DIMANCH 6

Koulè Blan

TRANSFIGIRASYON GRANMÈT LA

(Fèt)

PREMYE LEKTI

“Rad li te blan tankou nèj”.

NAN LIV PWOFÈT DANYÈL

7, 9-10. 13-14

Mwen t’ap gade, joustan yo poze twón yo; Ansyen nan jou yo vin chita. Rad li te blan tankou nèj, cheve tèt li te tankou lenn ki byen pwòp; twón li a se flanm dife, wou l’ yo se dife ki limen. Yon rivyè dife ap koule byen vit sot devan fas li; pakèt mil fwa konbyen mil pèsonaj t’ap sèvi l’, di mil fwa konbyen san mil te kanpe devan l’. Jijman an enstale, liv yo louvri.

Mwen t’ap gade nan vizyon lannuit; sou nyaj syèl la se tankou yon pitit moun ki t’ap vini, li rive jous devan Ansyen nan jou yo. Yo mennen l’ devan l’, yo ba l’ pouvwa, konsiderasyon ak peyi wa; tout pèp, ras, lang ap sèvi l’. Pouvwa l’ se pouvwa tout tan, ki p’ap disparèt; peyi wa l’ p’ap detwi.

Pawòl Granmèt la.

SÒM REPONS 96, 1-2. 5-6.9

R/ Granmèt la wa, li anwo nèt anlè tout tè a.

Granmèt la wa, tè a danse, pakèt zile yo kontan.

Nyaj yo ak bwouya antoure l’,

jistis ak jijman se platfòm fotèy li.R.

Mòn yo fonn tankou lasi devan fas Granmèt la,

devan fas Granmèt la tout tè a blayi.

Syèl yo anonse jistis li, tout pèp yo wè glwa li.R.

Paske ou menm Granmèt, ou anwo nèt anlè tout tè a,

ou anlè byen wo, anlè tout dye yo.R.

DEZYÈM LEKTI

“Vwa sa a, nou te tande l’ sot nan syèl la”.

NAN DEZYÈM LÈT APOT PYÈ KI SEN 1, 16-19

Nou menm mwen si tèlman renmen an:

Se pa istwa moun envante nan tèt yo nou t’ap suiv, lè nou te fè nou konnen pouvwa ak prezans Granmèt nou Jezikri, men se ak pwòp je nou nou te wè grandè l’.

Li te resevwa konsiderasyon ak glwa nan men Bondye Papa a, lè vwa a sot nan grandè glwa Bondye Papa a, desann sou li: “Sa a se Pitit mwen an, sa m’ renmen an; nan li mwen jwenn plezi m’; koute l’. Vwa sa a nou te tande l’ sot nan syèl la, lè nou te avèk li sou mòn ki sen an.

Nou gen pawòl pwofèt yo ki solid; nou gen rezon ret ap gade l’ tankou yon lanp k’ap klere nan yon kote ki fè nwa, joustan lajounen an parèt, pou zetwal granmaten an monte nan kè nou.

Pawòl Granmèt la.

LEVANJIL

“Moyiz ak Eli t’ap pale sou depa l’ la”.

MEN BÒN NOUVÈL JEZIKRI A DAPRÈ LIK KI SEN 9, 28b-36

Lè sa a:

Jezi pran Pyè, Jak ak Jan, li monte sou mòn nan pou l’ priye.

Rive, pandan li t’ap priye, aparans figi l’ vin chanje, rad li vin blan, klere. Gen de mesye ki t’ap pale avèk li.

Se te Moyiz avèk Eli, ki parèt nan glwa a; yo t’ap pale sou depa l’ la, sa l’ t’ap reyalize Jerizalèm nan.

Pyè menm avèk sa yo ki te avèk li a, yo te lou avèk somèy. Yo ret je klè, yo wè glwa l’ la avèk de mesye yo ki te kanpe avèk li.

Rive, pandan y’ap kite l’, Pyè di Jezi: “Mèt, li bon pou nou ret isit la; an nou fè twa tant, youn pou ou, youn pou Moyiz ak youn pou Eli”; li pa t’ konnen sa pou l’ te di. Pandan li t’ap pale, yon nyaj rive, li kouvri yo; yo sezi, pandan y’ap antre nan nyaj la.

Yon vwa rive nan nyaj la, li di: “Sa a se Pitit mwen an, sa m’ renmen an: koute l’”. Pandan vwa a rive a, Jezi vin pou kont li.

Yo menm, yo fè silans; epi, nan jou sa yo, yo pa di pèsòn anyen nan sa yo te wè yo.

An nou fè lwanj ak konpliman pou pawòl Bondye a.

REFLEKSYON:

Frè ak sè m’ yo, jodi a Legliz la envite n’ pou n’ fè kè n’ kontan pou gwo mèvèy sa a ki te rive nan lavi kèk disip Jezi yo epi ki gen pou wè ak pwòp lavi pa nou kòm disip misyonè. Mèvèy sa a, se sa nou rele Transfigirasyon Granmèt la.

Pwofèt Danyèl, nan kèk gwo ekspresyon, li vle pale n’ sou entronizasyon Mouton Pak la, Jezikri ki kraze lanmò a, li menm ki akonpli gwo misyon Papa l’ te konfye l’ la: Rekonsilye tè a ak Bondye, rekonsilye moun yo ant yo menm, Li fè tout bagay vin nouvo, Li detwi rèy lanmò a pou lavi a ka boujonnen. Jezi detwi rèy fènwa a pou limyè a kab klere nèt ale,  Li detwi rèy manti a pou laverite a ka leve kanpe,  Li detwi rèy rayisans lan pou lanmou an ka parèt.

Jezi Pitit Bondye a te akonpli misyon l’ jous nan bout; li rive tan an, jan pwofèt la te anonse l’ la pou l’ resevwa tout onè, tout otorite, tout pouvwa li te genyen depi tout tan bò kote Papa l’.

Reyalite Transfigirasyon Jezi a ede n’ dekouvri, menm jan ak twa disip yo ki te temwen evènman sa a, Jezi se vrè Pitit Bondye a ki vini sou tè a. Se sa vwa k’ te sòti nan mitan nyaj la, ki se vwa Bondye Papa a te di: «Sila a se Pitit mwen renmen anpil la, koute li».

Nan prezans Moyiz ak Eli, ki senbolize Lalwa a ak Pwofèt yo, Bondye Papa a manifeste prezans li pou l’ montre pwòp Pitit li a pi gran pase Moyiz ak Eli, de gran pèsonaj sa yo ki enpòtan anpil nan lavi relijyej pèp Izrayèl la.

Nan moman Transfigirasyon an Pyè, Jak ak Jan te gen chans goute yon moman nan bèlte Granmèt la. Yo te vle rete nan kote sa a byen trankil tandiske travay la gen pou l’ kontinye anba mòn nan. Tout sa Jezi fè, tout sa li di yo fè n’ jwenn avan-gou reyalite syèl la. Pawòl li ak aksyon l’ yo te okazyon pou anpil moun kwè li se sila Bondye Papa a voye a.

Anpil fwa nan lavi nou kòm kretyen nou gen bezwen fè eksperyans tranfigirasyon Jezi a. Menm jan ak apot yo, nou dwe fè n’ dosil ak Lespri Sen k’ap ede n’ dekouvri piti piti prezans Jezi nan lòt yo, nan sa yo meprize nan kominote n’ap viv la, nan pòv ki san sekou a, nan malad ki poko jwenn gerizon an, nan mèvèy ki nan lanati yo men, yon fason espesyal, nan lavi yon kretyen vivan ki kreye selon imaj ak pòtre Bondye.

LAPRIYÈ: Granmèt, tanpri ede n’ fè n’ piti nan kè n’ pou n’ kite Lespri pa w’ la ede n’ rankontre prezans ou nan frè ak sè n’ yo nan kote n’ap viv, nan kote n’ap travay, nan chimen kote n’ap pase yo.

PWOPOZISYON: Ann kade ansanm kisa nou kapab chanje nan fanmi nou oubyen nan kominote nou, nou ka gen yon espas ki pi bèl. Si m’ chanje kònpòtman, ou chanje kònpòtman, tout bagay ap chanje.