LENDI 2

Koulè Vèt

ANJ GADYEN YO KI SEN

(Memwa)

PREMYE LEKTI

"M’ap sove pèp mwen an sot nan peyi solèy leve ak solèy kouche".

LEKTI LIV PWOFÈT ZAKARI 8.1-8

Jou sa yo:

Pawòl Granmèt lame yo rive, li di: "Men pawòl Granmèt lame yo: 'Mwen jalou pou Siyon ak yon gran jalouzi, mwen jalou pou li ak yon gran kòlè'.

Men pawòl Granmèt lame yo: 'M’ap tounen nan Siyon, m’ap abite nan mitan Jerizalèm, y’ap rele Jerizalèm vil laverite a, ak mòn Granmèt lame yo mòn ki sen an'.

Men pawòl Granmèt lame yo: 'Gran papa ak grann ap abite nan laplas Jerizalèm ankò, ak mesye ki gen baton nan men yo, poutèt anpil laj yo. Laplas lavil la ap plen ak ti moun ak jèn fi k’ap jwe nan laplas li yo'.

Men pawòl Granmèt lame yo: 'Si bagay sa a parèt difisil nan je rès pèp sa a nan jou sa yo, èske l’ap difisil nan je pa m’?' deklarasyon Granmèt lame yo.

Men pawòl Granmèt lame yo: 'Men m’ap sove pèp mwen an sot nan peyi solèy leve ak nan peyi solèy kouche, m’ap mennen yo, y’ap abite nan mitan Jerizalèm, y’ap pèp mwen, m’ap Bondye yo nan laverite ak nan jistis'".

Pawòl Granmèt la.

SÒM REPONS 101, 16-18. 19-21. 29 e 22-23 (r.: 17)

R/ Granmèt la bati Siyon, li parèt nan bèlte l’.

Nasyon yo ap respekte non ou, Granmèt, tout wa yo sou tè a ap respekte bèlte ou la; paske Granmèt la ap bati Siyon, l’ap parèt nan bèlte l’.

L’ap voye je sou lapriyè pòv la, li p’ap meprize lapriyè yo a.R.

Se pou yo ekri bagay sa yo pou lòt jenerasyon an, pèp y’ap kreye a, l’ap fè lwanj Granmèt la.

Paske li panche sot nan kay sakre l’ la anwo a, Granmèt la gade sou tè a, antan l’ nan syèl la; pou l’ koute rèl prizonye yo, pou l’ delivre pitit lanmò yo.R.

Pitit sèvitè ou yo ap abite, ras yo ap asire devan fas ou,

pou yo anonse non Granmèt la nan Siyon, avèk lwanj li nan Jerizalèm;

lè pèp yo ap rasanble pou yo fè yon sèl, avèk rèy yo, pou yo sèvi Granmèt la.R.

LEVANJIL

"Sila a ki pi piti nan pami nou tout la, se li menm ki pi gran".

MEN BÒN NOUVÈL JEZIKRI A DAPRÈ SEN LIK       9, 46-50

Lè sa a:

Disip yo t’ap fè diskisyon: kilès nan yo ki pi gran.

Jezi menm wè kalkil kè yo, li pran yon ti moun, li fè l’ kanpe bò kote l’, li di yo: "Tout moun ki resevwa ti pitit sa a o non m’, se mwen menm li resevwa; epi tout moun ki resevwa m’, li resevwa sila a ki voye m’ nan. Reyèlman vre, sila a ki pi piti nan pami nou tout la, se li menm ki pi gran".

Jan menm pran lapawòl, li di: "Mèt, nou te wè yon moun ki t’ap chase demon yo o non ou, nou te anpeche l’, paske li pa t’ap suiv avèk nou".

Jezi menm di l’: "Pa anpeche l’; paske moun ki pa kont nou, se pou nou li ye".

REFLEKSYON: Jodi a, n’ap selebre memwa zanj gadyen yo. Depi lontan, farizyen ak sadiseyen yo te konn fè gwo diskisyon sou ekzistans zanj gadyen yo; sadiseyen yo di se sèlman nan imajinasyon moun ki inyoran yo zanj gadyen yo te ekziste.

Jezi te pwofite yon okazyon pou li mete bagay yo klè. Li te rele yon ti moun, li plase li nan mitan yo e li deklare: (…) ‘Atansyon pou nou pa meprize youn nan ti piti sa yo; mwen di nou reyèlman, zanj pa yo nan syèl la, se tout tan y’ap gade fas Papa m’ ki nan syèl la». (Mt 19,2-3.10). Ekzistans zanj la yo «se yon verite lafwa. Temwayaj Labib la klè menm jan ak Tradisyon an» (Katechis Legliz Katolik, n.328).

-Mwen menm Jezi, mwen pa t’ janm doute sou ekzistans zanj yo. Lè m’ te tou piti manman m’ te konn fè m’ sonje sa chak maten lè m’ ta pral lekòl. Anj gadyen mwen te gide mwen jous pou rive nan sasèdòs la. Yon lòt fwa ankò, Katechis la fè nou konnen: «Depi tou piti pou rive jous nan lanmò, lavi moun antoure ak sekirite zanj yo ak entèsesyon yo. ‘Chak fidèl genyen bò kote li yon pwotektè ak pastè ki pou mennen li nan lavi.’ (Sen Bazil)» (n.336).

Sen Jozemari rekòmande non sèlman pou nou gen yon devosyon pou zanj yo, men tou pou nou fè zanmi ak yo. «Fè anj gadyen ou konfyans.-Trete li tankou yon zanmi ke ou renmen- Se sa li ye- e l’ap rann ou yon pakèt sèvis nan sa w’ap fè chak jou».

-Byen souvan, mwen mande li konkou li e li pa janm manke mwen. «Ou etone paske anj gadyen ou rann ou anpil sèvis ki parèt byen klè.- Ou pa ta dwe: Se pou rezon sa a Granmèt la te mete li bò kote ou». E lè m’ap mache nan lari, mwen panse: petèt entèl pa konnen si li gen yon anj gadyen bò kote li. Anj, ede li! Se yon bagay mwen aprann nan men Sen Jozemari: «Pran abitid rekòmande chak moun ou konnen nan men anj gadyen li».

Kidonk, «tout lavi Legliz la benefisye èd zanj yo yon fason ke entelijans moun pa rive konprann», selon sa nou jwenn nan Katechis (n.334). - Ala rezon mwen genyen pou mwen di Bondye mèsi ak Manman li, Rèn zanj yo!

LAPRIYÈ: Bondye, depi davans, yon jan ki depase mezi espri nou, ou te voye Anj ou yo ki sen yo pou pwoteje nou, tanpri, nou menm k’ap priye ou, fè nou favè pou nou toujou jwenn defans nou nan pwoteksyon yo, epi pou nou jwi ansanm avèk yo pou tout tan. Pa pouvwa Jezikri.

PWOPOZISYON:Pran konsyans de prezans anj gadyen mwen ki bò kote mwen ; m’ap tounen yon anj gadyen pou yon moun ki nan sitiyasyon danje jodi a.