LENDI 12-11-2018

Koulè Wouj.

SEN JOZAFA, EVèK E MATI.

Memwa

PREMYE LEKTI

«Enstale prèt yo, jan m’ te kòmande ou la».

KÒMANSMAN LÈT APOT PÒL KI SEN, POU TIT 1, 1-9

Pòl, sèvitè Bondye, apot Jezikri daprè lafwa sa yo Bondye chwazi a ak konesans verite a ki regle sou bon relasyon ak Bondye a, pou esperans lavi tout tan an. Lavi sa a, Bondye ki pa konn bay manti a, te pwomèt li depi anvan syèk tan yo; men, nan tan l’ yo, li montre pawòl li a nan prèch yo te konfye m’ fè a, daprè lòd Sovè nou Bondye. M’ekri ou, Tit, pitit mwen renmen an daprè lafwa nou genyen ansanm nan. Gras ak lapè sot nan Bondye Papa a ak nan Jezikri Sovè nou an.

Men poukisa mwen te kite ou nan zile Krèt: pou ou drese bagay k’ap devye yo, pou ou enstale prèt yo nan vil yo, jan m’ te fè pou ou a.Yo chak dwe yon moun san repwòch, mari yon sèl madanm, li dwe gen pitit ki gen lafwa, san moun pa akize yo poutèt yo nan dezòd oubyen yo nan rebèl.

Responsab Legliz la dwe san repwòch reyèlman, tankou moun Bondye mete pou transmèt gras li, san l’ pa fè awogan, san l’ pa renmen fè kòlè, san l’ pa renmen bwason, san l’ pa renmen batay, san l’ pa anvi avantaj malonnèt; men se pou l’ renmen resevwa moun lakay li, pou l’ gen bon jan, pou l’ konn kenbe tèt li anplas, pou l’ kòrèk, pou l’ sen, pou l’ frennen tandans plezi chè a, pou l’ kenbe mesaj verite a byen fèm daprè ansèyman an, pou l’ kapab ankouraje moun nan ansèyman ki dwat, pou l’ kapab demanti sa yo k’ap kontrarye pawòl la.

Pawòl Granmèt la.

SÒM REPONS 23, 1-2. 3-4ab. 5-6 (r.: cf. 6)

R/ Sa a, se ras moun k’ap chèche fas ou, Granmèt.

Pou Granmèt la tè a ak sa k’ plen l’, fas tè a ak sa k’ abite ladan l’.

Sèke se li menm ki poze l’ sou lanmè yo, ki rann li solid sou gran rivyè yo.R.

Kilès k’ap monte sou mòn Granmèt la, oubyen kilès k’ap kanpe sou plas li ki sen an?

Moun ki gen men l’ inosan ak kè l’ nèt, ki pa nonmen non l’ pou granmèsi.R.

Moun sa a ap resevwa benediksyon nan men Granmèt la ak sa k’ fè moun vin kòrèk la nan men Bondye sovè l’ la.

Sa a se ras moun k’ap chèche l’ yo, k’ap chèche fas Bondye Jakòb la.R.

LEVANJIL

«Si sèt fwa nan menm jounen an li tounen kote ou, li di: «Mwen regrèt», se pou ou padonnen li».

MEN BÒN NOUVÈL JEZIKRI A DAPRÈ SEN LIK 17, 1-6

Lè sa a: Jezi di disip li yo:

«Sa pa posib pou nan pwen okazyon peche: sèlman madichon pou moun sa a ki sèvi okazyon pou fè lòt yo tonbe nan peche a! Li ta pi bon pou li, si yo ta pran yon wòch moulen, yo mare nan kou l’, epi yo jete l’ nan lanmè, pase pou l’ ta fè youn nan ti piti sa yo tonbe nan peche.

Pran prekosyon. Si frè ou fè peche kont ou, reprann li, epi si l’ regrèt, se pou ou padonnen l’; menm si se sèt fwa nan menm jounen an li fè peche kont ou, epi sèt fwa nan jounen an li tounen kote ou, li di: «Mwen regrèt», se pou ou padonnen li».

Apot yo di Granmèt la: «Fè nou gen plis lafwa».

Granmèt la di: «Si nou ta gen lafwa tankou yon grenn senve, nou ta di gwo pye bwa sa a: «Derasinen ou epi al plante nan lanmè a»; li ta obeyi nou».

An nou fè lwanj ak konpliman pou pawòl Bondye a.

REFLEKSYON: «Yo chak dwe yon moun san repwòch, mari yon sèl madanm, li dwe gen pitit ki gen lafwa, san moun pa akize yo poutèt yo nan dezòd oubyen yo nan rebèl ».

Frè ak sè m’ yo, nan lèt Pòl ekri moun Tit yo, li mete aksan sou responsablite moun ki nan Legliz la genyen. Li touche aspè fidelite nan fanmi an, kote mari dwe gen yon sèl madanm, li dwe san repwòch, kote pou yo edike timoun yo nan lafwa, pou yo pa tonbe nan sa ki mal.

Nou dwe gade reyalite fanmi nou yo jodi a, kote nou neglije tout bagay, kote anpil fwa mesye yo maltrete madanm yo ak move pawòl, ak zak vyolans, ki menm lakoz lanmò yo. Lè timoun yo pa sou bon chemen an, sa pa vle di yo te fèt pou yo pa bon, lè nou pran pasyans pou korije yo, sa se yon temwayaj mizerikòd. 

Pafwa se medam yo ki manman e ki papa tou; men anpil fwa tou medam yo konn pa pran responsabilite yo. Sitiyasyon sa a vin mete fanmi yo tèt anba, kote timoun yo fè sa yo vle nan sosyete a, yo lage kò yo nan tout koze ki mete dlo nan je paran yo ak nan je sosyete a.

Jodi a nou dwe gade tou si anpil fwa kòm paran, kòm zanmi, kòm vwazen, kòm fanmi, nou pa lakòz timoun sa yo pran move direksyon. Èske nou pa lakòz moun sa yon tonbe nan peche a epi aprè sa nou kritike yo oubyen kondane yo. Jezi ap di nou jodi a  madichon pou nou ki lakòz lòt yo tonbe nan peche a. Pase pou nou  lakoz lòt yo tonbe nan peche a, li ta pi bon pou yo mare yon wòch moulen nan kou nou pou yo jete nou nan lanmè.

Donk, Jezi vle fè nou konprann nou gen yon gwo responsablite anvè lòt yo, pou nou pwoteje yo pou yo pa tonbe nan sa ki mal, nan sa ki fè kominote nou yo soufri. Konsa tou, nou dwe gen kè sansib pou yo tou lè yo fè yon bagay ki pa bon. Depi yo rekonèt sa yo fè a nou dwe louvri kè nou, nou dwe louvri bra nou pou nou akeyi yo epi padone yo. Nou dwe padone lòt yo jiskaske nou pa kapab ankò, 7 fwa 77 fwa 7 fwa. Mizerikòd nou dwe san limit, paske anpil fwa nou ofanse Bondye men li pa gade sou sa nou fè, li gen kè sansib pou nou.

Frè ak sè m’ yo, ann mande Bondye Granmèt la pou l’ede nou padone menm janm li padone nou, mande l’ pou l’ pou l’ fè fanmi nou yo rete kole sou li, li menm ki se Bondye kè poze a. Amèn

LAPRIYÈ:Bondye Papa, tanpri, fè fanmi nou yo vin tounen kominote padon kote se renmen ki baz lavi nou. Pa pouvwa Jezikri. Amèn

PWOPOZISYON: An nou libere moun ki prizonye nan kè nou, pou montre lanmou Bondye pi pò pase rayisman.