DIMANCH 17-2-2019

Koulè Vèt.

SIZYÈM DIMANCH ÒDINÈ, ANE C.

PREMYE LEKTI

"Ala malè pou moun ki met konfyans nan moun;  ala kontantman pou moun ki met konfyans nan Granmèt la".

LEKTI LIV PWOFÈT JEREMI 17, 5-8

Men pawòl Granmèt la:

"Ala malè pou moun ki mèt konfyans nan moun, ki fè yon chè sèvi kòm bra l’, epi ki fè kè l’ rekile lwen Granmèt la. L’ap tankou yon bayawonn nan dezè, li p’ap wè klè byen an ap rive; men l’ap abite nan kote ki sèk nan dezè, nan yon tè sale, kote moun pa abite.

Ala kontantman pou moun ki met konfyans nan Granmèt la, ki met esperans li nan Granmèt la, l’ap tankou yon pye bwa yo transplante sou bò dlo yo, ki plonje rasin li yo nan frechè, li p’ap pè lè chalè a ap rive: fèy li ap ret vèt, nan tan sechrès la li p’ap nan tèt chaje, li p’ap janm manke donnen fui".

Pawòl Granmèt la.

SÒM REPONS 1, 1-2. 3. 4 é 6 (r.: Ps 39, 5c)

R/ Ala kontantman pou moun ki mèt Granmèt la kòm esperans li.

Ala kontantman pou moun ki pa ale nan reyinyon moun ki pa krenn Bondye yo,

ki pa kanpe nan chemen pechè yo,

ki pa chita nan gwoup moun k’ap pase lalwa a nan jwèt yo;

men se nan lalwa Granmèt la volonte l’ ye,

se nan lalwa l’ la l’ap medite lajounen kon lannuit.R.

L’ap tankou yon pye bwa ki plante sou bò kouran dlo,

k’ap donnen fui l’ nan tan li;

li p’ap pèdi fèy li, tout sa l’ap fè ap reyisi.R.

Se pa konsa pou moun ki pa krenn Bondye yo, se pa konsa,

men y’ap tankou pousyè van ap voye jete.

Sèke Granmèt la konnen chemen moun kòrèk yo,

men wout moun ki pa kòrèk yo ap peri.R.

DEZYÈM LEKTI

"Si Jezikri pa resisite, lafwa nou pa vo anyen".

LEKTI PREMYE LÈT APOT PÒL KI SEN, POU KORENTYEN YO 15, 12,16-20

Frè m’ yo:

Si y’ap preche Jezikri resisite sot nan pami mò yo, kòman fè gen moun ki di nan pami nou, pa gen kesyon rezireksyon mò yo?

Vrèman, si pa gen rezireksyon mò yo, Jezikri pa resisite non plis tou. Si Jezikri pa resisite, lafwa nou pa vo anyen; nou nan peche nou toujou. Konsa moun k’ap dòmi nan Jezikri yo, yo peri. Si se pou lavi sa a sèlman n’ap espere nan Jezikri, nou pi mezerab pase tout moun.

Koulye a Jezikri resisite sot nan pami mò yo, premye fui nan pami sa k’ t’ap dòmi yo.

Pawòl Granmèt la.

LÉVANJIL

"Ala kontantman pou pòv yo. Ala malè pou nou, rich yo" !

MEN BON NOUVEL JEZIKRI A DAPRE  SEN LIK 6, 17. 20-26

Lè sa a:

Jezi desann avèk douz yo, li rete yon kote ki gen anpil pye bwa, ansanm ak foul disip li yo, ak anpil pakèt foul moun ki sot nan tout Jide, Jerizalèm, nan rejyon bò lanmè a, Tir ak Sidon.

Li leve je sou disip li yo, li t’ap di: "Ala kontantman pou pòv yo, paske peyi-wa Bondye a, li pou nou.

Ala kontantman pou nou menm ki grangou koulye a, paske n’ap konble.

Ala kontantman pou nou menm k’ap kriye, paske n’ap ri.

Ala kontantman pou nou, lè moun yo ap rayi nou, lè y’ap eskominye nou, lè y’ap joure nou, lè y’ap rejte non nou tankou bagay ki move, akoz Pitit moun nan. Fè kè nou kontan jou sa a, danse: sèke men rekonpans nou anpil nan syèl la; se konsa papa yo te aji ak pwofèt yo.

Sèlman ala malè pou nou, nou menm ki rich yo, paske nou gen konsolasyon nou!

Ala malè pou nou, nou menm ki konble, paske n’ap grangou!

Ala malè pou nou, nou menm k’ap ri koulye a, paske n’ap gen lapenn, n’ap kriye!

Ala malè pou nou, lè moun yo ap fè konpliman pou nou ! Se konsa papa yo te aji avèk fo-pwofèt yo".

An nou fè lwanj ak konpliman pou pawòl Bondye.

▬ REFLEKSYON ▬

Te gen yon nèg rich ki t’ap viv nan yon bèl kay, li te antoure ak anpil pye bwa, anpil frechè. Men li te gen yon gran vid nan lavi li. Li pa t’ gen lafwa e li t’ap viv pou kont li ak anpil richès (sa vle di, anpil byen materyèl).

Te gen yon nèg ki ki te rele Jan, se te gadò bèf nèg pou nèg ki te pi rich nan zòn nan. Jan t’ap viv ak fanmi li nan yon kay ki trè senp, li te yon kwayan, li te konn lapriyè ansanm ak fanmi li e yo te konn ale legliz ansanm.

Yon maten, nèg rich la t’ap kontanple tè li yo e li di: Tout sa yo se pou mwen.

Nan menm moman sa a, gadò bèf la rive epi li di nèg rich la: yèswa mwen te fè yon rèv e Granmèt la di mwen nèg ki pi rich nan zòn nan pral mouri nan mitan nuit la. Mwen oblije di w’ sa, mwen espere ou p’ap fache pou sa.

Pa fatige w’, mwen pa kwè nan rèv, retounen nan travay ou, epi bliye koze sa a.

Nèg rich la te kòmanse panike epi li al wè doktè pou evalye sante li. Medsen an te di li li anfòm epi li te rete anpil lòt ane pou viv.

Nèg rich la santi yon ti soulajman men li santi li yon ti jan panike toujou akoz li te gen dout. Li envite doktè a vin soupe lakay li epi li mande li rete ak li jiska mitan nuit la.

Lè mitan nuit la fin pase, li voye doktè a ale epi li di tèt li: nèg sòt sa yo rele Jan an fè m’ pase yon move jounen, li menm ak rèv madichon li yo.

Li te fèk kouche lè sonèt kay la sonnen. Li te minui trant (12:30). Lè li desann eskalye a, li rankontre pitit fi Jan an nan pòt la.

Avèk dlo nan je li, li di mesye a: manman m’ voye m’ vin di ou papa m’ mouri nan mitan nuit la.

Mesye a sezi, li rete san pale e tousuit li konprann nèg ki te pi rich nan zòn nan se pa t’ li menm men se te gadò bèf la.

Kilès ki pi rich e ki gen plis kè kontan nan mitan nou?

Bondye pa wè bagay yo menm jan ak nou.

Bondye pa jije moun menm jan ak nou.

Epitou, menm Jezi ki di nou jodi a se chans pou nou an, se li menm tou ki di nou «malè pou nou…»

Levanjil la n’ap pwoklame a se yon bon nouvèl, se ‘‘fòs delivrans pou moun ki kwè nan li’’, se sous benediksyon ak kè kontan. Se levanjil ki pote chans la.

Kisa kè kontan an ye pou ou menm oubyen pou mwen menm?

Mwen ta gen kè kontan si mwen te gen bon jan lasante menm kansè sa a ap touye mwen.

Mwen ta gen kè kontan si m’ te gen anpil lajan mena k salè mizè sa a…

Mwen ta gen kè kontan si fanm sa a te renmen mwen men mwen pèdi rèv sa a.

Mwen ta gen kè kontan si pitit mwen sa yo te kite fimen dwòg e bwè alkòl…

Mwen ta gen kè kontan si mwen te gen yon bon travay…

Pou nou menm, kè kontan an se zafè chans, lajan, siksè, lasante…

La felicidad siempre la tiene otro, no yo, está en la televisión, no en mi casa, está fuera de mi, nunca dentro de mi.

Kè kontan an, lòt la toujou genyen li, mwen menm mwen pa genyen l’, li nan televizyon an, li pa lakay mwen, li toujou deyò mwen, li pa janm anndan mwen.

Jezi envite nou gade lavi a, viv li ak je Bondye. Pou Bondye, kè kontan an se yon afè chwa (sa depan de sa ou chwazi).

Byen chwazi se chwazi Jezi.

Byen chwazi se chwazi lespri Jezi.

Byen chwazi se chwazi kè kontan Jezi oubyen tristès Jezi.

Jezi, depi nan mizè krèch Bètleyèm nan pou rive nan pobrete lakwa a, li se Mesi a, Bon gadò pòv yo, sila yo ki gen dlo nan je yo ak sila yo k’ap sibi pèsekisyon.

Jezi se sèl chwa nou, se sèl kè kontan nou.

Rich yo gen lajan, yo gen moun k’ap ba yo sekirite, pa manke aliman sou tab yo, yo gen foto yo nan laprès, elatriye. Yo gen tout bagay. Kisa pou yo fè Bondye?

Yo deja genyen kè kontan yo isit la kounye a. Yo deja genyen towo ki fèt ak lò a, «bondye yo».

Nou se yon pèp ki senp men ki gen kè kontan paske nou byen chwazi.

Nou vini pou nou kite Bondye beni nou e chanje kè nou, pou nou apiye nou sou richès Jezi a.

Aprè de mil an (2000 an), li toujou fasil pou nou konprann diskou Jezi a.

Lanvi sa a nou genyen pou nou pran tout bagay pou nou sèl la, se li menm ki cheni anndan nou k’ap kale pitit e ki ka fè nou pèdi.

Lòm nan pa kontan li ak sa li genyen, epi li pa dakò soufri, li vle posede tout bagay. Men se Bondye sèl ki kapab ranpli lòm nan.

Posede tout, genyen tout. Se pousa kè kontan an se yon kesyon chwa: chwazi Bondye se chwazi tout, tout kè kontan isit la ak laba a.

LAPRIYE: Bondye, tanpri ede nou chwazi w’ chak nou nan lavi nou. Konsa nou p’ap manke anyen. Pa pouvwa Jezikri. Amèn

PWOPOZISYON: Kisa kè kontan an ye pou ou menm oubyen pou mwen menm?