MADI 5-2-2019

Koulè Blan.

AGAT KI SEN.

PREMYE LEKTI

"Avèk pasyans, se pou nou kouri nan batay la ki pare pou nou an".

NAN LÈT POU EBRE YO 12, 1-4

Frè m’ yo:

Nou menm ki gen yon si gran kanti­te nyaj temwen, se pou nou lage tout chay ak peche k’ap anbarase nou, pou nou kouri avèk pasyans nan ba­tay la ki pare pou nou an, antan n’ap gade lotè lafwa nou an, Jezikri ki fè lafwa a vin kòrèk nèt la, li menm, yo te prezante kè kontan devan l’, men li te sipòte lakwa a, li te meprize wont la, li chita adwat Bondye.

Sonje sa a ki te sipòte kontraryete pechè yo te drese kont li a, pou nou pa kite feblès pran nanm nou. Nou pa ko reziste ankò jous nan san, antan n’ap batay kont peche a.

Pawòl Granmèt la.

SÒM REPONS 21, 26b-27. 28 e 30. 31-32

R/ Y’ap fè lwanj ou, Granmèt, sa yo k’ap chèche w’ la.

M’ap regle sa m’ te pwomèt yo de­van moun ki krenn li.

Se pou pòv yo manje, se pou yo gen vant plen,

y’ap fè lwanj Granmèt la, sa yo k’ap chè­che l’yo.

"Se pou kè yo viv pou tout tan gen tan".R.

Y’ap sonje, y’ap tounen kot Gran­mèt la tout limit tè a,

y’ap adore de­van l’ tout fanmi nasyon yo.

Paske peyi wa a se pou Granmèt la, l’ap kòmande nasyon yo.

Se li menm sèl y’ap adore, tout sa k’ap dòmi nan tè a.R.

Nanm mwen ap viv pou li, ras mwen ap sèvi l’.

Y’ap pale osijè Granmèt la bay jenerasyon k’ap vini an,

y’ap anonse jistis li a bay pèp la k’ap fèt la:

"Se bagay sa yo Granmèt la te fè".R.

LEVANJIL

"Ti fi, mwen di ou, leve".

MEN BÒN NOUVÈL JEZIKRI A DAPRÈ MAK KI SEN 5, 21- 43

Lè sa a:

Kòm Jezi te travèse ankò nan bati­man an lòt bò lanmè a, gen yon gran foul ki vini jwenn li; li te bò lanmè a. Gen youn nan chèf sinagòg yo ki rive, yo te rele l’ Jayi; lè l’ wè l’, li tonbe nan pye l’; li t’ap priye l’anpil, li t’ap di: "Pitit fi m’ nan prèske mou­ri; vini, poze men sou li, pou l’ kapab sove, pou l’ viv". L’ale avèk li, yon gran foul moun t’ap suiv li, yo t’ap kraze l’.

Gen yon madanm, ki t’ap pèdi san depi douzan, li te deja konsilte anpil doktè ki te preskri l’anpil remèd, li te fin depanse tout richès li, men li pa t’ jwenn okenn rezilta, okontrè se pi mal li t’ap vin pi mal; lè l’ tande pale osijè Jezi, li vin nan foul la, dèyè, li touche rad li. Li t’ap di: Si o mwen mwen touche rad li, m’ap sove". Menm lè a sous san l’ nan tari, li santi nan kò l’ li te geri sot nan maladi a.

Menm lè a Jezi rekonèt anndan l’ gen yon fòs ki te sòti nan li, li vire kot foul la, li t’ap di: "Kilès ki touche rad mwen an"? Disip li yo t’ap di: "Ou wè foul la k’ap kraze ou, epi w’ap di:

"Kilès ki touche m’"? Men li vire pou l’ wè madanm nan ki te fè bagay sa a. Madanm nan menm te pè, li t’ap tranble, li te konnen sa k’ te pase nan li, li vini, li lage kò l’ devan l’, li di l’ tout verite a. Li menm menm li di l’: "Mafi, lafwa ou sove ou; ale ak lapè, se pou ou geri sot nan maladi w’ la".

Pandan li t’ap pale toujou, moun yo vin kot chèf sinagòg la, yo di: "Ti fi w’ la mouri; pouki sa w’ap trakase Mèt la"? Jezi menm, lè l’ tande pawòl yo te di a, li di chèf sinagòg la: 'Pa pè; se pou ou kwè sèlman". Li pa pèmèt pèsòn suiv li, sof Pyè, Jak avèk Jan, frè Jak la.

Yo rive nan kay chèf sinagòg la, kote li wè gen bwi, moun k’ap kri­ye, k’ap rele anpil. Li antre, li di yo: "Poukisa nou twouble, n’ap kriye? ti fi a pa mouri, se dòmi l’ap dòmi". Yo t’ap pase l’ nan jwèt.

Li menm menm, li mete tout moun deyò, li pran papa ak manman ti fi a epi moun yo ki te avèk li a; li antre kote ti fi a te kouche a. Li kenbe men ti fi a, li di l’: "Talita, koumi"; sa vle di: "Ti fi, mwen di ou, leve". Menm lè a ti fi a leve, li t’ap mache (li te gen douzan); yo te sezi yon gran sezis­man. Li pase yo lòd sevè pou pèsonn pa konn sa; li di pou yo ba l’ manje.

An nou fè lwanj ak konpliman pou pawòl Bondye a.

▬ REFLEKSYON ▬

Jodi a, Legliz la ap sonje Agat ki sen, yon jèn fi ki t’ap viv nan peyi Sisil, ki te mete tout lavi li nan sèvis Granmèt la. Se konsa li te mouri nan tan pèsekisyon an, nan lane 251 aprè Jezikri.

  Anpil fwa nan lavi nou kòm patizan Jezikri, nou chache ti konfò nou e nou pa bay temwayaj, nou pase lwen angajman nou kòm pwofèt, paske nou pa vle pèsonn lonje dwèt sou nou, nou pè sosyete a, oubyen nou pa vle pèdi avantaj mond la ofri nou.

Nan Levanjil la nou wè Jezi, Pitit Bondye a k’ap aji, li vini pou l’ sove tout moun anba peche a, anba maladi kò­porèl ak espirityèl, li leve yon jèn fi ki mouri. Nan kalite aksyon sa a, Jezi montre li se sila ki sòti nan Bondye a, li se Bondye tout bon vre a. Nan sans sa a tou, Jezi montre nou kòman nou dwe chache dekouvri soufrans ak pwoblèm moun yo pou n’ pote delivrans pou yo. Men se pa pou kont nou n’ap fè bagay sa yo, paske pa janm gen kretyen ki travay pou kont li. Nou fèt pou n’ viv chak jou ak konviksyon ke Jezi Pitit Bondye a vivan epi li nan nou menm. Nou fèt pou n’ viv nan lafwa n’, se lafwa sa a ki fè n’ chèche konnen volonte Bondye nan lavi nou.

Menm jan ak fanm ki t’ap pèdi san an, fòk nou mete konfyans nou nan Jezi k’ap viv nan mitan nou, pou n’ konnen l’ kapab rezoud anpil pwoblèm nan sosyete nou an ki san­ble pa gen solisyon. Nan Jezi tout bagay posib, menm moun ki mouri kapab reviv. Konfyans nou nan Bondye kapab ede nou chanje anpil bagay nan sosyete a.

Se pou nouvo ane sa a ede n’ reflechi sou pwòp sans angajman n’ak Bondye pou n’ deside chak jou chanje sa k’ merite chanje epi travay nan tèt ansanm pou liberasyon komi­note n’ap viv la.

LAPRIYÈ: Granmèt, ou menm ki te ban n’ Jezi kòm frè, kòm bon zanmi, ede n’ poze aksyon ki ede moun viv, ki ede moun pwoche pi pre w’, ki ede n’ chanje reyalite lavi pèp nou an. Pa pouvwa Jezikri. Amèn

PWOPOZISYON: Pran yon jou pou vizite malad nan kominote kote w’ap viv la an gwoup, priye pou yo ak lafwa epi wè kisa n’ kapab fè pou n’ chanje kondisyon malad la.