VANDREDI 22

Koulè Wouj

SESIL KI SEN, Vyèj e Mati

(Memwa)

PREMYE MOSO LABIB

NAN LIV LEVITIK 19,1-2.17-18

Granmèt la pale ak Moyiz, li di:

“Pale ak tout foul pitit Izrayèl yo, w’a di yo: “Se pou nou sen, paske mwen menm mwen sen, Granmèt Bondye nou an.

Pa rayi frè ou nan kè ou, men se pou ou reprann li an piblik, pou ou pa gen peche sou li. Pa chèche vanjans, pa sonje move pawòl moun menm peyi ak ou yo. Se pou ou renmen zanmi ou tankou ou menm. Se mwen menm Granmèt la”.

Pawòl Granmèt la.

R/Mèsi Bondye, mèsi.            

SÒM REPONS 14, 2-3ab. 3cd-4ab. 5

R/ Ki moun k’ap repoze sou mòn ou an ki sen an, Granmèt?

Moun k’ap mache san fot, k’ap fè jistis; k’ap pale verite nan kè l’,

ki pa fè rizèz ak lang li. R.

Li pa fè pwochen l’ mal, li pa fè pwochen l’ afwon.

Li konsidere mechan an kòm anyen devan je l’, men li fè lwanj pou sila yo ki respekte Granmèt la. R.

Moun ki pa prete lajan ak enterè, ki pa aksepte kado sou do inosan.

Moun ki aji konsa, li p’ap souke menm.R.

LEVANJIL

“Kay ki bati sou wòch avèk kay ki bati sou sab”

MEN BÒN NOUVÈL JEZIKRI A DAPRÈ MATYE KI SEN 7, 21-27

Lè sa a: Jezi di patizan l’ yo:

“Se pa tout moun k’ap di m’: “Granmèt, Granmèt k’ap antre nan rèy syèl yo; men se moun ki fè volonte Papa m’ ki nan syèl la, se li menm k’ap antre nan rèy syèl yo. Anpil moun ap di m’ jou sa a: Granmèt, Granmèt, èske se pa o non ou nou te fè travay pwofèt, èske se pa o non ou nou te chase demon yo, èske se pa o non ou nou te fè anpil mèvèy”? Lè sa a, m’ap deklare yo: “Mwen pa janm konnen nou: rale kò nou sot sou mwen, nou menm k’ap fè peche”.

Sèke tout moun ki tande pawòl mwen sa yo, epi li reyalize yo, li sanble avèk yon moun bon konprann, ki bati kay li sou wòch; lapli tonbe, larivyè desann, van souf1e, yo fonse sou kay sa a, li pa tonbe, Sèke fondasyon l’ te sou wòch, tout moun ki tande pawòl mwen sa yo, men ki pa reyalize yo, li sanble ak yon moun sòt, ki bati kay li sou sab; lapli tonbe, larivyè desann, van souf1e, yo fonse sou kay sa a, li tonbe, malè l’ la gran”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON: Meditasyon n’ jodi a ap ede n’ reflechi kijan yon vrè patizan Bondye dwe viv. Premye lekti a sanble tèt koupe ak Levanjil la; pa ekzanp, Matye di yon moun ki mennen bak li byen nan fè volonte Bondye, se yon vrè patizan Jezikri; tandiske nan liv Levktik la Bondye di men kijan pou nou viv. Bondye t’ap pale ak pèp li a, li t’ap ba li enstriksyon, li t’ap oryante li, pou li te kapab evite move chemen. Li t’ap envite pèp Izrayèl la pran wout sentete, wout sanktifikasyon. Se pi gwo vokasyon tout moun k’ap viv genyen, vokasyon pou li vin sen. Jounen jodi a, se nou menm ki reprezante pèp Izrayèl la: pawòl sa yo se pou nou, fòk nou koute yo, Bondye menm di li se yon Bondye apa pou nou; mezanmi, se gwo pawòl wi k’ap pale la a! Se pou nou respekte Bondye, epi se pou nou gen respè pou tout moun, ni manman nou, ni papa nou, epi se pou nou respekte jou ki rezève pou li a. Si nou te kon n’ sonje pawòl sa yo ala bèl lavi nou ta bèl sou tè sa a, koute sa Bondye di ankò: piga nou janm vire do ba li pou n’al adore zidòl ki pa ka fè anyen pou nou; pa kenbe frè ou nan kè ni sè ou; si nou ta gen kont antre nou, se pou nou chèche regle sa touswit, pou n’ pa tonbe nan fè mal; piga nou tire revanj; se pou nou renmen tout moun menm jan nou renmen pwòp tèt pa nou: paske non Granmèt la se “Renmen”, epi se li menm ki mande pou nou renmen youn lòt, paske nou se pitit yon sèl Papa .Pou nou fè sa, se pou nou koute pawòl li ,kwè nan li, epi fè sa pawòl la mande nou; lè sa a n’a sanble ak moun ki gen bon konprann, ki bati kay li sou wòch, ak bon mason, se yon kay solid. Kay sa a, Matye ap pale a se lavi moun, fòk nou bati lavi sou bon fondasyon, paske peyi kote Bondye wa a, gen kondisyon pou yon moun antre ladan: nou pa kapab antre nan peyi pou sa nou di ak pou sa nou ye, men se pou sa nou fè. Pafwa nou pase tout tan ap di Granmèt, epi sa pou nou fè nou pa fè l’. Pa bliye syèl la se pa yon jaden w’ al ladan l’ jan w’ vle, ni pa yon peyi etranje, ni se pa yon inivèsite, fòk ou gen parenn ak marenn pou antre ladan l’; okontrè, se redi nan travay pou fè sa Bondye mande, se konsa w’ kapab antre nan peyi kote Bondye Wa a, nou p’ap pale anpil, pou n’ eritye, men n’a fè aksyon. Ann fè Mèt la konfyans, konsa n’a konstwi lafwa nou sou wòch solid.

LAPRIYÈ: Granmèt, koute priyè nou yo ak bon kè ou, tanpri, gras a priyè Sesil ki sen, reponn priyè pa nou yo kòrèk. Pa pouvwa Jezikri.

PWOPOZISYON: Mwen pral kòmanse reyalize pawòl Bondye a nan aksyon mwen yo, pou mwen pa sanble ak moun ki bati kay li sou sab. Bondye se mason an, l’ap ede mwen konstwi li.