DIMANCH 7

Koulè Blan

FÈT BATÈM GRANMÈT LA

PREMYE LEKTI

« Men sèvitè m’ nan, se nan li mwen jwenn plezi m’»

LÉKTU LIV PROFÈT IZAYI 42, 1-4. 6-7

Min paròl Granmèt la:

« Men sèvitè m’ nan, m’ap soutni l’, li menm mwen chwazi a, mwen jwenn plezi m’ nan li: mwen mete espri m’ sou li, l’ap pote jijman an bay nasyon yo. Li p’ap rele ni li p’ap konsidere figi moun, yo p’ap tande vwa l’ nan lari. Wozo ki fele a, li p’ap kase l’; mèch k’ap fè lafimen an, li p’ap etenn li; l’ap fè jijman an sòti nan verite. Li p’ap tris, ni brital, joustan li poze jijman an sou tè a; zile yo ap tann lalwa l’ la.

Mwen menm Granmèt la mwen rele ou nan jistis la, mwen pran ou nan men, mwen pwoteje ou, mwen renmèt ou kòm kontra pèp la pou limyè nasyon yo, pou ou louvri je avèg yo, pou ou wete prizonye yo sot nan kacho a, pou ou wete moun ki chita nan fènwa yo sot nan prizon an ».

Pawòl Granmèt la.

SÒM REPONS 28, la e 2. 3ac-4. 3b e 9b-10

R/ Granmèt la ap beni pèp li a nan lapè.

Pote bay Granmèt la, pitit Bondye yo, pote bay Granmèt la glwa non l’, adore Granmèt la nan bèlte ki sen an.R.

Vwa Granmèt la sou dlo yo, Granmèt la nan pouvwa, vwa Granmèt la nan grandè.R.

Bondye grandè a fè tande vwa li : nan tanp li a tout moun rele viv.Granmèt la abite anlè delij la, Granmèt la ap chita kòm wa pou tout tan.R

DEZYÈM LEKTI

« Granmèt la sakre l’ nan Espri Sen an »

NAN TRAVAY APOT YO 10, 34-38

Jou sa yo:

Pyè louvri bouch li, li di: « Amèn mwen rekonèt Bondye pa gade sou figi moun, men nan tout nasyon, moun ki krenn li, ki fè sa k’ kòrèk, se li menm li resevwa.

Bondye voye pawòl la bay pitit Izrayèl yo, li anonse lapè pa lentèmedyè Jezikri: sa a se Granmèt tout moun. Nou konnen, pawòl ki rive nan tout Jide a kòmanse depi sot nan Galile a aprè batèm nan, sa Jan te preche a, Jezi moun Nazarèt la, kijan Bondye sakre l’ak Espri Sen an avèk pouvwa, li menm ki travèse antan l’ap fè sa k’ byen, l’ap geri tout moun ki t’ap pase tray anba pouvwa dyab la, paske Bondye te avèk li ».

Pawòl Granmèt la.

LEVANJIL

«Ou se Pitit mwen an sa m’ renmen an, nan ou mwen jwenn plezi mwen»

MEN BÒN NOUVÈL JEZIKRI A DAPRÈ SEN MAK 1, 6b-11

Lè sa a:

Jan t’ap preche, li t’ap di: «Gen yon moun ki pi fò pase m’ k’ap vini, mwen pa merite pou m’ bese pou m’ defèt lasèt sapat li yo. Mwen menm mwen batize nou nan dlo, li menm menm l’ap batize nou nan Lespri Sen».

Rive, jou sa yo, Jezi vini sot Nazarèt Galile a, li resevwa batèm nan men Jan nan Jouden an ; menm lè a antan l’ap monte sot nan dlo a, li wè syèl yo louvri epi Lespri a tankou yon kolonb k’ap desann poze sou li ; yon vwa sòti nan syèl yo : «Ou se Pitit mwen an sa m’ renmen an, nan ou mwen jwenn plezi m’».

REFLEKSYON: Lè Jan Batis t’ap batize moun yo, se yon fason li t’ap ede yo pran konsyans jan yo te bezwen chanje mantalite yo, pou yo te chache Bondye epi konpòte yo yon lòt jan. Jezi menm, li pa t’ bezwen fè tout sa, paske se Pitit Bondye li ye. Li pa t’ janm fè peche. Kidonk, pa t’ gen anyen pou li te chanje nan pwòp lavi li.

Epoutan, Jezi pran desizyon antre nan ran pechè yo, li fè Jan Batis batize l’ tou. Se yon fason pou li te montre jis ki bò l’idantifye tèt li avèk nou. Se yon fason pou li te di pechè yo li konprann sitiyasyon yo e li te vle delivre yo. Jezi pa t’ janm kite chimen Bondye a, men li te padonen moun ki te kite l’, depi yo vle retounen l’ap akeyi yo.

Jezi vin montre nou kijan lanmou ak mizerikòd Bondye san limit. Li plonje nan rivyè pou li te kapab pran sou do li tout chay peche ki te lou sou do nou.

Lè Papa a ak Pitit la t’ap aji avèk yon sèl lide, yon sèl santiman, se Lespri Sen an ki reprezante linyon ki genyen nan mitan yo, jan yo ini nan yon sèl renmen pou tout pèp la.

Lè nou batize nan non Jezi, nou rantre nan kominyon li a ak Bondye.Nou tounen pitit Bondye menm jan avè l’.

Nou angaje nou pou nou swiv li, pou nou aji menm jan l’ te konn aji, pou tout frè ak sè nou yo kapab konnen jan Papa a renmen yo.

Epi nou gen Lespri Sen an nan kè nou. Se li menm k’ap ba nou limyè, k’ap ba nou yon lavi tou nèf, k’ap ede nou bati tèt ansanm nan mitan nou.

LAPRIYÈ: Mèsi Bondye, Papa a, Pitit la, ak Lespri Sen an! Ede nou viv nan nan tèt ansanm ak nan renmen menm jan avèk nou! Amèn.

PWOPOZISYON: Kisa mwen kapab fè jodi a pou fè yon moun konprann jan Bondye renmen l’?