MÈKREDI 27-2-2019

Koulè Vèt.

PREMYE LEKTI

"Moun yo ki renmen sajès la, Bondye renmen yo".

LEKTI LIV SIRASID 4, 12-22

Sajès la soufle lavi a nan pitit li yo, li resevwa sa a yo k’ap chèche l’ la, li mache devan yo nan wout jistis la. Moun ki renmen l’, li renmen lavi, moun k’ap veye kote l’, yo reyalize sa k’ fè l’ plezi.

Moun ki kenbe l’, y’ap eritye lavi a, kote l’antre, Bondye bay benediksyon. Moun k’ap sèvi l’, y’ap sèvi Sa a ki sen an, moun ki renmen l’, Bondye renmen yo. Moun ki koute l’, l’ap jije nasyon yo, moun k’ap fikse je l’ sou li, l’ap rete avèk asirans.

Si l’ fè l’ konfyans, l’ap eritye l’, pitit yo ap asire; paske nan tray k’ap eseye l’ la l’ap mache avèk li, l’ap chwazi l’ tou dabò. Se krent ak sezisman ak difikilte pou eseye l’ l’ap fè tonbe sou li, l’ap fè l’ pase mizè nan tray ansèyman l’ nan, joustan li eseye l’ nan panse l’ yo, li fè nam li konfyans.

L’ap asire l’, l’ap kondui chemen dirèk kote l’, l’ap fè kè l’ kontan, l’ap devwale l’ bagay li yo ki kache yo, l’ap ba l’ richès syans avèk entelijans jistis. Men si li pran chemen kwochi, l’ap kite l’, l’ap lage l’ nan men ènmi l’.

Pawòl Granmèt la.

SÒM REPONS 118, 165. 168. 171. 172. 174. 175

R/Anpil lapè pou sa yo ki renmen lalwa ou la, Granmèt.

Anpil lapè pou sa yo ki renmen lalwa w’ la, pou yo li pa sèvi baryè.R.

Mwen kenbe kòmandman ou yo ak temwayaj ou yo,

paske tout wout mwen yo devan fas ou.R.

Bouch mwen deklare kantik lè w’ap aprann mwen desizyon ou yo.R.

Lang mwen chante pwomès ou, paske tout lòd ou yo se jistis.R.

Mwen anvi delivrans ou a, Granmèt, lalwa ou la se plezi m’.R.

Se pou nam mwen viv, l’ap fè lwanj ou, jijman ou yo ap pote m’ sekou.R.

LEVANJIL

"Moun ki pa kont nou, se pou nou li ye".

MEN BòN NOUVÈL JEZIKRI A DAPRE SEN MAK 9,38-40

Lè sa a:

Jan reponn Jezi, li di: "Mèt, nou te wè yon mesye ki t’ap chase demon yo o non ou, se pa yon moun ki suiv nou, ebyen nou anpeche l’ sa".

Jezi menm di l’: "Pa anpeche l’ sa; sèke pa gen pèsonn ki kapab fè mèvèy o non m’, epi ki kapab pale mal osijè m’ tou suit apre sa. Moun ki pa kont nou, se pou nou li ye".

An nou fè lwanj ak konpliman pou Pawòl Bondye a.

▬ REFLEKSYON ▬

"Moun ki pa kont nou, se pou nou li ye".

Jodi a, n’ap gade kijan kèk moun t’ap fè bon zèv nan non Kris la, san yo pa t’ disip li. Sa te attire atansyon youn nan disip Jezi yo epi li di: «Mèt, nou te wè yon mesye ki t’ap chase demon yo o non ou, se pa yon moun ki suiv nou, ebyen nou anpeche l’ sa» (Mak 9, 38). Jezi di nou ki jan nou dwe gade moun sa yo: akeyi yo, fikse je nou sou yo, antan nou fè nou tou senp, antan nou pataje yon menm lafwa avèk yo, antan n’ap mache ansanm sou wout pèfeksyon lanmou Bondye a ak lanmou pwochen an.

Fason nou viv vokasyon nou kòm Legliz, sa envite nou gade fason n’ap viv, ak yon lespri ouvèti tankou Jezi.  Si gen lòt moun ki deranje nou akoz y’ap fè menm bagay ak nou, sa vle di nou poko akeyi renmen Bondye a nan kè nou. Fason n’ap viv dwe ankouraje lòt moun vin pi pre Bondye.

Se nan fason Jezi te viv senp tankou yon ti pòv li rive fè nou vin pi pre Bondye. Sen Jan Krizostòm di nou: «Jezi te santi sa te kont pou li te soufri e mouri sou kwa a; men li te vle pòv, etranje, touni, prizonye, malad, pou li te ka fè nou vini jwenn li». Si Granmèt la pa t’ rejete moun ki te viv vokasyon yo yon lòt jan nan Legliz la, nou menm tou an nou pa kite òpotinite sa pase.  "Moun ki pa kont nou, se pou nou li ye"(Mak 9, 40).

LAPRIYE : Bondye Papa, tanpri ede m’ konprann e valorize kapasite ak talan ou bay chak moun pou travay konstwiksyon Wayòm ou an kapab avanse. Pa pouvwa Jezikri.

PWOPOZISYON : Avan m’ kritike pwochen mwen, m’ap chèche konprann li.