VANDREDI 13

Koulè Vèt.

PREMYE LEKTI

"Jou Granmèt la, se jou fènwa ak bouya".

LEKTI LIV PWOFÈT JOWÈL 1, 13-15; 2, 1-2

Mete rad dèy, kriye, prèt yo; pouse rèl, sèvitè lotèl yo; antre, kouche nan sak, sèvitè Bondye m’ yo, paske sakrifis ak vide bwason disparèt sot nan kay Bondye nou an.

Deklare yon jèn ki sen, konvoke reyinyon an, rasanble ansyen yo, ak tout moun ki abite tè a nan lakay Bondye nou an, pouse rèl kot Granmèt la: "A-a-a, jou malè-a", paske li tou pre, jou Granmèt la, l’ap rive tankou yon ravaj ki sòti nan sila a ki gen tout pouvwa a.

Sonnen twonpèt nan Siyon, pouse rèl sou mòn mwen an ki sen an, tout moun ki abite tè a twouble, paské jou Granmèt la rivé, paské li tou pré. Jou fè-noua ak bouya, jou nuaj ak vapè; tankou dévan-jou k-ap gayé sou tèt mòn yo, konsa yon pèp ki anpil, ki fò: pa gin kon li dépi nan kòmansman, épi apré-l, pap ginyin, jous nan ané jénérasion ak jénérasion.

SÒM REPONS 9, 2-3. 6 e 16. 8-9 (r.: 9a)

R/ Granmèt la ap jije fas tè a nan jistis.

M’ap fè lwanj ou, Granmèt, ak tout kè m’;

m’ap rakonte tout mèvèy ou yo.

M’ap fè kè m’ kontan, m’ap danse nan ou,

M’ap chante kantik pou non ou, ou menm ki anwo nèt la. R.

Ou kraze nasyon yo, ou detui mechan yo;

ou efase non yo pou tout tan ak tout tan gen tan.

Nasyon yo fonse nan fòs la yo te fouye a;

nan pyèj sa a yo te kache a, se la pye yo pri.R.

Granmèt la menm ap chita pou tout tan,

li pare fotèy li pou jijman an,

Se li menm k’ap jije fas tè a nan jistis,

l’ap jije pèp yo ak balans ki byen regle.R.

LEVANJIL

"Si se ak dwèt Bondye mwen chase demon yo, rèy Bondye a rive jous lakay nou".

MEN BÒN NOUVÈL JEZIKRI A DAPRÈ SEN LIK 11, 15-26

Lè sa a:

Kòm Jezi t’ap chase demon yo, gen kèk moun nan foul la ki t’ap di: "Se ak pouvwa Bèlzeboul, chèf demon yo, li chase demon". Epi dòt menm t’ap eseye l’, yo mande l’ pou l’ fè mirak sot nan syèl.

Li menm menm, kòm li te wè panse yo, li di yo: "Tout peyi wa ki divize sou pa anndan, l’ap detui, kay ap tonbe sou kay. Konsa si Satan divize sou pa anndan, kouman rèy li kapab ret kanpe? N’ap di se ak pouvwa Bèlzeboub m’ap chase demon yo. Men si se ak pouvwa Bèlzeboul m’ap chase demon yo, pitit nou yo menm, ak pouvwa kilès y’ap chase? Se pousa se yo menm k’ap jij nou. Sèlman, si se ak dwèt Bondye m’ap chase demon yo, rèy Bondye tou rive sou nou. Lè yon moun ki gen fòs, ki gen zam, ap veye lakou l’, sa l’ posede yo, yo asire.Men si yon moun ki pi fò pase l’ rive, li ranpòte laviktwa sou li, l’ap pran tout zam li yo, kote li te mete konfyans li a, l’ap separe sa l’ pran yo.

Moun ki pa avèk mwen, li kont mwen; epi moun ki pa ranmase ansanm avèk mwen, l’ap gaye.

Lè lespri papwòp la sòti nan yon moun, l’al mache nan kote ki pa gen dlo, l’ap chèche repo, li pa jwenn, li di: 'M’ap tounen nan lakay mwen an kote mwen te sòti a'. Lè l’ rive, li jwenn kay la pwòp, san fatra, byen dekore. Lè sa a l’al pran sèt lòt lespri ki pi mechan pase l’, yo antre, yo abite la.

Dènye sityasyon moun sa a ap pi mal pase premye a".

An nou fè lwanj ak konpliman pou Pawòl Bondye.

REFLEKSYON: Pawòl Bondye se sous lavi tout kretyen. Pawòl sa a se limyè; se pawòl sa ki kapab opere moun pou geri vye kansè move santiman ki nan kè moun nan. Pawòl la, se yon lanp, se yon gid k’ap mennen nou nan bon direksyon, se li k’ap mennen nou nan lavi a. Se pa yon pawòl blòf pou twonpe nou oubyen pou eksplwate nou. Se pa yon pawòl ki pou fè nou pè, men se yon pawòl ki ba nou asirans pou tan jodi a ak pou tan k’ap vini yo.

Atravè Pwofèt Jowèl, Bondye rele nou chak pou nou chanje kè nou, pou nou repanti. Paske nou menm lèzòm nou fè twòp mechanste sou tè a, nou pa vle mete tèt nou ansanm pou nou viv jan Bondye vle a. Jou sa ke Granmèt la chwazi a, se yon jou tèrib, yon jou k’ap pote anpil chanjman nan lanati; kote zetwal, lalin ak solèy pral pèdi nan limyè yo; kidonk se depi kounye a pou nou kòmanse prepare gran jou sa; se depi kounye a pou nou prepare kè nou epi fikse je nou sou Bondye ki gran e ki vivan. Bondye se lavi li vle pou nou. Pwojè li pou nou se pwojè lavi.

Youn nan bagay ki karakterize misyon Jezi, se lite kont mal la sou tout fòm. Konba sa a, se yon konba ki manifeste prezans Wayòm Bondye a ki an mach. Lènmi Jezi yo akize li: Selon kèk nan yo, Jezi se ak pouvwa chèf denmon yo l’ap aji, genyen lòt ki mande li yon siy ki sot nan syèl la. Jezi reponn yo, e li fè yo wè pwòp kontradiksyon ki genyen nan panse yo: satan pa kapab batay ak satan: «Tout peyi wa ki divize sou pa anndan, l’ap detui, kay ap tonbe sou kay. Konsa si Satan divize sou pa anndan, kouman rèy li kapab ret kanpe?».

Prezans mal la nan lemond se yon reyalite. Li manifeste sou plizyè fòm: lagè, grangou, mechanste, elatriye. Jezi pran angajman pou fè fas ak tout kalite mal sa yo ki rabese moun e ki kache vizaj Bondye. Pi gwo pèvèsyon an, se lè yo di Jezi ap aji nan non chèf demon yo.

Frè mwen, sè mwen, se chak jou n’ap tande pawòl Bondye e se yon chans nou genyen. Men kesyon nou dwe poze tèt nou jodi a, se “kisa pawòl la fè pou mwen”? Ki chanjman pawòl la pote nan lavi mwen? Ebyen, pou nou santi chanjman pawòl la pote nan lavi nou, nou dwe dispoze nou pou nou koute pawòl Bondye ak yon atitid obeyisans.

Pawòl la gen anpil fekondite. Si nou ouvri kè nou, pawòl la kapab pote anpil fwi siksè pou nou menm, pou fanmi nou ak pou tout sosyete a. Se konsa tout moun ap kapab di: Men li, men gouvènman Bondye a nou t’ap tan nan!

LAPRIYÈ: Bondye Papa, tanpri fè m’ gen entelijans pou m’ kapab distenge byen ak mal nan lavi mwen.

PWOPOZISYON: Avan mwen lonje dwèt sou moun, m’ap chèche dekouvri pwòf defo pa mwen.