MADI 7

Koulè Vèt

PREMYE LEKTI

“Nou youn se manb lòt”.

NAN LÈT APOT PÒL KI SEN, POU WOMEN YO 12, 5-16a

Frè m’ yo:

Atout nou anpil la, se yon sèl kò nou ye nan Jezikri, nou chak nou youn se manb lòt. Nou gen kado daprè gras yo ba nou an, kado sa yo divès: swa se travay pwofèt selon mezi lafwa a; swa se sèvis la antan sèvis la ap fèt vre; swa se moun k’ap anseye a antan li nan limit doktrin nan; moun k’ap ankouraje lòt antan l’ap ankouraje yo vre; moun k’ap bay la antan li gen yon kè senp; moun k’ap dirije a, antan l’ ap mete aktivite; moun k’ap swen malere, antan li gen bon jan.

Renmen an pa gen ipokrizi, se pou nou rayi sa k’ mal, se pou nou kole kò nou sou byen an, se pou nou youn renmen lòt avèk charite frè, se pou nou youn gen pou lòt konsiderasyon, pa fè parès nan aktivite nou, se pou nou cho nan Lespri a, se pou nou sèvi Granmèt la, se pou nou gen kè kontan nan esperans la, se pou nou sipòte tray avèk pasyans, se pou nou ret fidèl nan priyè se pou nou separe bay fidèl ki nan bezwen yo, se pou nou tout resevwa moun lakay nou.

Beni moun k’ap pèsekite nou, pa madichonnen. Fè kè nou kontan avèk sa yo ki gen kè kontan yo, kriye avèk sa yo k’ap kriye yo; se pou nou dakò antre nou, pa chèche foli grandè, men se pou nou renmen sa ki san pretansyon.

Pawòl Granmèt la.

SÒM REPONS: 130, 1. 2. 3

R/ Konsève nanm mwen nan lapè kote ou, Granmèt.

Granmèt, kè m’ pa gonfle, je m’ pa gen lanbisyon; mwen pa mache nan grandè, ni nan mèvèy ki depase m’.R.

Se byen poze, byen trankil mwen kite nanm mwen, tankou ti bebe sou lestonmak manman l’, tankou ti bebe, konsa nanm mwen ye nan mwen.R.

Se pou Izrayèl espere nan Granmèt la, depi koulye a jous pou tout tan.R.

LEVANJIL

“Sòti nan chemen yo, ak nan tras wout yo, epi fòse yo antre, pou kay mwen an kapab plen”

MEN BÒN NOUVÈL JEZIKRI A DAPRÈ LIK KI SEN 14, 15-24

Lè sa a:

Youn nan envite yo di Jezi: “Se chans pou moun k’ap manje nan peyi kote Bondye wa a!” Men li menm li di l’: “Yon mesye te fè yon gran soupe, li envite anpil moun. Lè pou soupe a fèt, li voye sèvitè l’ la, pou l’ di envite yo pou yo vini, paske tout bagay deja fin pare. Yo tout kòmanse fè eskiz. Premye a di ‘l: “Mwen achte yon pwopriyete, mwen blije sòti pou m’ al wè l’: tanpri, eskize m’. Yon lòt di: “Mwen achte senk makòn bèf, mwen gen pou m’ eseye yo: tanpri, eskize m’. Lòt la di: “Mwen sot marye, se pou sa mwen pa kapab vini”.

Sèvitè a tounin, li anonse mèt li a bagay sa yo. Lè sa a chèf kay la fache, li di sèvitè l’ la: “Sòti byen vit sou plas yo ak nan katye lavil la epi depi se pòv ak malad, avèg ak bwate, fè yo antre isit la”. Sèvitè a di: “Granmèt, mwen fè sa, jan ou te kòmande a, men gen plas toujou”. Mèt la di sèvitè a: “Sòti nan gran chemen ak nan tras wout yo, epi fòse moun antre, pou kay mwen an kapab plen”.

Mwen di nou, pèsonn nan mesye sa yo mwen te envite a, p’ap goute nan soupe m’ nan”.

An nou fè lwanj ak konpliman pou pawòl Bondye a.

REFLEKSYON:

Sa ki baz lavi yon kretyen se renmen. Renmen sa sòti nan Bondye, li desann nan kè moun pou l’ fè tout moun fè yon sèl nan Jezikri. Renmen an, se fòs tout kretyen, se li k’ap soutni nou toutan e tout kote lè nou aksepte viv nan kondisyon ki fè Bondye plezi. Lè nou fè yon sèl nan renmen youn lòt, Bondye kontan, e lè sa nou vin tounen manb kò Jezikri tout bon vre, ki se Legliz la.

Se reyalite sa Sen Pòl ap eksplike nou nan chapit 12 Lèt pou Women yo.

Nou tout nou gen plas nou, nou gen responsabilite nou nan Legliz Jezikri a. Konsa, nou pa dwe fè bak, paske se nou tout ki pou mete men ansanm pou n’ fè Wayòm renmen an tabli tout bon vre nan mitan nou. Lè pa gen renmen, pa ka pa gen lapè; men lè gen renmen ak lapè, Lespri Bondye la tou. Se Lespri Bondye a menm k’ap fè nou repoze nan li, li menm k’ap aprann nou renmen.

Gras a li nanm nou vin an pè, nou pa boulvèse. Se Bondye ki rele nou, li menm menm ki envite nou vin jwenn li nou tout ki bouke anba chay, l’ap delivre nou. Vini patisipe nan gran fèt l’ap fè pou nou. Li se Bondye tout moun: rich, pòv, soud, bèbè, mancho, fanm ak gason vanyan, moun ki gaya ak moun ki malad, moun ki konn li ak moun ki pa kon li, elatriye.

Nou pa bezwen pè pwoche vin jwenn li menm si nou ta santi peche nou yo twò lou sou do nou. Li se Bondye mizerikòd, li toujou anvi pou nou rete bò kote li, pou nou fè youn ak li. Li kite pòt kay li louvri byen gran pou tout moun ki vle antre.

Lè Bondye rele w’, pa fè kòmsi ou pa tande; pa chèche pretèks pou w’ kabre l’, paske Bondye toujou rezève pi bon bagay la pou ou. Avèk li menm ou p’ap janm pase wont, paske Renmen li san limit, Mizerikòd li se pou toutan.

LAPRIYÈ: Konsève nanm mwen nan lapè kote ou, Granmèt (Sòm 130).

PWOPOZISYON: Fè kichòy pou yon moun ki p’ap ka remèt ou sa.