LENDI 6

Koulè Blan

PREMYE MOSO LABIB

"Granmèt la louvri kè l’ pou l’ met atansyon nan sa Pòl t’ap di yo".

NAN TRAVAY APOT YO 16, 11-15

Nou navige sot Twoas, nou rive tou dwat Samotras, epi nan landmen nou rive Neapolis; nou sot la, nou rive Filip, vil ki pi enpòtan nan rejyon Masedwán nan, kote anpil etranje abite.

Nou te rete pase kèk jou nan vil sa a. Jou saba a, nou sòti deyò pòt la, bò larivyè a, kote yo konn lapriyè a, nou chita, nou t’ap pale avèk medam yo, ki te rasanble yo.

Yon madanm yo rele Lidi, yon machann vlou nan vil Tiati, ki te adore Bondye, li t’ap koute; Granmèt la louvri kè l’ pou l’ fè atansyon nan sa Pòl t’ap di yo. Lè l’ fin batize, ni kay li tou, li ensiste, li di: Si nou konsidere m’ kòm fidèl Granmèt la, antre lakay mwen, rete la". Li fòse nou.

Pawòl Granmèt la.

R/Mèsi Bondye, mèsi.

SÒM REPONS 149, 1-2. 3-4. 5-6a e 9b

R/ Granmèt la jwenn plezi nan pèp li a.

Oubyen: Alelouya.

Chante pou Granmèt la yon kantik nouvo; lwanj li nan Legliz sen yo. Se pou Izrayèl kontan nan sila a ki fè l’ la, se pou pitit Siyon yo danse pou wa yo.R.

Se pou yo fè lwanj pou non l’ avèk dans, sou tanbou ak gita se pou yo chante pou li. Paske Granmèt la jwenn plezi nan pèp li a, l’ap fè pòv yo jwenn konsiderasyon nan delivrans la.R.

Se pou sen yo fete nan bèlte a, se pou yo kontan sou kabann yo. Lwanj Bondye yo nan bouch yo: bèlte sa a pou tout sen l’ yo.R.

LEVANJIL

"Lespri laverite a ap sèvi m’ temwen".

MEN BÒN NOUVÈL JEZIKRI A DAPRÈ JAN            15, 26-16, 4

Lè sa a: Jezi di disip li yo:

"Lè Avoka a ap rive, li menm m’ap voye ba nou sot kot Papa a, lespri laverite a ki sòti nan Papa a, se li menm k’ap sèvi m’ temwen. Nou menm tou n’ap sèvi m’ temwen, paske se depi nan kòmansman nou avèk mwen. Mwen di nou bagay sa yo, pou nou pa dekontwole. Y’ap mete nou deyò nan kay reyinyon yo. Men lè a ap rive, tout moun k’ap touye nou, y’ap konprann se yon sèvis yo rann Bondye. Y’ap fè nou sa, paske yo pa konnen ni Papa a ni mwen menm. Men mwen di nou bagay sa yo, pou lè lè pa yo a rive, nou sonje mwen te di nou sa".

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Nan tan pèsekisyon Legliz la, se nan moman sa a li pran bon jan rasin, moman kote fondasyon an vin pi solid, kote lafwa boujonnen.  Kòman nou ka eksplike sa? Lè yo t’ap chèche febli Legliz la, se lè sa a li pi fò, lè y’ap maspinen oubyen touye kretyen yo, se lè sa a pi plis moun konvèti, lè y’ap depeyize yo, se lè sa a yo mache fè patizan pou Jezi tout kote, lè y’ap chèche toufe yo, se lè sa a yo preche Levanjil la ak plis kouraj. Men nan tan n’ap viv la, yon tan tout moun gen libète relijye pou yo viv lafwa yo jan yo vle, se nan epòk jodi a mwens moun ap chèche vin kretyen, oswa yo di y’ap swiv Kris la men yo pa dakò ak Legliz. Sa vle di se yon Legliz ki pase mòd, nou pa dwe lite pou li ankò, alevwa mouri. Sepandan nan Levanjil jodi a, Jezi ba nou yon mesaj ki trè enpòtan: “Y’ap mete nou deyò nan kay reyinyon yo. Men lè a ap rive, tout moun k’ap touye nou, y’ap konprann se yon sèvis yo rann Bondye. Y’ap fè nou sa, paske yo pa konnen ni Papa a ni mwen menm. Men mwen di nou bagay sa yo, pou lè lè pa yo a rive, nou sonje mwen te di nou sa”. Tan pou nou bay temwanayaj pou Jezi p’ap janm fini, toutotan Rèy Bondye a pa tabli sou tout fas tè a.

LAPRIYÈ: Nan moman sa a, m’ap di w’ mèsi Bondye papa m’, m’ap fè lwanj pou ou, paske ou leve Jezi byen vivan, ou mete l’ Granmèt, tanpri ba nou fòs temwaye mèvèy li fè pou nou. Amèn

PWOPOZISYON: Jodi a m’ap bay yon ti moman nan tan mwen pou m’ pataje pawòl Levanjil sa a ak pwochen mwen yo.