SAMDI 27-10-2018

Koulè Vèt

PREMYE LEKTI

«Jezikri se tèt la, kote tout kò a pran sous pou devlope a»

LEKTI LÈT APOT PÒL KI SEN, POU EFEZYEN YO 4, 7-16

Frè m’ yo:

Chak moun nan nou jwenn kado gras la daprè sa Jezikri mezire pou li a.

Se pousa yo di: «Antan l’ monte nan wotè a, li kondui prizonye, li bay moun yo kado yo».

Kesyon li monte sa a, sa sa vle di, si se pa paske li te kòmanse desann nan rejyon ki anba tè a? Sa a ki desann nan, se li menm tou ki te monte anlè tout syèl yo, pou l’ plen tout bagay.

Se li menm ki bay kèk moun gras pou yo apot, kèk moun menm se pwofèt, dòt ankò evanjelis, dòt menm se gadyen ak savan sakre. Kado sa yo se pou sen yo kapab vin kòrèk nèt nan travay sèvis la, antan kò Jezikri a ap bati, joustan nou tout nou rive fè yon sèl nan lafwa a ak konesans Pitit Bondye a, pou nou rive nan moun sa a ki kòrèk nèt la, nan mezi dènye devlopman kote Jezikri anfòm nèt la. Konsa nou p’ap tankou ti moun piti ankò k’ap ezite, nou p’ap kite yo fè nou fè laviwonn nan tout van move anseyman moun, nan riz moun k’ap toudi nou nan move chemen; okontrè, antan n’ap fè verite a nan renmen, n’a devlope nan tout bagay nan li menm, Jezikri ki tèt la; se nan li tout kò a fè yon sèl, li mare ak tout kalite jwenti k’ap transmèt mouvman an, daprè aktivite ki nan mezi chak manb, pou kò a devlope antan l’ap bati nan renmen an.

Pawòl Granmèt la.

SÒM REPONS 121, 1-2. 3-4a. 4b-5

R/ Nan kay Granmèt la n’a prale ak kè kontan.

Mwen kontan poutèt yo di m’: «Nan kay Granmèt la n’a prale».

Pye nou deja kanpe nan pòt ou yo, Jerizalèm.R.

Sèke se la ras yo ap monte, ras Granmèt la, temwayaj Izrayèl, pou fè lwanj non Granmèt la.

Paske se la twòn yo enstale pou jijman an, twòn kay David la.R.

LEVANJIL

«Si nou pa fè penitans, nou tout ap peri menm jan»

MEN BÒN NOUVÈL JEZIKRI A DAPRÈ SEN LIK 13, 1-9

Lè sa a, gen kèk moun ki pwoche, yo pote nouvèl bay Jezi sot Galile, sou moun yo Pilat te mele san yo avèk sakrifis yo t’ap ofri yo; li pran lapawòl, li di yo: «Èske nou kwè Galileyen sa yo te fè peche plis pase tout Galileyen yo, pou yo soufri kalite bagay sa yo? Non, mwen di nou; men si nou pa fè penitans, nou tout ap peri menm jan». Menm jan dizuit sa yo tou a te tonbe sou yo na Siloe a, epi li te touye yo a, èske nou konprann yo menm yo te pi koupab pase tout moun ki abite nan Jerizalèm? Non, mwen di nou; men si nou pa fè penitans, nou tout menm jan n’ap peri.

Li te di yo parabòl sa a tou: «Yon mesye te gen yon pye figye ki te plante nan jaden rezen l’; li vin chèche fwi ladan l’, li pa jwenn.

Li di jeran jaden pye rezen an: «Sa fè twazan m’ap vin chèche fwi nan pye figye sa a, epi mwen pa jwenn; koupe l’, pouki sa pou l’ ap okipe plas nan tè a?»

Jeran an reponn, li di l’: «Mèt, kite l’ ane sa a ankò, joustan mwen fouye alantou l’, mwen mete fimye; petèt l’ap donnen fwi, otreman, w’a koupe l’ aprè».

An nou fè lwanj ak konpliman pou pawòl Bondye a.

REFLEKSYON: Jodi a, Pawòl Jezi yo envite nou medite sou enkonvenyan oubyen dezavantaj ipokrizi. «Yon mesye te gen yon pye figye ki te plante nan jaden rezen l’; li vin chèche fwi ladan l’, li pa jwenn» (Lik 13,6). Ipokrit la, se sila ki montre sa li pa ye. Mansonj sa rive nan dènye limit li lè moun nan fè kòmsi li se yon moun ki kòrèk, ki dwat (aspè moral) tandiske li chaje ak vis ak defo, ouyen lè moun nan pran pòz li gen devosyon (aspè relijyon an) nan chèchè pwòp enterè pa li, antan li neglije Bondye. Ipokrizi moral la fò anpil nan mond la, ipokrizi relijyez la fè Legliz la anpil mal.

Pawòl Jezi te lanse kont eskrib yo ak farizyen yo pou vekse yo – ke nou jwenn pi klè e dirèk nan lòt pasaj Levanjil — se pawòl tèrib. Nou pa kapab li oubyen tande pawòl sa yo san nou pa santi yo touche kè nou, si vrèman nou te tande yo epi konprann yo.  

Se yon bagay ki konsène nou tout, puiske nou tout nou manke koeran, paske nou fè eksperyans kontradiksyon ant sa nou montre ak sa nou ye vrèman. Nou menm politisyen, lè nou pwofite peyi a antan n’ap pwoklame ke se sèvi n’ap sèvi li; nou menm polisye lè n’ap pwoteje gwoup kowonpi sou pretèks se lòd n’ap mete nan popilasyon an; nou menm medsen, enfimyè, lè nou elimine lavi k’ap pran nesans, sou pretèks medsin ap fè pwogrè; nou menm nan mwayen kominikasyon sosyal, lè nou falsifye enfòmasyon epi nou pèvèti moun yo pandan nou di se divèti n’ap divèti yo; nou menm k’ap administre lajan Leta, lè nou kase kèk biyè ladan pou nou foure nan pòch nou (nan pòch pa nou oubyen nan pòch pati politik pa nou) antan n’ap vante tèt nou kòmkwa nou se moun  ki onèt, moun ki serye; nou menm layik, lè nou anpeche relijyon manifeste piblikman nan non libète konsyans; nou menm relijye, lè nou viv sou do enstitisyon nou yo akoz enfelite nou ak lespri ak ekzijans fondatè yo; nou menm pè yo, lè nou ap viv gras a lotèl la epi nou pa sèvi fidèl pawas nou yo avèk senplisite ak lespri Levanjil la; elatriye.

E ou menm ak mwen, nan ki mezi konsyans nou di nou sa nou dwe fè ak sa nou pa dwe fè, pou nou ka pase tan nou ap gade ti pay ki nan je lòt la, san nou pa menm vle rann nou kont de bout bwa ki avegle nou an. Wi ou non?

Jezi, Sovè mond lan, sove nou anba medyokrite nou yo ak anba gwo ipokrizi nou yo!

LAPRIYÈ: Granmèt, tanpri ede m’ konbat tout ipokrizi ki nan mwen, antan m’ap montre sou pa deyò sa mwen ye sou pa anndan an.

PWOPOZISYON: Avan mwen lonje dwèt sou lòt yo, m'ap gade ki defo mwen geyen nan lavi mwen ke mwen dwe korije.