VANDREDI 20

Koulè Vyolèt

PREMYE MOSO LABIB

“Men Vyèj la ap vin ansent”   

NAN LIV PWOFÈT IZAYI 7, 10-14

Jou sa yo :

Granmèt la pale avèk Akaz, li di : “Mande Granmèt Bondye ou la yon siy nan bafon anba tè a oubyen nan syèl la anwo nèt la”. Akaz di : “Mwen p’ap mande, mwen p’ap eseye Granmèt la”.

Izayi di : “Koute, kay David : Èske sa pa kont nou pou n’ap fatige lèzòm, pou nou rive ap fatige ata Bondye m’ nan? Se pousa Granmèt la li menm ap ba nou yon siy. Men vyèj la ap vin ansent, l’ap fè yon ti gason, y’ap rele non l’ Emanyèl, paske Bondye-avèk-nou”.

Pawòl Granmèt la.

R/Mèsi Bondye, mèsi.        

SÒM REPONS 23, 1-2. 3-4ab. 5-6

R/ Granmèt la ap antre: li se wa bèlte a.

Pou Granmèt la tè a ak sa k’ plen l’, fas tè a ak sa k’ abite ladan l’.

Sèke se li menm ki poze l’ sou lanmè yo, ki rann li solid sou gran rivyè yo.R.

Kilès k’ap monte sou mòn Granmèt la, oubyen kilès k’ap kanpe sou plas li ki sen an ?

Moun ki gen men l’inosan ak kè l’ nèt, ki pa nonmen non l’ pou granmesi.R.

Moun sa a ap resevwa benediksyon nan men Granmèt la ak jistis la nan men Bondye sovè l’ la.

Sa a se jenerasyon moun k’ap chèche l’ yo, k’ap chèche fas Bondye Jakòb la.R.

LEVANJIL

“Men w’ap ansent, w’ap anfante yon ti gason”

MEN BÒN NOUVÈL JEZIKRI A DAPRÈ LIK KI SEN 1, 26-38

Sou sizyèm mwa a Bondye voye zanj Gabriyèl nan yon vil Galile yo rele Nazarèt, kot yon vyèj ki te fiyanse avèk yon mesye yo te rele Jozèf, nan kay David, non vyèj la se te Mari.

Zanj la antre kote l’, li di : “Se pou kè ou kontan, plen gras, Granmèt la avèk ou, ou beni nan pami tout fi”. Lè l’ tande sa, li twouble poutèt pawòl li a, li t’ap kalkile ki kalite mòd jan salye sa a.

Zanj la di l’ : “Pa pè, Mari ; ou jwenn gras kot Bondye : men w’ap ansent, w’ap anfante yon ti pitit gason, w’ap rele non l’ Jezi. L’ap gran, y’ap rele l’ Pitit Sa a ki anwo nèt la, Granmèt Bondye ap ba l’ twòn David papa l’, l’ap kòmande kòm wa nan kay Jakòb la pou tout tan, peyi-wa l’ la p’ap janm fini”.

Mari di zanj la : “Kijan pou sa fèt, paske mwen pa gen konesans lèzòm ?”

Zanj la reponn, li di l’ : “Lespri Sen an ap vini nan ou, fòs Sa a ki anwo nèt la ap kouvri ou ak lonbraj li. Se pou sa sa a k’ap fèt nan ou a, l’ap sen, y’ap rele l’ Pitit Bondye. Men Elizabèt, kouzin ou an, li menm tou li ansent yon ti gason nan vyeyès li, mwa sa a se sizyèm nan pou sa a yo te rele steril la ; paske anyen pa enposib kot Bondye”.

Mari di : “Men sèvant Granmèt la ; se pou sa fèt pou mwen daprè pawòl ou a”. Zanj la pati kite l’.

An nou fè lwanj ak konpliman pou pawòl Bondye a.

R/ Lwanj pou ou, Granmèt.

REFLEKSYON : Mesaje Bondye a anonse nesans Jezi, Pitit Bondye vivan an. Nan sizyèm mwa a Bondye voye zanj Gabriyèl kote yon jenn fi nan yon vil Galile yo rele Nazarèt, non jenn fi ki vyèj la, se Mari: yon jèn ki te dakò pou l’ fè volonte Granmèt la, menm jan ak kouzin li Elizabèt ki ta madanm Zakari. Mari ak Jozèf te reprezante tout sila yo ki pòv nan kè yo, ak nan Lespri yo, sa vle di mou ki san pretansyon, moun ki pa gen gwo lògèy. Jezi vin reyalize plan delivrans Bondye sou tè a, li vin renouvle tout bagay, pou tout bagay kapab nouvo. Mari ap prepare l’ pou l’ manman Jezi ki se Sovè tè a ; anpil moun pa t’ kwè ke Mesi a te kab sòti Nazarèt, paske se yon zòn apil moun te konn sikile, kote te gen anpil trafik: anons Mari a se pa t’ nan zòn sa a  li te fèt, ni se pa t’ sou plas piblik, men nan yon tikay, nan yon anbyans ki pa t’ gen twòp enpòtans pou chèf Jwif yo, paske Mari se pa t’ yon gwo chabrak, men Bondye te chwazi li paske se te yon moun senp. Se li ki te resevwa vizit zanj lan. Mari te reprezante tout sa ki te pi piti nan pèp Izrayèl yo, sila yo ki te pi meprize yo, ke Pwofesè Lalwa yo te konn meprize anpil. Zanj lan di Mari : « Se pou kè ou kontan, plen gras, Granmèt la avèk ou, ou beni nan pami tout fi… ». Kè kontan sa a, se kè kontan pwofèt yo te anonse a, pou sila yo ki t’ap tann Sovè a. Mari te reponn zanj lan konsa : « Kijan sa pral fè fèt, puiske mwen poko an afè avèk gason » ?  Men Mari pa t’ gen okenn dout nan kè li paske se te yon moun kòrèk devan Bondye, se pa t’ tankou Zakari ; sèlman, li chèche konnen kijan sa pral fèt ; Zanj lan di l’ : « Pa pè Mari, Lespri Sen an ap vini sou ou, epi Sila a ki anwo nèt la ap kouvri w’ ak lonbraj li ! ». Daprè Levanjil Lik la, Mari te tounen kay kote Bondye abite. Lik montre ki diferans ki genyen ant Jezi ak Jan Batis : Jan Batis te resevwa Lespri Sen an nan vant manman l’ tandiske Jezi menm Lespri Sen an te fè l’ tounen moun, se te yon rèv ki vin tounen reyalite pou pòv yo. E nou menm, ki sa n’ap fè pou n’akeyi Sovè a lakay nou ? Men jan ak Mari se pou nou di : se sèvitè/ sèvant Granmèt la mwen ye, se pou volonte li fèt sou mwen.

LAPRIYÈ : Bondye, ou menm ki pèmèt pou Vyèj ki san tach la resevwa Pawòl ou a yo pa kapab eksplike a, lè zanj la te pot nouvèl la, epi ou fè l’ vin tounen kay Bondye, ou plen l’ak limyè Lespri Sen an, tanpri, fè nou suiv ekzanp li, pou nou rabese tèt nou pou nou kole kò nou sou volonte ou. Pa pouvwa Jezikri.

PWOPOZISYON : Si m’ pa kwè kijan pou m’ fè espere sila k’ap vini an ?