Koulè Vèt.
TRANTYÈM DIMANCH ÒDINÈ, ANE-B.
PREMYE LEKTI
"M’ap fè avèg la ak moun k’ap bwate a tounen
nan kè sansib la".
LEKTI LIV PWOFÈT
JEREMI 31,7-9
"Danse nan
kè kontan, Jakòb, rele kot chèf nasyon yo; sonnen twonpèt, chante, di:
'Granmèt, sove pèp ou a, rès Izrayèl yo'.
Men m’ap kondui
yo sot nan peyi nan nò a epi m’ap rasanble yo sot nan bout tè a. Nan pami yo ap
gen avèg ak moun k’ap bwate, madanm ki ansent epi sa ki fèk akouche, se yon
gran foul k’ap tounen isit la.
Ak dlo nan je,
yo te pati, nan kè sansib m’ap fè yo tounen, m’ap kondui yo nan ravin dlo, nan
wout ki dwat, yo p’ap bite nan chemen an, paske mwen se yon papa pou Izrayèl,
epi Efrayim se premye pitit mwen".
Pawòl Granmèt la.
SÒM REPONS 125, l-2ab. 2cd-3. 4-5. 6 (r.: 3)
R/ Granmèt la fè mèvèy pou nou; nou gin kè kontan.
Lè Granmèt la
t’ap fè ekzile Siyon yo tounen an,
nou te tankou
nan rèv.
Lè sa a bouch
nou te plen kontantman,
lang nou te plen
chante fèt.R.
Lè sa a yo t’ap
di nan pami nasyon yo:
"Granmèt la
fè mèvèy pou yo".
Granmèt la fè
mèvèy pou nou;
nou gen kè
kontan.R.
Granmèt, fè
ekzile nou yo tounen,
tankou ravin
nan sid yo.
Moun k’ap
simen ak dlo nan je,
y’ap rekòlte
ak kè kontan.R.
Yo t’a prale, yo
t’ap kriye,
yo t’ap pote
semans pou yo simen an;
y’ap tounen
ak kè kontan,
y’ap pote
zepi yo.R.
DEZYÈM LEKTI
"Ou se prèt pou tout tan, nan ran
Mèlkisedèk".
LEKTI LÈT POU
EBRE YO 5, 1-6
Tout prèt an
chèf, se nan pami moun yo, yo pran l’, pou enstale l’ pou moun yo nan kesyon ki
gen rapò ak Bondye, pou l’ofri kado ak sakrifis pou peche yo; li kapab gen
pitye pou sa yo ki pa gen konprann, ki pèdi wout, paske li menm tou li vlope ak
feblès; se pousa, li gen pou l’ofri sakrifis pou peche pa l’ menm jan ak pou
pèp la. Pèsòn pa pran mak konsiderasyon sa a ak pwòp fòs li, men se moun Bondye
rele tankou Aawon.
Se konsa Jezikri
pa t’ bay pwòp tèt li glwa antan l’ te vin prèt an chèf; men se sa a ki te di
l’ konsa a: "Ou se Pitit mwen, mwen menm jodi a, mwen ba ou nesans";
menm jan yon lòt kote, li di: "Ou se prèt pou tout tan nan ran Mèlkisedèk".
Pawòl Granmèt la.
LEVANJIL
"Mèt, fè m’ wè".
MEN BÒN NOUVÈL
JEZIKRI A DAPRÈ SEN MAK 10, 46-52
Lè sa a:
Pandan Jezi ap
sòti Jeriko, ansanm ak disip li yo ak yon pakèt foul moun, pitit Time a,
Batime, yon avèg, te chita bò chemen an, li t’ap mande charite. Lè l’ tande se Jezi
moun Nazarèt la, li kòmanse rele byen fò, li di: "Jezi, pitit David, pran
pitye pou mwen". Men foul moun yo t’ap fè l’obsèvasyon pou l’ pe bouch li;
men li menm se lè sa a li t’ap rele pi rèd: "Pitit David, pran pitye pou
mwen".
Jezi kanpe, li
pase lòd pou yo rele l’. Yo rele avèg la, yo di l’: "Pran kouraj; leve,
l’ap rele ou", li menm, li voye manto l’ jete, li vòltije vin jwenn li.
Jezi pran lapawòl, li di l’: "Ki sa ou vle pou m’ fè?"
Avèg la di l’:
"Mèt, fè m’ wè".
Jezi menm di l’:
"Ale, lafwa ou sove ou". Menm lè a, li wè, li suiv li sou wout la.
An nou fè lwanj ak konpliman pou Pawòl Bondye a.
REFLEKSYON: Jr 31,7-9 >: Pwofèt Jeremi kòmanse diskou sa ak yon pawòl kè
kontan kote l’envite nou fè kè nou kontan nan Granmèt la k’ap vin sove rès
pèp Izrayèl, yon pèp k’ap bite, k’ap tonbe-leve, yon pèp ki gen lavi li make ak
doulè ak soufrans. Jeremi anonse Granmèt la ap kondui pèp li a nan chemen
linite. Li anonse yon gwo rasanbleman. Nan rasanbleman sa a y’ap fè a ap gen
moun ki gen tout kalite pwoblèm, se Granmèt la k’ap envite yo kase tèt tounen
vin jwenn li : yo te pati ak dlo nan je, kounye a li vle fè yo tounen nan
kè kontan (Sòm 125). Jodi a, se nou
tout Granmèt la envite vin jwenn li nan kè kontan ak nan kè poze pou nou ka fè
yon sèl nan li.
He 5,1-6 > : Nan
tradisyon Legliz la te toujou gen pè (prèt) depi lontan pou te ofri sakrifis,
men pè sa yo, selon jan sa te ye, fòk yo te sòti nan ras pè pou yo te ka vin
pè. Pè sa yo te gen peche menm jan ak pèp la, se pou sa yo
te ofri sakrifis bay Bondye pou pwòp tèt pa yo ak pou pèp la.
Men, se Jezikri ki vini kòm Gran Prèt an chèf paske se
Papa a ki rele l’, ki di l’: «Ou se
Pitit mwen jodi a, mwen ba w’ nesans»; epi l’ te di l’ tou: «Ou se prèt pou tout tan nan ran
Mèlkisedèk». Se yon fason pou di sasedòs Jezi a pi wo pase sasadòs
ansyen prèt yo, Jezi pè pou tout tan selon lòd Mèlkisedèk. Jezi ofri yon sèl sakrifis pou peche nou tout kapab jwenn padon.
Sakrifis li a, se pwòp lavi li li ofri
bay Bondye Papa a, se gras a li jodi a nou kapab di nou gen espwa lavi
pou tout tan.
Mak 10, 46-52 >: Jezi se vrè limyè ki vini pou klere nou
tout, pou nou kapab mache nan bon chemen k’ap mennen nou bò kot Bondye. Batime
te rankontre ak Limyè sa a. Li te tande pale de Jezi epi l’ te kwè l’ te kapab
sove l’; se lafwa li nan Bondye ki fè l’ vin wè. Li pa t’ konn Jezi men l’ te
tande yo t’ap pale de li e li te mete tout konfyans li nan li. Aksyon Jezi poze
a, se akòz lafwa Batime. Moun yo te bare wout pou li pou l’ pa t’ rankontre ak
Jezi, men li t’ap ensiste antan li t’ap rele byen fò. Batime te
gen konviksyon si Jezi te touche li, zye li t’ap vin louvri. Jezi pa t’ rete
endiferan: li fè moun yo vini avè l’ epi l’ mande l’ kisa li vle li fè pou li;
li reponn li: « Mwen vle w’ fè m’ wè».
Menm lè a Jezi di l’ «se pou w’ wè», e se konsa
Batime wè tout bon vre paske l’ te kwè!
Nan tan
n’ap viv la gen anpil moun ki avèg menm jan ak Batime, men gen yon lòt kalite avègleman
sa manifeste nan plizyè aspè nan lavi nou: lamizè, grangou, enjistis, diskriminasyon
rasyal, enpinite, elatriye; nou bezwen yon lafwa solid menm jan ak Batime pou
nou ka kwè reyèlman vre Jezi kapab delivre nou.
Anpil nan
nou lè nou gen pwoblèm se paske n’ manke lafwa ki fè n’ pa jwenn gerizon; nou gen dout sou prezans Bondye nan lavi nou,
nou manke fè Bondye konfyans. An nou met tout konfyans nou nan
Bondye e nou va jwenn solisyon.
LAPRIYÈ: Papa Bondye, tanpri, fè
nou nou chèche Jezi Pitit ou a, konsa lè nou rankontre ak li, nou va wè bèlte
w’ la nan li. Amèn.
PWOPOZISYON: Jodi a, m’ap rele bay
Jezi. Mwen sèten l’ap tande rèl siplikasyon mwen, l’ap delivre mwen.
No hay comentarios:
Publicar un comentario