DIMANCH 4-11-2018

Koulè Vèt.

TRANTEYINYEM DIMANCH  ÒDINЀ, ANE B.

PREMYE LEKTI

“Koute, Izrayèl : Se pou ou renmen Granmèt la ak tout kè ou”.

NAN  LIV DETEWONÒM 6,2-6

Jou sa yo :

Moyiz pale ak pèp la, li di : “Se pou w’ respekte Granmèt la Bondye w’ la, pou ou kenbe tout kòmandman 1’ yo ak lòd li yo mwen pase ou, ou menm ak pitit ou yo, ak desandans ou yo,  pou tout tan w’ap viv, pou ou kapab viv lontan.

Koute, Izrayèl, obsève, pou ou kapab fè sa Granmèt la kòmande w’ yo, sa ap bon pou ou, w’ap vin anpil, jan Granmèt la Bondye nou ak Bondye zansèt ou yo pwomèt ou a, nan peyi kote se lèt ak myèl k’ap koule a.

Koute, Izrayèl : Granmèt la Bondye nou an se yon sèl Granmèt la. Se pou ou renmen Granmèt la, Bondye w’ la ak tout kè ou ak tout nanm ou, ak tout fòs ou. Se pou pawòl sa yo mwen komande ou jodi a, ret nan kè ou”.

Pawòl Granmèt la.

SÒM REPONS: 17, 2-3a. 3bc-4. 47.51a

R/Mwen renmen ou, Granmèt, ou menm ki fòs mwen.

Mwen renmen ou, Granmèt, ou menm ki fòs mwen,

Granmèt, fondasyon m’ak kachèt mwen, ou menm k’ap delivre m’. R.

Bondye mwen, sekou m’, se nan li m’ap espere, pwoteksyon m’,

kòn delivrans mwen, li menm k’ap soutni m’.

M’ap fè lwanj Granmèt la, 1’ap sove m’anba men lènmi 1’ yo. R.

Viv Granmèt la, konpliman pou sila a k’ap pote m’ sekou a,

lwanj pou Bondye delivrans mwen an, li fè wa 1’ la ranpòte gran laviktwa,

li fè kè 1’ sansib pou Kris li a. R.

DEZYÈM LEKTI

“Paske li dire tout tan, li gen yon wòl prèt ki la tout tan”

NAN LÈT POU EBRE YO : 7, 23-28

Frè m’ yo :

Gen anpil prèt nan lansyen Testaman an, paske lanmò a te anpeche yo dire; sila a menm, paske li dire pou tout tan, li gen yon wòl prèt ki la tout tan; se pousa se tout tan li kapab sove moun yo ki pwoche kot Bondye pa lantremiz li yo, antan 1’ vivan tout tan pou 1’ lapriyè pou nou.

Se mód jan prèt an chèf sa a menm nou te bezwen, ki sen, ki inosan, ki pa gen tach, ki separe sot nan moun pechè yo, ki anwo nèt nan syèl la, ki pa bezwen komanse ofri sakrifis pou pwòp peche pa 1’ chak jou tankou prèt yo, apre  sa pou pèp la; li fè sa deja yon sèl fwa antan 1’ ofri pwòp tèt li.

Reyèlman vre se moun yo ki gen feblès yo lalwa a enstale kòm prèt; men pawòl sèman an, ki vin apre lalwa a, se Pitit la li enstale, li menm ki kòrèk nèt pou tout tan an.

Pawòl Granmèt la.

LEVANJIL

“Sa a se premye kòmandman an. Dezyèm nan sanble ak li”.

MEN BÒN NOUVÈL JEZIKRI A DAPRÈ MAK KI SEN 12, 28b- 34

Lè sa a :

Youn nan pwofesè yo pwoche kot Jezi, li poze 1’ kesyon kilès ki premye nan tout kòmandman yo ? Jezi reponn li : “Premye nan tout kòmandman yo, se : ‘Koute, Izrayèl : Granmèt la Bondye w’ la se yon sèl Bondye a. Epi se pou ou renmen Granmèt la Bondye ou la ak tout kè ou, ak tout nanm ou, ak tout lespri ou epi ak tout fòs ou’. Sa a se premye kòmandman an. Dezyèm nan sanble ak li : ‘Se pou  ou renmen pwochen ou tankou ou menm’. Pa gen lòt kòmandman ki pi gran pase sa yo”.

Pwofesè a di 1’: “Se byen, Mèt, ou gen rezon di se yon sèl Bondye a, epi pa gen lòt andeyò 1’, epi se pou yon moun renmen 1’ ak tout kè 1’, ak tout entelijans li, ak tout nanm li, epi ak tout fòs li; epi renmen pwochen ou tankou pwòp tèt ou, sa pi gran pase tout kalite sakrifis antye ak kado yo”.

Jezi menm wè li te reponn ak bon konprann, li di 1’: “Ou pa lwen peyi kote Bondye wa a”. Epi pèsonn pa t’ janm pran chans poze 1’ kesyon ankò.

An nou fè lwanj ak konpliman pou Pawòl Bondye a.

REFLEKSYON: Nan premye lekti a, nan Liv Detewonòm nan, nou jwenn kòmandman Bondye, sa vle di Bondye ki bay lòd, lòd sa yo se pou nou menm k’ap viv nan tan sa tou koulye a.

Menm lè lòm ap chache, li dwe konnen se Bondye k’ap chèche l’an premye, menm jan l’ te fè Abraam konnen l’, menm jan l’ te konfye Moyiz konnen kilès li ye pou li ka transmèt sa Bondye vle bay wa Farawon an epi bay pèp Izrayèl la. Vrè kè kontan pèp la, vrè delivrans li chita nan obsève sa Bondye mande.

Kòmandman yo se yon gid pou pèp la, pou l’pa tonbe nan pyèj sosyete kote l’ap viv la, kote l’ap travay la. Lwa sa yo pa yon zouti ki pou anpeche Pèp la jwi lavi l’ men pou l’ kapab jwenn vrè kè kontan sa a Bondye vle pou li a.

Prensip sa yo dwe grave nan zantray pèp la, pou l’ transmèt li bay pitit li ak pitit pitit li yo pou yo kapab jwi kè kontan. Viv daprè prensip Granmèt la, se montre renmen ak respè nou genyen pou Bondye li menm menm epi konfyans nou fè li, nan vle l’ vle sa ki byen pou nou.

Nan dezyèm lekti a, nan liv Ebre a nou jwenn Jezi kòm Pè ki anlè tout pè yo : li ofri lavi l’ kòm sakrifis pou sove tout moun.

Nou dekouvri feblès lòt pè yo ki te gen pou yo mande padon pou peche yo epi padon pou peche pèp la, sa vle di yo te peche menm jan ak tout moun.

Nan Jezi, li vin libere n’anba pouvwa peche a pou n’ kapab viv nan jistis la. Jistis la se renmen an. Se Jezi ki te vin montre limanite yon sèl reyalite, viv nan renmen an. Li se sila a ki montre n’ kòman nou dwe viv renmen an tout bon. Pyès moun pa ka di l’ renmen yon lòt si l’ pa prèt pou fè sakrifis ki nesesè pou li. Se sa Jezi fè sou lakwa, se sa l’envite tout moun ki renmen fè, prèt pou pataje sa w’ye, tan w’, sa w’ genyen pou lòt yo ka viv pi byen.

Nan sakrifis Jezi a nou dekouvri renmen e nou dekouvri Pawòl Bondye a ki se yon reyalite ki pa janm chanje.Viv kòmandman yo se renmen Bondye. Jezi montre l’ renmen Bondye pandan l’ fè jous nan bout sa li vle a. Se yon bèl egzanp pou nou menm kretyen sou latè. Nou dwe rive fè rankont renmen sa a ak Bondye nan Kris la epi kite fòs renemn Bondye a mennen lavi nou nan aksepte fè sa k’ byen nan je Bondye.

Nan levanjil la, nou retounen yon lòt fwa sou menm kesyon kòmandman Bondye yo. Yon Mèt lalwa nan relijyon jwif la poze Jezi kesyon sou kòmandman ki pi gran an… Jezi pral reponn ak menm pawòl nou te jwenn nan Liv Detewonòm nan: Koute Izrayèl, Bondye w’ la se li ki sèl Bondye, ou dwe pou w’ renmen l’ak tout kè w’, ak tout nanm ou ak tout entelijans ou. Men renmen Bondye a se youn, men renmen pwochen an se yon lòt koze ki enpòtan tou. Gen yon bagay ki plis atire atansyon m’lè mèt Lalwa a reprann pawòl sa yo epi kote l’ li ajoute renmen pwochen an pi enpòtan ke nenpòt sakrifis.

Jezi di l’ ke li pa lwen Wayòm Bondye a… Li pa di l’ li nan wayòm nan non, paske Viv nan wayòm Bondye a se pa konnen sa Bondye di yo men se viv sa Bondye mande yo. Se pou chak jès, pawòl, panse n’yo chita sou chèche n’ap chèche viv Pawòl Bondye a pou n’ ka rive jwi vrè kè kontan ak kè poze li rezève pou nou an. Amèn.

LAPRIYÈ: Granmèt, se pou tout lavi nou tounen yon temwayaj renmen tout bon vre a.

Pa pouvwa Jezikri. Amèn.

PWOPOZISYON: M’ap reflechi sou kòman m’ viv kòmandman Bondye a nan lavi mwen.