou menm tou pwòp lavi nou. Ann poze tèt nou kesyon sa a : Èske jan m’ap viv la mwen montre lòt yo ke mwen rekonèt tout bon vre ke Bondye Abraam nan se Papa mwen ?

LAPRIYÈ:Bondye Papa, ouvri je m’ pou mwen kapab toujou wè bèlte w’ ni lè m’ap soufri ni lè kè m’ kontan. Tanpri, fè m’ gen sajès pou nou kapab viv reyèlman vre tankou pitit ou. Pa pouvwa Jezikri.

PWOPOZISYON:Pou mwen kwè nan Jezi, anpil fwa sa mande m’ divòse ak anpil bagay mwen atache.