MADI 30

Koulè Blan

PREMYE LEKTI

«Mwen fini kous mwen, ak sèvis pawòl la mwen te resevwa nan men Granmèt Jezi a»

LEKTI TRAVAY APOT YO 20, 17-27

Jou sa yo:

Antan Pòl Milè, li voye Efèz pou yo rele chèf Legliz yo. Lè yo rive kote l’, yo te rasanble, li di yo:

«Nou konnen, depi premye jou mwen antre nan Lazi a, kijan mwen te aji avèk nou pandan tout tan, antan m’ap sèvi Granmèt la avèk lespri m’ byen ba, avèk dlo nan je, avèk tray yo ki te rive m’ nan konplo Juif yo; kijan mwen pa t’ neglije anyen ki te kapab sèvi nou, pandan m’ap anonse nou mesaj la, m’ap anseye nou an piblik ak nan kay yo, antan m’ap bay Juif yo ak nasyon yo temwayaj pou yo chanje vin jwenn Bondye, pou yo met lafwa nan Granmèt nou Jezikri.

Koulye a menm men mwen mare nan Lespri a m’a pral Jerizalèm, san m’ pa konn anyen nan sa k’ gen pou yo rive m’ yo; sof Lespri Sen an avèti m’ nan tout vil, li di: «Se chenn ak tray k’ap tann mwen Jerizalèm». Men mwen pa pè bagay sa yo, mwen pa konsidere lavi m’ gen plis enpòtans pase m’, yon fwa mwen fini kous mwen an, ak sèvis pawòl la, sa m’ te resevwa nan men Granmèt Jezi a, pou m’ sèvi levanjil favè Bondye a temwen.

Koulye a men mwen konnen nou p’ap wè fas mwen ankò, nou tout, kote mwen te pase antan m’ap preche rèy Bondye a. Se pousa mwen avèti nou jodi a menm mwen inosan pou san tout moun. Mwen pa t’ konn rale kò m’ chak fwa mwen te dwe anonse nou tout avètisman Bondye.

Pawòl Granmèt la.

SÒM REPONS 67, 10-11. 20-21

R/ Rèy tè yo, chante Bondye.

Se yon lapli favè ou te vide, Bondye; eritaj ou a ki fèb la, ou te refè l’.Vivan ou yo te abite ladan l’, ou te pare l’ pou pòv la nan bon kè ou, Bondye.R.

Konpliman pou Granmèt la chak jou; Bondye delivrans nou yo ap pote nou. Bondye nou, se Bondye k’ap sove nou; nan menm Granmèt la, pòt lanmò a ye.R.

LEVANJIL

«Papa, bay Pitit ou a bèlte a»

MEN BÒN NOUVÈL JEZIKRI A DAPRÈ JAN KI SEN 17, 1-11a

Lè sa a:

Jezi leve je l’ nan syèl la, li di: «papa, lè a rive, bay Pitit ou a bèlte a, pou Pitit ou a fè wè bèlte ou; menm jan ou te ba l’ pouvwa sou tout chè a, pou tout sa ou te ba l’, li ba yo lavi tout tan an.

Mwen te fè wè bèlte ou sou tè a; mwen fini sa ou te ban m’ fè a. Koulye a ban m’ bèlte a, Papa, kote ou, bèlte sa a mwen te genyen an, anvan tè a te fèt la, kote ou la.

Mwen te fè moun yo wè non ou, yo menm ou te ban mwen sot sou tè a. Se pou ou yo te ye, ou te ban mwen yo; yo te kenbe pawòl ou a. Koulye a yo konnen tout sa ou te ban mwen yo, se nan ou yo sòti, paske ou ba yo pawòl yo ou te ban mwen an; yo menm yo resevwa yo, yo konnen reyèlman vre se nan ou mwen sòti, yo kwè se ou menm ki te voye m’.

Mwen lapriyè pou yo: se pa pou tè a mwen lapriyè, men pou sila yo te ban mwen yo; paske se pou ou yo ye. Tout sa m’ genyen se pou ou yo ye, epi sa ou genyen se pou mwen yo ye, epi mwen jwenn bèlte m’ nan yo. Mwen deja pa sou tè a, yo menm yo sou tè a, mwen menm m’ap vin jwenn ou».

An nou fè lwanj ak konpliman pou pawòl Bondye a.

REFLEKSYON: Tout lavi Jezikri sou tè a, se ansèyman pou nou menm kòm moun epi kòm kretyen. Chak fwa nou panse n’ fin aprann yon leson nan yon moso levanjil, lè nou tounen sou li nou rann nou kont ke gen yon richès ki te chape anba limyè zye nou. Nan tèks sen Jan prezante nou jodi a, n’ap pote plis enterè a li ke lòt tèks yo, paske mesaj santral la sanse rezime lòt de tèks yo pi byen.

Yon senp koudèy sou levanjil la pèmèt nou wè kijan Jezi sousye de lavi nou chak : « Mwen lapriyè pou yo : se pa pou tè a mwen lapriyè, men pou sila yo te ban mwen yo… ». Menm lè li konnen li p’ap lage nou, l’ap toujou avèk nou, sa pa anpeche l’ kontinye lapriyè pou nou. Sepandan sa ki plis atire atansyon nou nan lekti sa a, se satisfaksyon Granmèt nou, gran frè nou pou reyalizasyon misyon li. « Mwen te fè wè bèlte ou sou tè a; mwen fini sa ou te ban m’ fè a… Mwen te fè moun yo wè non ou ». Kidonk, Jezi vin fè konnen non Bondye. Se nan Jezi nou konnen Bondye, paske Papa ak Pitit la, yo fè yon sèl.

Levanjil jodi a fè nou yon envitasyon spesyal. Li di nou chèche satisfaksyon nou nan men Granmèt la. Epi sèl fason pou nou rive gen satisfaksyon sa a, se nan renmen. Se pou sa Sen Jan di nou :« moun ki pa renmen pa konnen Bondye » (1 Jn 4, 8). Men atansyon ! Nou konjige vèb renmen chak jou pou montre tandrès pou fanmi nou, zanmi nou, manb koral, manb gwoup parèy nou pandan n’ap koupe moun nou pa rekonèt kout je, yon kout je ki ka koupe souf. Kijan pou nou santi nou satisfè de travay nou fè si se pwòp lwanj nou n’ap chache ak popilarite ?

LAPRIYÈ: Bondye, ou menm ki fè san mati yo vin tounen semans kretyen yo, tanpri, fè jaden Legliz ou a Chal ak zanmi l’ yo ki sen wouze ak san yo a vin donnen ba ou tout tan nan anpil rekòlt. Pa pouvwa Jezikri.

PWOPOZISYON : Pran yon ti tan nan jounen an pou analize tèt nou pou wè konbyen fwa nou trayi non nou kòm patizan Jezikri.