Koulè Blan
Franswa D’Asiz ki sen
(Memwa)
Nòt: Jodi a, nan okazyon fèt Franswa
D’Asiz n’ap priye pou Pap Franswa ki te chwazi li kòm patwon li.
PREMYE LEKTI
"Mwen konnen Sila-a k’ap delivre m’ nan, li
vivan".
LEKTI LIV JÒB
19, 21-27
Jòb di:
"Pran
pitye pou mwen, pran pitye pou mwen, omwen nou menm, zanmi m’ yo, paske men
Granmèt la touche m’. Pouki sa n’ap pèsekite m’ nan tankou Bondye, epi n’ap plen
vant nou ak chè m’ yo? Ki moun ki ta fè m’ favè pou yo ekri pawòl mwe yo? Ki
moun ki ta ban m’ posibilite pou yo grave nan liv avèk yon kreyon fè, avèk yon
lam an plon oubyen sizo afwa, pou yo ta make nan wòch ki di-a? Mwen konnen reyèlman
vre Sila a ki deliver m’ nan, li vivan, nan dènye jou a m’ap leve sot anba tè a.
M’ap vlope ak po m’ ankò, epi nan chè m’ m’ap wè Bondye m’ nan. Sila a m’ap wè
mwen menm nan, se ak je m’ m’ap gade l’, se pa yon lòt: espwa sa a poze nan
zantray mwen".
Pawòl Granmèt la.
SÒM REPONS 26, 7-8a. 8b-9abc. 13-14 (r.: 13)
R/ Mwen kwè m’ap
wè byen Granmèt la nan tè vivan yo.
Granmèt, koute
vwa m’ k’ap rele, pitye pou mwen, koute m’.
Se sou ou kè m’
di: "Chèche fas li".R.
Se fas ou,
Granmèt, m’ap chèche.
Pa vire fas
ou lwen m’, nan kolè ou, pa vire do bay sèvitè ou la.
Se sekou m’
ou ye, pa lage m’.R.
Mwen kwè m’ap
wè byen Granmèt la nan peyi vivan yo.
Tann Granmèt
la, aji avèk kouraj, asire kè ou, se pou ou tann Granmèt la. R.
LEVANJIL
"Lapè nou an ap poze sou li".
MEN BÒN NOUVЀL JEZIKRI A DAPRЀ SEN LIK 10, 1-12
Lè sa a:
Granmèt la chwazi swasanndouz lòt; li
voye yo de pa de devan l’ nan tout vil ak bouk kote li te gen pou l’ ale.
Li t’ap di
yo: "Rekòlt la anpil, men ouvriye yo se yon ti kras yo ye. Lapriyè Granmèt
rekòlt la, pou l’ voye ouvriye nan rekòlt li. Ale: men mwen voye nou tankou mouton nan pami lou. Pa pote sak, ni bous,
ni sapat, pa salye pèsonn nan chemen.
Nan nenpòt
kay nou antre, kòmanse di: 'Lapè pou kay sa a'; si gen yon pitit lapè la, lapè
nou an ap poze sou li; otreman, l’ap tounen vin jwenn nou. Rete nan menm kay sa-a, manje, bwè sa yo genyen; paske ouvriye a merite
salè l’.
Pa travèse
sot nan kay al nan kay. Nan nenpòt ki vil nou antre, epi yo resevwa nou, manje
sa yo pote ba nou, geri malad yo ki nan vil la, di yo: 'Rèy Bondye a tou pre
nou'.
Men nan nenpòt
ki vil tou nou antre, epi yo pa resevwa nou, soti sou laplas li yo, epi di: 'Menm
pousyè, ki te kole sou nou nan vil nou an, nou kite l’ pou nou; sèlman aprann
sa, rèy Bondye a tou pre'. Mwe di nou
Sodòm ap jwenn plis padon jou sa a pase vil sa a".
An nou fè lwanj ak konpliman pou Pawòl Bondye a.
REFLEKSYON:
Jodi a n’ap sonje Sen Franswa Dasiz, ki se youn nan pi
gwo modèl lanmou nan istwa Legliz Katolik la. Kisa k’ fè l’ gwo konsa? Se paske li
menm se youn nan nèg ki te pi senp, ki te vin pi piti.
Sen Franswa Dasiz fèt nan peyi Itali
nan lane 1181 (epi li rantre kay Papa nou ki nan syèl la nan lane 1226). Vrè
non li, se te Giovanni (tankou Jan, nan lang italyen) men papa l’ te ba
li ti non jwèt Francesco (Franswa), ki vle di “Fransè a”, paske lè misye te fèt, papa
l’ t’ap fè komès nan peyi Lafrans. Papa misye se te yon gwo komèsan, ki te rele
«Pietro di Bernardone». Lè l’ te yon jenn gason, Franswa te viv tankou nenpòt
pitit boujwa, li t’ap jwi kòb papa li, li fè anpil dezòd. Men yon jou
li te gen yon vizyon, epi li konvèti tout bon.
Aprè jou sa a, sèl sa li te bezwen se
te swiv Jezi. Tout richès li, li te bay pòv yo li. Li kòmanse ap preche
levanjil la, epi anpil moun te vle fè sa asanm avè l’. Se sa k’ fè li fonde yon
kongregasyon frè, jodi a nou rele yo fransisken.
Li te gen yon zanmi, Sent Klè, ki te fonde yon kongregasyon mè ak menm
espirityalite tou. Si ou konte tout branch kongregasyon fransisken ak
fransiskèn ki genyen jounen jodi a tankou yon sèl, se yo menm ki pi gwo nan
Legliz katolik la.
Sen Franswa te fè anpil mirak, epi li
te dyaloge ansanm ak chèf relijyon Islam yo, pou fè lapè avèk yo. Se li menm ki
te fondatè tradisyon fè krèch nan tan Nwèl, pou ede nou sonje jan
Jezi te fèt.
Lè li te mouri, Sen Franswa Dasiz pa
t’ gen lajan. Li pa t’ fè gwo etid. Li pa t’ fè gwo diskou, okontrè mesaj li te
senp anpil. Li pa t’ gen okenn pouvwa, se sèvi li te bezwen sèvi. Epi 800 lane
aprè, nou toujou ap sonje li.
Lè Pap Franswa te chwazi non li, se ak
sen sa a li t’ap panse. Sen Franswa Dasiz te pran swen sa k’ pi malere yo, ak
kreyasyon an tou. Se sa Pap Franswa mande nou fè, nan lèt li ekri dènyèman an,
ki rele ‘Laudato Si’ (Sa vle di, ‘Se pou yo fè lwanj ou Granmèt’. Pap
la mande pou nou chanje jan n’ap viv, pou nou sispann debwaze mòn yo, pou nou
sispann polye sous dlo yo, pou nou sispann mete pwodwi chimik nan manje nou.
Lanati se yon kado Bondye te fè nou, men li mande nou pran swen l’ pou sa k’ap
vini aprè nou. Nou pa gen dwa detwi planèt la.
LAPRIYÈ: Bondye, ou menm
ki te fè Franswa ki sen favè pou l’ sanble avèk Jezikri antan l’ vin pòv, antan
li viv daprè ti kondisyon moun li-a, tanpri, fè nou monte nan tras-wout li-a,
pou nou suiv Pitit ou-a, epi pou nou fè youn avèk ou gras a yon charite ki ba
nou kè kontan. Pa pouvwa Jezikri.
PWOPOZISYON: Pran tan
pou koute lòt yo, se pi bon fason pou nou aprann akeyi yo.
No hay comentarios:
Publicar un comentario