MЀKREDI 17-18-2018

Vèt wouj.

Inyas Dantyòch

(Memwa)

PREMYE LEKTI

“Moun ki patizan Jezikri, yo kloure chè yo sou kwa a avèk vis yo”.

NAN LÈT APOT PÒL KI SEN POU GALAT YO 5, 18-25

Frè m’ yo: Si se Lespri a k’ap kondui nou, nou pa anba lalwa a. Aktivite chè a, yo devwale, se move plezi, bagay ki pa pwòp, move konduit, banbòch, sèvis zidòl, maji, rayisans, diskisyon, jalouzi, kòlè, batay, kont, divizyon, lanvi, krim, vin sou, manje twòp, ak bagay konsa. Mwen di nou sa davans, jan m’ te deja di nou li: moun ki aji konsa yo, yo pap jwenn rèy Bondye a.

Men fwi Lespri a menm se charite, kè kontan, kè poze, pasyans, bon jan, bon kè, padon, dousè, lafwa, senplisite, kontwole move tandans, regle plezi kò a. Kont kalite bagay sa yo pa gen lalwa. Moun ki patizan Jezikri yo, yo kloure chè yo sou kwa a avèk move defo yo ak vye lanvi yo. Si se Lespri a k’ap fè nou viv, se daprè Lespri a tou pou nou mache.

Pawòl Granmèt la.

SÒM REPONS: 1, 1-2. 3. 4 e 6.

R/ Moun k’ap swiv ou, Granmèt, 1’ap gen limyè lavi a.

Se chans pou moun ki pa ale swiv konsèy mechan yo, ki pa kanpe nan chemen moun pechè yo, ki pa chita nan reyinyon moun k’ap derespekte Bondye yo;

men se nan lalwa Granmèt la volonte 1’ ye. R

L’ap tankou yon pye bwa ki plante sou bò dlo k’ap kouri, k’ap bay fwi 1’ nan sezon 1’;

fèy li pap tonbe, tou sa 1’ap fè ap reyisi.R

Se pa konsa pou mechan yo, se pa konsa, men y’ap tankou pousyè van ap voltije.

Sèke Granmèt la konnen wout moun kòrèk yo, men chemen moun pechè yo ap peri.R

LEVANJIL

“Madichon pou nou, farizyen yo! ni nou menm tou pwofesè lalwa yo, madichon !”

MEN BÒN NOUVÈL JEZIKRI A DAPRÈ LIK KI SEN 11, 42- 46

Lè sa a: Granmèt la di: “Madichon pou nou, farizyen yo, paske nou bay ladim sou mant la ak chou a, ak tout kalite legim, men nou dezobeyi jijman an ak charite Bondye a! Se pou nou te fè bagay sa yo, men nou pat dwe neglije lòt yo. Madichon pou nou, farizyen yo, paske nou renmen premye chèz yo nan kay reyinyon yo avèk bèl bonjou sou laplas! Madichon pou nou, paske nou tankou tonb yo pa wè, moun yo ap mache sou yo san yo pa konnen!” Youn nan profesè lalwa yo reponn, li di 1’: “Mèt, lè w’ di sa a, ou fè nou afron tou”. Li di 1’:“Nou menm tou pwofesè lalwa yo, madichon, paske nou mete chaj ki lou sou do moun yo, bagay yo pa kapab pote, epi nou menm menm ak yon ti dwèt nou nou p'ap touche pakèt yo!”

An nou fè lwanj ak konpliman pou pawòl Bondye a.

REFLEKSYON: Jodi a Legliz la ap fete fèt Sen Inyas d’Antyòch, yon gwo potorik gason kite sèvi Legliz la kòm evèk nan peyi Wòm. Evèk sa a te mouri mati nan lane (+107) nan lite pou defann lafwa li, lafwa Legliz katolik. Sen Inyas se yon gwo ekzanp pou nou tout kretyen batize nan fason n’ap fè volonte Bondye nan lavi nou.

An nou mande Bondye nan okazyon fèt Sen Inyas la, pou li toujou kenbe nou dyanm’ nan lavi lafwa menm jan li te fè ak gwo gason sa a. Konsa nou kapab rive temwen Wayòm syèl la. Levanjil nou proklame jodi a ede nou konprann pi byen toujou ke si nou vle rive sen, nou pa kapab kontinye viv nan ipokrizi. Jezi di: Malè pou ipokrit yo. Malè pou ou frè m’ ak sè m’ si ou se yon ipokrit. Jezi pa mache ak ipokrit. Jezi renmen moun ki gen kè yo pwòp, moun ki viv nan laverite, moun ki jwenn kè kontan ak lajwa nan sèvis li a. Jezi te toujou ap diskite ap farizyen yo paske yo pa t’ viv nan laverite. Yo toujou ap di men yo pa janm  fè. Yo toujou ap defann lalwa men yo pa gen Bondye nan lavi yo.

An nou mande Bondye lagras k’ap ede nou viv jan li vle a pou nou kapab fè volonte li pi plis nan lavi nou, tout kote nou pase epi pataje renmen li gen pou nou ak tout frè ak sè nou yo. Amèn. 

LAPRIYÈ: Bondye Papa, fè m’ gen yon kè sensè pou m’ kapab sèvi w’ nan fason ki fè w’ plezi.

PWOPOZISYON: M’ap eseye viv ak plis senserite ak moun m’ap frekante chak jou, pou mwen ka gen yon relasyon konfyans ak yo.