JEDI 4

Koulè Blan

PREMYE LEKTI

"Li pa kapab fè peche, paske li fèt sot nan Bondye".

LEKTI PREMYE LÈT APOT JAN KI SEN 3, 7-10

Ti pitit mwen yo, pa kite pèsòn twonpe nou. Moun ki fè sa k’ kòrèk, li kòrèk, menm jan sa a kòrèk la. Moun ki fè peche, se nan dyab la li sòti, paske depi nan kòmansman dyab la fè peche. Se nan sa Pitit Bondye a parèt, pou l’ defèt travay dyab la.

Tout moun ki fèt sot nan Bondye, li pa fè peche, paske semans sa a rete nan li; li pa kapab fè peche, paske se nan Bondye li sòti. Se nan sa yo wè klè sa k’ pitit Bondye yo ak sa k’ pitit dyab yo. Tout moun ki pa kòrèk, epi moun ki pa renmen frè l’, li pa sot nan Bondye.

Pawòl Granmèt la.

SÒM REPONS 97, 1. 7-8. 9 (r.: 3a)

R/ Tout limit tè a ap wè viktwa Bondye nou an.

Chante yon kantik nouvo pou Granmèt la,

poutèt mèvèy li fè,

Men dwat li sove pou li,

bra li ki sen an.R.

Se pou lanmè a sonnen ak sa k’ plen l’ nan,

fas tè a ak sa ki abite nan li yo.

Se pou rivyè yo bat bravo,

se pou tout mòn yo danse.R.

Devan fas Granmèt la,

paske l’ap vin jije tè a.

L’ap jije fas tè yo nan jistis

ak pèp yo nan dwati.R.

LEVANJIL

"Nou jwenn Mesi a".

MEN BÒN NOUVÈL JEZIKRI A DAPRÈ SEN JAN 1,35-42

Lè sa a:

Jan te kanpe epi de nan disip li yo avèk li. Li gade Jezi k’ap mache, li di: "Men Mouton Bondye a". De disip yo tande l’ap pale, yo suiv Jezi.

Jezi menm vire, li wè y’ap suiv li, li di yo: "Ki bagay n’ap chèche"?

Yo menm yo di l’: "Rabi (sa vle di Mèt), kote ou abite"?

Li di yo: "Vini, n’a wè". Yo vini, yo wè kote l’ te rete, yo rete lakay li jou sa a; lè sa a, se te apeprè dizyèm lè a.

Te gen Andre, frè Simon Pyè a, youn nan de yo, ki te tande Jan an, epi ki te suiv li a.

Sa a rankontre tou dabò frè l’ la Simon, li di l’: "Nou jwenn Mesi a (sa vle di Kris la)". Li mennen l’ bay Jezi. Jezi menm gade l’, li di: "Ou se Simon, pitit Jona: y’ap rele ou Sefas (sa vle di Pyè)".

An nou fè lwanj ak konpliman pou Pawòl Bondye a.

REFLEKSYON:Jodi a, Apot Pòl ankouraje nou pou nou pa kite pèsonn twonpe nou. Kretyen an dwe konnen dèyè kilès l’ap mache : se Kris la. Nou pa moun k’ap mache dèyè moun. Si nou ap mache ak Kris la, nou dwe aprann konnen kilès li ye e nou dwe gen dezi ak volonte pou nou imite pawòl li ak aksyon li.

Moun ki pa chèche pratike jistis ak renmen, tankou chemen ki mennen nan bèlte a, li pa merite pou yo rele li kretyen. Bondye se moun li chwazi kòm enstriman pou mennen moun al jwenn li, li pa chwazi moun pou moun nan pwofite de sa pou rezoud pwojè pèsonèl li.

Atravè Levanjil la, nou wè Jan te konprann sa trè byen. Li te pase anpil tan ap preche, li t’ap prepare chemen Granmèt la, li t’ap anonse Sovè a te gen pou vini.  Repitasyon li ak ministè li t’ap vale teren nan tout zòn nan, se konsa li te gen anpil disip. Poutan li rete byen fèm nan fè volonte Bondye Papa a, antan li t’ap chèche desann pwòp tèt li, pou li te kapab leve Jezi byen wo nan moman pa li a. Se poutèt sa li pa t’ janm tonbe. Je li te rete fikse sou Jezi antan li t’ap anonse moun yo delivrans Izrayèl la rive.

Anpil fwa nou ka sòti ale nan yon rankont epi yo mal resevwa nou. Nou panse nou pa gen ase talan, nou dekouraje e nou sispann sòti. Sa se yon tantasyon nou tout kapab genyen. Men nou dwe gen kapasite pou nou venk li avèk konkou Lespri Sen an, pou nou kapab retounen sòti ankò al rankontre lòt yo avèk kè kontan, antan nou sèten Bondye rele nou pou nou tounen temwen Kris la, lè nou konnen Bondye rele anpil moun men pa gen anpil ki reponn apèl sa a.

LAPRIYÈ: Granmèt, tanpri fè nou rete nan zanmitay ak ou. Sila yo ki poko konnen ou, fè yo rive rankontre ak ou. Amèn.

PWOPOZISYON : Nou rive jwenn Pyè granmesi disponiblite Andre. Mwen menm, èske mwen te sòti al rankontre lòt yo ?