VANDREDI 13

Koulè Wouj

LISI KI SEN, Vyèj e Mati

(Memwa)

PREME MOSO LABIB

“Si ou te kapab koute kòmandman m’ yo!”         

NAN LIV PWOFÈT IZAYI

48. 17-19

Men pawòl Granmèt la, sila a ki aprann ou sa k’ sèvi ou, k’ap dirije ou sou wout la, kote w’ap mache a.

Si ou te kapab koute kòmandman m’ yo! Kè poze w’ la ta tankou yon larivyè, jistis ou a ta tankou lanm lanmè yo! Ras ou ta tankou sab, desandans ki sòti nan vant ou ta tankou grenn sab li; non ou pa t’ap pati, pa t’ap efase sot devan fas mwen!”

Pawòl Granmèt la.

R/Mèsi Bondye, mèsi.   

SÒM REPONS 1, 1-2. 3: 4 e 6

R/ Moun ki suiv ou, Granmèt, l’ap gen limyè lavi a.

Se chans pou moun ki pa ale nan reyinyon moun ki pa respekte Bondye yo, ki pa kanpe nan chemen moun peche yo, ki pa chita nan gwoup moun k’ap pase lalwa a nan rizib yo, men se nan lalwa Granmèt la volonte l’ ye, se nan lalwa l’ la l’ap kalkile lajounen ak lannuit. R.

L’ap tankou yon pye bwa ki plante sou bò kouran dlo, k’ap donnen fwi l’ nan tan li; li p’ap pèdi fèy li, tout sa l’ap fè ap reyisi. R.

Se pa konsa pou moun ki pa respekte Bondye yo, se pa konsa, men y’ap tankou pousyè van ap voye jete. Sèke Granmèt la konnen chemen moun kòrèk yo, men wout moun ki pa kòrèk yo ap peri.R.

LEVANJIL

“Yo pa koute ni Jan ni Pitit moun nan”

MEN BÒN NOUVÈL JEZIKRI A DAPRÈ MATYE KI SEN

11, 16-19

Lè sa a, Jezi di foul yo:

“Ak ki sa mwen ta konpare jenerasyon sa a? Li sanble ak ti gason yo ki chita sou laplas, k’ap rele zanmi yo, y’ap di: “Nou chante pou nou, epi nou pa danse; nou chante chante dèy, epi nou pa kriye”.

“Reyèlman vre Jan rive, li pa manje, li pa bwè, epi yo di: “Se yon demon li genyen!” Pitit moun nan rive l’ap manje epi l’ap bwè, epi yo di: “Men yon moun voras, yon moun k’ap bwè diven, yon zanmi pibliken yo ak pechè yo!” Ebyen bon konprann nan jwenn pitit li yo ki rann li jistis”.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON

Men Granmèt la k’ap vini vizite nou atravè Pitit li a, pou li klere nou ak limyè li a, pou n’ kab gen lapè ak lavi. Tan Lavan an, se yon sezon espesyal, kote Bondye ap ranfòse espwa nou nan pwomès li fè nou, kote li vle nou fè yon pa pou nou antre nan gwo pwojè liberasyon li vle pou tout pitit li yo. Liberatè pwofèt Izayi te anonse a, li pa lwen rive. Se Jan Batis k’ap gen pou prezante nou li. E deja, nou konnen fòk nou prepare nou pou akeyi li, puiske lè w’ap resevwa yon etranje, ou dwe fè preparasyon ki nesesè pou ou kapab byen akeyi li. Se yon preparasyon ki mande nou pou nou chanje move konpòtman nou genyen, kwape move santiman ki nan kè nou, tankou lanbisyon, egyism, jalouzi,.. . Izayi lanse yon apèl ba nou pou nou kapab aprann koute, koute sa Bondye mande nou fè, paske se Granmèt la ki te fòme nou, se li menm ki te montre nou chemen pou nou swiv la; si nou swiv lòd Granmèt la te ba nou yo, si nou rete atantif, nou kapab jwenn benediksyon li, tankou lapli k’ap tonbe, tankou lamè k’ap voye lanm. Pafwa nou kon distrè nan lavi a, nou vin dekonekte, nou pa konnen ki bagay ki fè kè nou kontan, ni ki bagay ki fè nou tris, paske nou ap viv nan yon endiferans. Matye di Jan Batis vini pou l’ prepare wout pou Sovè a; men paske li pa manje, li pa bwè, yo di li gen demon sou li; Pitit moun nan vini pou l’ pran ka sa ki pi piti yo, pòv yo, pechè yo, moun ki malad yo; yo di li se yon moun ki saf, tafyatè, li fè zanmi avèk moun ki nan peche yo.

Frè ak sè m’ yo, se yon ekzanp Jezi vle ba nou. Pandan Tan Lavan an, pawòl Bondye a ap mande n’ fè jefò pou n’ sispann rete endiferan. L’ap envite nou fè solidarite pou nou ede sila yo ki pi piti yo, sa ki pa gen pèsòn, pòv yo, tout sila yo ki poko tande Bòn Nouvèl la; se pou nou pote lespwa ak ankourajman. Akeyi lòt yo ki pi fèb, se akeyi Jezi li menm menm? Ann mande Bondye fòs ak kouraj pou n’ chanje tout sa ki merite chanje nan lavi nou, nan kominote n’yo ak nan peyi nou, se konsa tè ki sèk la va tounen yon letan, flè yo va pouse, malere yo va danse, prizonye yo va jwenn libète epi se va kè kontan.

LAPRIYÈ: Granmèt, tanpri, fè bèl priyè Lisi ki sen, ki vyèj, ki mati, chofe nou, pou nou fete nesans li nan tan sa a, pou nou konsidere bagay k’ap dire tout tan yo. Pa pouvwa Jezikri.

PWOPOZISYON: Jezi ap vini kòm prens lapè, m’ap rete je klè pandan m’ap prepare pou akeyi li nan yon kay ki pwòp, nan yon kè ki pwòp.