MÈKREDI 28-8-2019

Koulè Vèt

OGUSTEN KI SEN, Evèk e Savan sakre Legliz la

(Memwa)

PREMYE LEKTI

"Lannuit ak lajounen n’ap travay pou nou preche levanjil la ba nou".

LEKTI PREMYE LÈT APOT PÒL KI SEN, POU TESALONISYEN YO 2, 9-13

Nou sonje, frè m’ yo, kijan nou travay, nou fatige kò nou: lannuit ak lajounen, nou t’ap travay, pou nou pa peze sou nou, pandan nou t’ap preche nou levanjil Bondye a. Nou temwen ansanm ak Bondye, kijan konduit nou te sen, kòrèk, san repwòch kote nou, nou menm ki kè a; nou konnen kijan nou te ye ak chak moun nan nou, tankou yon papa ak pitit li yo, antan n’ap lapriyè nou, n’ap konsole nou, pou nou mache kòrèk pou Bon- dye ki rele nou nan rèy li a ak nan bèlte l’ la.

Se pou sa nou menm nou di Bon- dye mèsi san rete, paske, lè nou resevwa pawòl Bondye a nou te tande nan bouch nou an, nou pa resevwa l’ tankou yon pawòl moun, men tankou sa li ye a vre, tankou pawòl Bondye a, li menm ki aji nan nou menm ki kwè yo.

Pawòl Granmèt la.

SÒM REPONS 138, 7-8. 9-10. ll-12a (r.: la)

R/Granmèt, ou sonde m’, ou konnen m’.

Ki kote pou m’ ale lwen lespri ou,

ki kote pou m’ sove kò m’ lwen fas ou?

Si m’ monte nan syèl, ou la; si m’ desann anba tè, ou prezan.R.

Si m’ pran zèl devan jou m’al abite nan fon lanmè,

menm la men ou ap kondui m’, men dwat ou ap kenbe m’.R.

Si m’ di: "Petèt fènwa yo ap fèmen m’, lannuit la ap sèl klète alantou m’".

Menm fènwa yo pa fènwa  devan ou, lannuit la ap klere tankou lajounen.R.

LEVANJIL

"Nou se pitit sila yo ki te touye pwofèt yo".

MEN BÒN NOUVÈL JEZIKRI A DAPRÈ MATYE KI SEN 23, 27- 32

Lè sa a: Jezi pale, li di:

"Madichon pou nou, pwofesè ak farizyen ipokrit, paske nou sanble avèk kavo blanchi, deyò yo parèt byen bèl pou lèzòm, anndan an menm plen ak zo mò avèk tout kalite bagay pouri! Se konsa nou menm tou, deyò nou parèt kòrèk vre pou lèzòm men anndan an menm nou plen ipokrizi ak mechanste.

Madichon pou nou, pwofesè ak farizyen ipokrit, nou menm k’ap bati kavo pwofèt yo, k’ap dekore tonbo moun kòrèk yo, epi n’ap di: 'Si nou te nan epòk zansèt nou yo, nou pa t’ap konplis yo nan san pwofèt yo!' Se pousa se nou menm menm ki sèvi pwòp tèt nou temwen, nou se pitit sila yo ki te touye pwofèt yo. Ebyen nou menm, nou mèt fin fè sa zansèt nou yo te kòmanse fè a".

An nou fè lwanj ak konpliman pou pawòl Bondye a.

REFLEKSYON

De dènye «piga» (avètisman) pou Farizyen yo ak pwofesè yo. Jezi kalifye yo ipokrit. Li konpare yo ak kavo blanchi (sa yo montre se pa sa yo ye), nou te kapab di se yon bèl mango men ki tèlman gen vè anndan li, pa gen kote pou w’ mòde  l’! Jezi akize yo tou kòm moun ki konplis nan lanmò pwofèt yo. E nou menm ki se kretyen k’ap viv nan tan sa: èske nou pa sanble ak farizyen yo ak pwofesè yo nan fason nou youn trete lòt? Èske nou san repwòch devan Bondye? Èske nou chèche fè volonte Bondye oubyen èske nou fè volonte pa nou?

Nan kisa nou konplis: èske nou pa konplis nan detwi lavi frè ak sè nou? Èske anpil fwa akoz movèz fwa nou, nou pa fè yo pèdi yon opòtinite? Jous nan ki pwen nou kòrèk devan Bondye? Èske sa nou montre se sa nou ye? Jezi nou abitye tande nan levanjil yo, nou ta di se pa li menm k’ap pale jodi a: pi souvan, se yon Jezi ki montre dousè li nan tout bagay, yon Jezi ki ankouraje lapè.

Jodi a se kòm si se pa de Jezi sa a a y’ap pale, akoz fason li atake kònpòtman Farizyen yo ak pwofesè yo. Ebyen, Jezi pa dakò ak moun k’ap fè lòt moun abi, moun k’ap viv sou aparans, moun k’ap viv nan manti, moun k’ap manipile lòt moun. Fason Jezi ranpli wòl pwofetik li, se yon bagay ki make tout lavi li, menm jan tou ak lansèyman li yo ak gerizon li yo.

Jezi se verite a.

LAPRIYÈ:Granmèt Jezi, se pou mwen aprann viv san ipokrizi, se pou mwen sispann twonpe moun. Se pou lavi mwen sanble ak lavi pa ou.

PWOPOZISYON: Lè m’ viv nan manti, se pwòp tèt mwen mwen twonpe: jodi m’ap chèche viv nan verite ak tèt mwen ak pwochen mwen.