VANDREDI 5-10-2018

Koulè Vèt

PREMYE LEKTI

‘‘Èske ou pase maten an lòd, èske ou antre nan fon lanmè a’’?

LEKTI LIV JÒB 38, 1. 12-21; 39, 33-35

Antan l’ nan loraj la, Granmèt la menm reponn Jòb, li di:

"Èske depi ou fèt, ou te pase maten an lòd, ou te montre devan jou a kote pou l’ fè? Èske ou te kenbe bout tè a ak men ou pou ou souke l’, pou ou chase mechan yo sot nan li? Li vin tounen tankou labou pou mete mak so a, li kanpe tankou yon rad: limyè mechan an sòti nan li, bra ki te wo a vin kraze.

Èske ou antre nan fon lanmè a, èske ou pwomnen nan dènye bout bafon anba a? Èske pòt lanmò yo te louvri ba ou, èske ou te wè pòtay fènwa yo? Èske ou te ekzamine lajè tè a? Montre m’ tout bagay, si ou konnen.

Nan ki wout limyè a abite, epi ki kote fènwa yo rete; pou ou kondui yo chak nan bout chemen yo, pou ou konprann tras wout lakay li. Èske ou te konnen ki lè ou t’ap fèt, èske ou te konnen konbyen jou ou t’ap viv?"

Jòb menm reponn Granmèt la, li di: «Mwen menm ki pale san konsiderasyon, ki sa pou m’ reponn? Se men m’ mwen poze sou bouch mwen. Yon sèl bagay mwen di: pito m’ pa t’ di anyen! epi yon lòt: mwen p’ap ajoute anyen ankò’’.

Pawòl Granmèt la.

SÒM REPONS 138, 1-3. 7-8. 9-10. 13-14ab

R/ Kondui m’, Granmèt sou wout tout tan an.

Granmèt, ou sonde m’, ou kondui m’, ou konnen chita m’ ak leve m’.

Ou konprann panse m’ depi byen lwen, tras wout mwen ak kouche m’, ou ekzamine yo.

 Tout wout mwen yo, ou wè yo byen klè.R.

Ki kote pou m’ ale lwen lespri ou, ki kote pou m’ sove kò m’ lwen fas ou?

Si m’ monte nan syèl, ou la; si m’ desann anba tè, ou prezan. R.

Si m’ pran zèl devan-jou m’al abite nan fon lanmè, menm la,

men ou ap kondui m’, men dwat ou ap kenbe m’.R.

Paske se ou menm ki te fòme ren m’, ou te trese m’ nan vant manman m’.

M’ap fè lwanj ou, paske ou fòme m’ yon fason ekstrawòdinè, aksyon ou yo ekstrawòdinè.R.

LEVANJIL

"Moun ki meprize m’, li meprize sila a ki voye m’ nan".

MEN BÒN NOUVÈL JEZIKRI A DAPRÈ LIK KI SEN 10, 13-16

Lè sa a: Jezi di:

"Madichon pou ou, Kowozayin! madichon pou ou Betsayid! paske, si se te nan Tir ak Sidon mèvèy sa yo te fèt, sa k’ fèt lakay nou yo, gen lontan yo ta chita nan sa k’ ak sann pou yo fè penitans.

An verite y’ap padonnen Tir ak Sidon plis pase nou nan jou jijman an.

Epi ou menm, Kafanawòm, jous nan syèl la ou leve, jous anba tè ou ap plonje.

Moun ki koute nou, se mwen menm li koute, epi moun ki meprize nou, se mwen menm li meprize. Moun ki meprize m’ menm, li meprize sila a ki voye m’ nan’’.

An nou fè lwanj ak konpliman pou pawòl Bondye a.

REFLEKSYON: Pawòl Bondye jodi a ap ede n’ dekouvri kijan Bondye gen pasyans, mizerikòd pou tout moun: se sa eksperyans Jòb la montre nou. Pouvwa lezòm genyen sòti nan sila a ki toujou la: se Granmèt la k’ap veye sou lavi nou, se pou nou fè zanmi avèk li pou n’ kab konprann li pi byen, epi pou nou konnen kijan li vle pou n’ viv pou n’ fè kè l’ kontan; men sa ap mande n’ dosilite, pasyans, ak renmen. Pou kisa Bondye poze Jòb tout kesyon sa yo atò? Ebyen se paske li se yon Papa kè sansib, li pran pasyans pou l’ renmen, epi li pa vle pèdi yon sèl nan pitit li yo, paske li se yon Papa ki gen kè manman. Se pou sa li te voye pitit li, Jezi sou tè a, e se sa 6 premye vèse nan Levanjil Sen Lik la raple nou.

Jezi te vin fè nou konnen ke chemen syèl la pa fasil, daprè tout pèsekisyon li te jwenn nan mitan lèzòm sou tè a: se pa tout moun ki te dakò avèk li, se pa tout moun ki te tolere li nan fason li te konpòte ak nan fason li t’ap pale. Se sa ki fè li te gen pwoblèm ak farizyen yo ki te toujou ap tann pyèj pou li nan poze l’ kesyon. Nan aksyon l’ yo, Jezi te toujou mete l’ bò malere yo, nan bay moun manje, geri malad, leve moun mouri. Nou menm k’ap viv jounen jodi a, lavi a pa fasil pou nou, men pran kouraj, paske Jezi toujou la avèk nou pou l’ ede n’ nan tout sityasyon ki bay tèt chaje. Nou pa bezwen pè, si n’ap mache ak Kris la tout bon vre, nanpwen jou pou nou pa byen kore. Bondye gen kè sansib pou nou, li pran pasyans pou l’ renmen nou. An nou mete tout konfyans ak tout espwa nou nan li.

LAPRIYÈ: Bondye Papa, se ou ki mèt tout sa ki ekziste, tanpri ede nou konprann sans lavi a, pou nou pa janm bay anyen sou tè a plis valè pase lavi ak diyite moun. Pa pouvwa Jezikri. Amèn.

PWOPOZISYON: Pran ekzanp sou kè sansib ak pasyans Bondye gen pou mwen, pou mwen ka gen mizerikòd ak pasyans pou lòt yo.