MADI 10

Koulè Vèt.

PREMYE LEKTI

"Moun Niniv yo chanje sòti nan move chemen yo, Bondye pran pitye pou yo".

LEKTI LIV PWOFÈT JONAS 3, 1-10

Pawòl Granmèt la rive sou Jonas yon dezyèm fwa, li di:

"Leve, al Niniv, gran vil la, preche sa m’a di w’ la ladan l’". Jonas leve, l’al Niniv daprè pawòl

Granmèt la. Niniv la se te yon gran vil, ki te mande twa jou pou travèse l’, Jonas kòmanse antre nan lavil la, li mache pandan yon jounen, l’ap rele, l’ap di: "Rete karant jou ankò, epi Niniv ap detwi". Moun Niniv yo kwè nan Bondye, yo deklare yon jèn, yo abiye ak rad sak depi pi gran jous pi piti.

Pawòl la rive kot wa Niniv la, li leve sot sou fotèy li, li jete rad li sot sou li, li abiye ak rad sak, li chita sou sann. Li fè deklarasyon, li di nan Niniv, daprè pawòl wa a ak chèf yo: "Ni moun, ni milèt, ni bèf, ni mouton, yo p’ap goute anyen, yo p’ap manje anyen, yo p’ap bwè dlo, se pou moun yo kouvri ak sak, ni bèt yo, se pou yo rele kot Granmèt la ak fòs, se pou chak moun chanje, kite move chemen l’ ak peche l’ap fè ak men l’. Ki moun ki konnen si Bondye p’ap chanje, pou l’ padonnen, pou l’ tounen sot nan dife kòlè l’ la, pou nou pa peri?"

Bondye wè travay yo, paske yo te chanje sot nan move chemen yo a, Bondye pran pitye, li kite malè a li te di l’ap fè yo a, li pa fè l’.

Pawòl Granmèt la.

SÒM REPONS 129, 1-2. 3-4ab. 7-8 (r.: 3)

R/ Si ou kenbe fot yo, Granmèt, ki moun k’ap kanpe?

Nan bafon yo m’ap rele kote ou, Granmèt;

Granmèt, koute vwa m’. Se pou zòrèy ou panche nan vwa lapriyè m’ nan.R.

Si ou kenbe fot yo, Granmèt, Granmèt, ki moun k’ap kanpe?

Paske kote ou se padon, nou respekte ou.R.

Paske kot Granmèt la se kè sansib, se delivrans an kantite kote l’.

Se li menm k’ap delivre Izrayèl sot nan tout fot li yo.R.

LEVANJIL

"Mat resevwa l’ lakay li. Mari chwazi pi bon pòsyon an".

MEN BÒN NOUVÈL JEZIKRI A DAPRÈ SEN LIK 10, 38-42

Lè sa a:

Jezi antre nan yon bouk; yon madanm yo te rele Mat resevwa l’ lakay li. Li te gen yon sè yo rele Mari, ki te chita pou kont li nan pye Granmèt la, l’ap koute pawòl li yo.

Mat menm t’ap fatige kò l’ anpil nan sèvis la; li kanpe, li di: "Granmèt, sa pa fè ou anyen, pou sè m’ nan kite m’ap sèvi tou sèl? Manyè di l’ pou l’ ede m’".

Jezi pran lapawòl, li di l’: "Mat, Mat, ou pran tèt chaje, ou pran traka pou anpil bagay. Epoutan se yon sèl ki nesesè: Mari chwazi pi bon pòsyon an, sa yo p’ap wete nan men l’ nan".

An nou fè lwanj ak konpliman pou Pawòl Bondye a.

REFLEKSYON: Levanjil jodi a, se yon tèks ki pwòp avèk Lik. Mesaj la se sou akèy: Mat ak Mari akeyi Jezi lakay yo. Mari chita, li poze li, l’ap gade mèt la epi l’ap koute li ak anpil atansyon, poutan Mat, sè Mari, li plis pran plezi nan netwaye kay la, nan fè kay la bèl; li tèlman bay detay sa yo enpòtans, li pran plenyen, li mande Jezi kisa li di nan sa, puiske sè a chita epi li menm l’ap fatige kò li nan fè travay. Jezi di Mat li trakase kò li twòp, aprè sa li fè l’ konnen se Mari ki chwazi pi pèl pòsyon an.

Nou menm nou te kapab konstate selon pwòp eksperyans pa nou, toude medam yo te bay Jezi bon akèy, paske nan abitid nou, nou toujou pran tan pou nou netwaye kay nou lè nou konnen n’ap gen yon vizit, men sa pa sifi, nou dwe chita ak vizitè a tou, nou dwe dyaloge ak li. Pètèt Jezi te rive lakay medam yo sanzatann, li te ba yo yon sipriz: pou rezon sa a, yo te akeyi li nan fason pa yo, sa youn te fè te konplete sa lòt la te fè.

Nou dwe li tèks sa selon limyè Levanjil Lik la, kote nou wè youn nan bagay ki karakterize vrè disip Kris la, se kapasite yo genyen pou koute Pawòl Bondye. Lè yo di Jezi fanmi li yo ap mande pou li, lè yo di li manman li ap chèche li, Jezi fè konnen, frè li ak sè li, manman li, se moun ki koute pawòl Bondye.

LAPRIYÈ: Granmèt, fè mwen rete nan pye ou toutan, pou m’ ka koute avèk atansyon Pawòl lavi a. Pa pouvwa Jezikri.

PWOPOZISYON: Pap Franswa di nou: Granmèt la toujou ap simen semans Pawòl li a; sèl sa li mande nou, se ouvri kè nou pou nou kapab koute li ak bòn volonte nou pou nou kapab mete li an pratik.