DIMANCH 17

Koulè Vèt.

VENNKATRIYÈM DIMANCH TAN ÒDINÈ, ANE A.

PREMYE LEKTI

"Padonnen pwochen ou k’ap fè ou ditò, lè sa a peche ou ap efase lè w’ap lapriyè".

LEKTI LIV SIRASID 27, 33-28, 9

Kòlè ak raj, toulede se bagay ki lèd; moun ki nan peche a, li genyen yo nan li.

Moun ki vle tire vanjans la, l’ap jwenn vanjans nan men Granmèt la, k’ap kenbe peche l’ yo byen kenbe.

Padonnen pwochen ou k’ap fè ou ditò, lè sa a peche ou yo ap padonnen lè w’ap lapriyè.

Yon moun kenbe kòlè a kont yon lòt, epi l’ap mande Bondye gerizon. Li pa gen pitye pou moun parèy li, epi l’ap lapriyè pou peche l’ yo. Li menm, ki se chè, li kenbe kòlè a, epi l’ap mande Bondye pou padonnen peche l’: kilès k’ap lapriyè pou fot li yo? Sonje dènye tan yo epi sispann fè rayisans; sèke gen menas maladi ak lanmò nan kòmandman l’ yo.

Sonje respè Bondye epi ou p’ap fè kòlè kont pwochen an. Sonje kontra Sila a ki anwo nèt la epi pa okipe sa pwochen ou nan fè san l’ pa konnen an.

Pawòl Granmèt la.

SÒM REPONS 102, 1-2. 3-4. 9-10. 11-12 (r.: 8)

R/Granmèt la pran pitye, li sansib, li pran pasyans, li gen anpil kè sansib.

Fè konpliman pou Granmèt la, nam mwen;

tout sa k’ anndan m’, fè konpliman pou non l’ ki sen.

Fè konpliman pou Granmèt la, nam mwen, pa bliye tout sa l’ fè yo.R.

Li menm ki padonnen tout fot ou yo, ki geri tout maladi ou yo;

li menm ki delivre lavi ou sot nan fòs la, ki kouwonnen ou ak kè sansib, ak pitye.R.

Se pa pou tout tan l’ap fè diskisyon, se pa pou tout tan li fache.

Se pa daprè peche nou yo li trete nou, ni daprè fot nou yo li renmèt nou.R.

Sèke otan syèl la wo anlè tè a, kè sansib li debòde sou sila yo ki respekte l’ yo; otan solèy leve lwen ak solèy kouche, li ranvwaye peche nou yo lwen nou.R.

DEZYÈM LEKTI

"Swa n’ap viv, swa nou mouri, se pou Granmèt la nou ye".

LEKTI LÈT APOT PÒL KI SEN POU WOMEN YO 14, 7-9

Frè m’ yo:

Pèsònn nan nou pa viv pou pwòp tèt li, epi pèsòn pa mouri pou pwòp tèt li. Sèke si n’ap viv, se pou Granmèt la n’ap viv; si nou mouri, se pou Granmèt la nou mouri. Konsa, swa n’ap viv, swa nou mouri, se pou Granmèt la nou ye.

Se pou sa reyèlman vre Jezikri mouri, li leve, pou l’ kòmande ni moun ki mouri yo ni moun ki vivan yo.

Pawòl Granmèt la.

LEVANJIL

"Mwen pa di ou pou ou renmèt jouska sèt fwa, men jouska swasanndis fwa sè fwa"

MEN BÒN NOUVÈL JEZIKRI A DAPRÈ MATYE      18, 21-35

Lè sa a:

Pyè pwoche kot Jezi, li di: "Granmèt, si frè m’ fè peche kont mwen, konbyen fwa pou m’ padonnen? èske se sèt fwa?" Jezi di l’: "Mwen pa di ou jouska sèt fwa, men jouska swasanndis fwa sèt fwa.

Se pousa rèy syèl yo sanble ak yon wa ki te vle regle avèk sèvitè l’ yo. Lè l’ kòmanse regle, yo mennen youn ba li ki te dwe di mil goud. Kòm li pa t’ gen dekwa pou l’ renmèt, mèt li pase lòd pou yo vann li, ansanm ak madanm li, ak pitit li yo, ak tout sa l’ te genyen, pou l’ kapab renmèt. Men sèvitè a menm lage kò l’ atè, li lapriyè l’, li di: «Pran pasyans avèk mwen, m’ap renmèt ou tout bagay». Mèt sèvitè sa a pran pitye pou li, li lage l’, li padonnen l’ dèt li a.

Men kon sèvitè sa a sòti, li rankontre youn nan sa k’ konn sèvi ansanm avèk li yo, ki te dwe l’ san goud; li sezi l’, pou l’ toufe l’, li di: «Renmèt sa ou dwe». Sèvitè sa a lage kò l’ atè, li lapriyè l’, li di: «Pran pasyans avèk mwen, m’ap renmèt ou tout bagay». Li menm menm, li refize, li pati, li voye l’ nan prizon joustan li renmèt dèt la.

Lè lòt sèvitè yo wè sa l’ te fè, yo pran chagren anpil, yo rive, yo rakonte mèt li tout sa k’ te pase. Mèt li rele l’, li di l’: «Move sèvitè, mwen te renmèt ou tout dèt la, paske ou te lapriyè m’; èske ou menm tou ou pa t’ dwe pran pitye pou sila a k’ap sèvi ansanm avèk ou a, menm jan mwen te pran pitye pou ou a?» Mèt li fache, li renmèt li bay gad yo, joustan li renmèt tout sa l’ te dwe.

Se konsa tou Papa m’ ki nan syèl la ap fè avèk nou, si nou chak nou pa padonnen frè nou ak tout kè nou.

REFLEKSYON:Kòlè ak raj, toulede se bagay ki lèd: yo se karateristik yon moun ki nan peche paske ; moun ki nan peche a, li genyen yo nan li. Bagay sa yo kapab mennen moun nan yon fòm esklavaj kote li vin pèdi sans peche a, kote peche a vin tounen yon chèn.

Liv Sirasid la  ede nou konprann kòman nou ka jwenn mizerikòd Bondye si nou pratike mizerikòd ak pwochen nou : si w’ap lapriyè pou Bondye tande w’, ou pa ka ap kontinye ap kembe lòt moun nan kè.

Kidonk, sa vle di nou dwe wè pwochen nou an kòm yon vrè kado Bondye ba nou, yon kado nou dwe bay anpil valè. Anpil fwa nou bliye si Bondye idantifye li  ak chak moun. Bondye prezan nan lòt yo, pou rezon sa a, respè nou genyen pou chak moun, se respè nou genyen pou Bondye li menm menm.

Sòm 102 a di nou Bondye pran pasyans, li gen kè sansib ; se poutèt sa li toujou disponib pou l’ koute moun ki gen kè yo senp.

Nan levanjil la, Pyè mande Jezi konbyen fwa li dwe padone frè l’ak sè l’ : «Èske se sèt fwa?». Jezi reponn li : «Mwen pa di w’ jouska sèt fwa, men jouska swasanndis fwa sèt fwa».

Sa vle di, nou menm k’ap swiv Jezikri nou pa dwe viv nan egoyis sinon nan renmen youn pou lòt. Nou pa kapab mezire padon an, paske Bondye pa mezire renmen ak mizerikòd li pou nou.  Nan yon mond ki make ak vyolans ak vanjans, Bondye rele kretyen an pou fè diferans. Jezi ban nou ekzanp padon an sou lakwa a lè li te padone tout moun ki te fè l’ ditò.

LAPRIYÈ: Granmèt, montre nou padone selon dimansyon padon ak mizerikòd ou.  

PWOPOZISYON:Mwen se yon moun k’ap tonbe-leve sou chemen lafwa a, lè pwochen mwen tonbe m’ap ba li men pou ede li leve.