MADI 7

Koulè Blan

PREMYE MOSO LABIB

"Kwè nan Granmèt Jezi, w’ap sove, ni ou menm ni kay ou a".

NAN TRAVAY APOT YO 16, 22-34

Jou sa yo:

Foul Filipyen yo rasanble kont Pòl ak Silas; majistra yo chire rad yo, yo pase lòd pou yo bat yo ak fwèt. Lè yo fin ba yo anpil kou, yo voye yo nan prizon, yo pase yo lòd pou yo veye yo byen. Moun nan ki resevwa lòd sa a, li mete yo nan prizon ki anndan an, li mare pye yo sere avèk bwa.

Nan mitan nannuit, Pòl ak Silas t’ap lapriyè pou fè lwanj Bondye; santinèl yo te tande yo. Yon ti moman, gen yon gran tranblemantè ki rive, atèlpwen fondasyon prizon an souke. Menm lè a, tout pòt yo louvri, chenn tout moun lage. Gadyen prizon an reveye, li wè pòt prizon yo louvri, li rale epe a, li te vle touye tèt li, li te konprann prizonye yo te chape. Pòl menm rele byen fò, li di: "Pa fè tèt ou anyen ki mal: sèke nou tout nou isit la".

Li mande limyè, li antre, li sezi, li lage kò l’ nan pye Pòl ak Silas. Li fè yo sòti deyò, li di: "Mèt, kisa pou m’ fè, pou m’ sove"? Yo di: "Kwè nan Granmèt Jezi, w’ap sove, ni ou menm ni kay ou a".

Yo anonse l’ pawòl Granmèt la avèk tout moun ki te nan kay li a. Li pran yo menm lè sa a nan nuit la, li lave kote yo te blese yo; li batize, ni li menm ni tout kay li a menm lè a. Li kondui yo nan lakay li, li ba yo manje, li kontan ansanm avèk tout kay li a, antan l’ kwè nan Bondye.

Pawòl Granmèt la.

R/Mèsi Bondye, mèsi.

SÒM REPONS 137, l-2a. 2bc-3. 7c-8

R/ Men dwat ou ap sove m’, Granmèt.

Oubyen: Alelouya.

M’ap fè lwanj ou, Granmèt, ak tout kè m’, paske ou tande pawòl bouch mwen yo. Devan fas mesaje yo m’ap chante pou ou. M’ap adore nan kay sakre w’ la ki sen an.R.

M’ap fè lwanj pou non ou, poutèt kè sansib ou ak verite ou. Nenpòt ki jou mwen rele ou, ou reponn mwen; w’ap devlope bon kalite nan nanm mwen.R.

Men dwat ou ap sove m’. Granmèt la ap reyalize travay la pou mwen; Granmèt, kè sansib ou pou tout tan: travay men ou yo, pa renmèt li.R.

LEVANJIL

"Si m’ pa ale Avoka a p’ap vin jwenn nou".

MEN BÒN NOUVÈL JEZIKRI A DAPRÈ JAN                  16, 5b-ll

Lè sa a: Jezi di disip li yo:

"Koulye a m’a pral jwenn sila a ki te voye m’ nan, epi pèsòn nan nou pa poze m’ kesyon: 'Kote w’a prale'? Men, poutèt bagay sa yo mwen di nou an, chagren plen kè nou. Epoutan se laverite mwen di nou: li pi bon pou nou pou m’ ale; sèke si m’ pa ale, Avoka a p’ap vin jwenn nou; si m’ ale, m’ap voye l’ vin jwenn nou. Lè l’ap rive, l’ap akize tè a sou peche, ak jistis ak jijman: sou peche a, paske yo pa t’ kwè nan mwen; sou jistis la, paske m’a pral kay Papa a, epi nou p’ap wè m’ ankò; sou jijman an, paske chèf tè sa a deja jije".

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Jodi a Bondye envite nou pou nou kontanple grandè li ak pouvwa mizerikòd li, kontanple li nan fason li kapab fè mirak nan lavi nou. Men nou kapab kontanple li nan fason li kapab itilize nou kòm enstriman pou nou chanje reyalite lavi frè ak sè nou yo, pou nou chanje mond lan. Pouvwa Bondye gran anpil. Li depase tout limit entelijans ak konpreyansyon nou. Nan premye lekti a nou sot li a, nou wè jan pwizans Granmèt la te manifeste nan prizon kote yo te fèmen Pòl ak Silas, aprè yo fin woule yo anba baton poutèt yo t’ap preche bòn nouvèl Jezikri a. Bondye pa janm kite pitit li yo pou kont yo, sitou lè yo nan kalamite, se poutèt sa li montre pouvwa li tankou yon tranbleman tè, kote tout chèn ki te mare disip sa yo kase, epi tou tout pòt prizon te ouvri, konsa li fè santinèl la konprann se Bondye Papa a ki gen tout pouvwa.

Menn jan tou nan lekti sa a nou wè mizerikòd Granmèt la pa gen limit, li bay santinèl la chans pou l’ ka konnen l’ ak tout fanmi li; yo tout aksepte Jezi nan lavi yo, e yo montre sa piblikman lè yo aksepte resevwa batèm nan men de disip sa yo. Li pa janm twò ta pou yon moun antre nan chemen konvèsyon si li vle, e Granmèt la toujou gen pòt li byen ouvri pou l’ resevwa chak fwa nou vle pran konsyans de move fason n’ap viv.

Atitid apot sa yo se yon lòt mesaj ak ekzanp pou nou chak jodi a, yo aksepte tout kontraryete pou yo kapab pote bòn nouvèl la. Nou ta fèt pou n’ poze tèt nou kesyon, si nou prè pou soufri pou Levanjil la? Èske nan fason w’ap viv ou temwaye bòn nouvèl Levanjil sa a? Se yon envitasyon pou w’ aprann sakrifye vi ou nan sikontans lavi a pou ou pwoklame pawòl Bondye a chak jou nan reyalite n’ap viv la.

Se poutèt Jezi anonse nan Levanjil jodi a li dwe ale pou nou kapab resevwa fòs Lespri a, paske se li menm ki Avoka nou, k’ap toujou la pou akonpaye nou nan tout sa n’ap fè; se li ki va defann nou nan moman difikilte. Se menm Lespri sa k’ap ba nou limyè pou nou ka prepare n’ pou nou ka antre pou nou al chita nan plas Jezi ,Gran Frè nou an, t’ al prepare pou nou an.

 LAPRIYÈ: Granmèt, tanpri ban m’ lagras pou m’ ka temwaye Levanjil ou a, ban m’ fòs pou kapab defann lafwa nan tout kote mwen ye, ban mwen Lespri ou pou li kapab gide m’ chak jou nan tout sa m’ap fè. Amèn

PWOPOZISYON: Jodi a mwen deside pou m’ temwaye Levanjil la, nan tout sa m’ap panse ak nan tout sa m’ap fè.