MADI 7-8-2018

Koulè Vèt

PREMYE LEKTI

«Se poutèt anpil peche ou yo mwen aji konsa avèk ou. M’ap fè joupa Jakòb yo tounen»

LEKTI LIV PWOFÈT JEREMI 30, 1-2. 12-15. 18-22.

Men pawòl Granmèt la ki rive sou Jeremi, li di: «Men pawòl Granmèt Bondye Izrayèl la, li di: «Tout pawòl sa yo mwen pale avèk ou a, ekri yo nan yon liv».

Men sa Granmèt la di: «Kote ou blese a, li pa kapab geri, kote ou malad la, li grav anpil; pèsonn pa plede kòz ou pou l’ panse ou, sa pa sèvi anyen pou yo ba ou swen. Tout zanmi ou yo bliye ou, yo p’ap chèche ou; chatiman lènmi an frape ou ak yon pinisyon ki rèd: poutèt pakèt fot ou, peche ou yo rèd. Sa ou bezwen rele sou soufrans ou a? Soufrans ou a pa gen gerizon. Se poutèt pakèt fot ou yo ak poutèt move peche ou yo, mwen aji konsa avèk ou».

Men pawòl Granmèt la: «Men m’ap fè prizonye joupa Jakòb yo tounen, m’ap pran pitye pou kay li yo, m’ap bati vil sou tèt li, m’ap drese kay sakre a nan plas li.Y’ap fè lwanj ak vwa mizisyen k’ap sot ladan l’. M’ap fè yo vin anpil, yo p’ap diminye; m’ap fè yo jwenn bèlte, yo p’ap rabese. Pitit li yo ap vin tankou nan kòmansman, fanmiy li a ap dire devan m’, m’ap vizite tout moun k’ap fè l’ pase mizè. Chèf li ap sòti nan li, pitit wa ap fèt nan mitan l’; m’ap fè levasyon l’, l’ap pwoche kote m’. Kilès ki leve kè l’ pou l’ pwoche kote m’?» Deklarasyon Granmèt la.

«N’ap pèp mwen, mwen menm m’ap Bondye nou».

Pawòl Granmèt la.

SÒM REPONS 101, 16-18. 19-21. 29 e 22-23

R/ Granmèt la bati Siyon, li parèt nan bèlte l’.

Nasyon yo ap respekte non ou, Granmèt, tout wa yo sou tè a ap respekte bèlte w’ la;

paske Granmèt la ap bati Siyon, l’ap parèt nan bèlte l’.

L’ap voye je sou lapriyè pòv la, li p’ap meprize lapriyè yo a.R.

Se pou yo ekri bagay sa yo pou lòt jenerasyon an pèp k’ap kreye a, l’ap fè lwanj Granmèt la.

Sèke li panche sot nan kay sakre l’ la anwo a, Granmèt la gade sou tè a, antan l’ nan syèl la;

pou l’ koute rèl prizonye yo, pou l’ delivre pitit lanmò yo.R.

Pitit sèvitè ou yo ap abite, ras yo ap asire devan fas ou, pou yo anonse non Granmèt la nan Siyon, avèk lwanj li nan Jerizalèm;

lè pèp yo ap rasanble pou yo fè yon sèl, avèk rèy yo, pou yo sèvi Granmèt la.R.

LEVAN JIL

«Pase m’ lòd pou m’ vin jwenn ou sou dlo yo»

MEN BÒN NOUVÈL JEZIKRI A DAPRÈ MATYE KI SEN 14, 22-36

Lè foul la fin manje kont li, menm lè a Jezi fòse disip yo pou yo monte nan batiman an pou yo pran devan l’ lòt bò lanmè, joustan li fin ranvwaye foul yo. Lè l’ fin ranvwaye foul la, li monte sou mòn nan pou l’ lapriyè pou kont li. Lè aswè rive, li te pou kont li la a. Batiman an menm te nan mitan lanmè, lanm yo t’ap souke l’: sèke van yo t’ap vin nan sans kontrè.

Vè twazè nannuit Jezi vin kote yo, antan l’ap mache anwo lanmè a. disip yo wè l’ap mache sou lanmè a, yo twouble; yo di: «Se yon zonbi», yo pran rele poutèt yo pè.

Tou suit Jezi pale avèk yo, li di: «Pran tèt nou, se mwen menm, pa pè». Pyè menm reponn, li di: «Granmèt, si se ou menm, pase m’ lòd pou m’ vin jwenn ou sou dlo yo». Jezi di l’:«Vini».

Pyè desann sot nan batiman an, li mache sou dlo a, pou l’al jwenn Jezi. Men lè l’ wè kijan van an fò, li pè; li kòmanse fonse, li rele, li di: «Granmèt, sove m’».

Menm lè a Jezi lonje men l’, li kenbe l’, li di l’: «Lafwa ou piti, pouki sa ou fè dout?»

Lè yo monte nan batimán an, van an sispann. Moun yo ki te nan batiman an, yo pwoche, yo adore l’, yo di: «An verite, ou se Pitit Bondye».

Yo travèse lòt bò lanmè a, yo rive nan peyi Jeneza. Moun peyi a rekonèt li; yo voye avèti tout rejyon an, yo mennen tout malad yo ba li; yo lapriyè l’ pou l’ kite yo touche omwen fil rad li.

Tout moun ki te touche l’, yo te sove.

An nou fè lwanj ak konpliman pou pawòl Bondye a.

REFLEKSYON: Jezi ki monte sou tèt mòn nan pou li priye. Sa fè nou konprann lapriyè se yon bagay ki enpòtan nan lavi nou, paske se sèl mwayen pou nou antre an kominikasyon ak Bondye epi se gras a li nou jwenn fòs pou nou kapab viv konba lavi a. Èske nou toujou genyen bòn abitid sa a? Si nou genyen li an nou kontinye apwofondi li. Anpil fwa nou ka di nou pa gen tan, li ka sanble sa vre, men nou dwe sonje tan an se Bondye ki ba nou li, sante nou genyen an se kado Bondye; konsa li bon pou nou pran yon ti tan pou nou di Bondye mèsi.

Si ou pa gen sante ki sa ou ka fè? Mwen kwè ou pa ka fè anyen, se yon kote w’ap rete chita. Kidonk an nou pa tann lè nou nan kalamite pou nou ap rele chèche Bondye.

Pyè mande pou li al jwenn Jezi men li doute; akoz doutans li li pral koule. Eksperyans Pyè a se yon ekzanp pou montre frajilite nou kòm moun. Nou fèb epi a nenpòt moman nou ka doute. Menm jan Jezi pa t’ kite Pyè koule nou ka rete kwè li p’ap kite nou koule. Menm jan Pyè te rele sove li, konsa depi nou rele Bondye l’ap sove nou.

Yon twazyèm bagay, n'ap mansyone se lè Jezi rive a kòman anpil moun anvayi li epi tout moun ki te touche li te geri. Non sèlman paske yo te rive touche li, men se paske yo te kwè nan Li. Nou ka wè la ki pouvwa Sovè nou an. Konsa depi nou kwè nan li nou ka rive geri tou.

LAPRIYÈ: Granmèt, fè mwen gen yon lafwa ki pi solid pou m’ pa koule, tanpri souple vin pote mwen sekou. Amèn.

PWOPOZISYON: Pandan jounen sa a, m’ap pran yon ti tan pou m’ di Bondye mèsi paske li pa janm kite mwen peri.