SAMDI 1-9-2018

Koulè Vèt.

PREMYE LEKTI

“Nou aprann nan men Bondye pou nou youn renmen lòt”.

NAN PREMYE LÈT PÒL EKRI MOUN KORENT YO 1, 26-31

Gade nan kisa yo rele nou, frè m’ yo; sèke pa gen anpil moun bon konprann daprè chè a, ni anpil moun ki gen pouvwa, ni anpil moun ki sot nan gran ras. Men se sa k’ fou sou tè a Bondye chwazi, pou l’ fè moun bon konprann yo wont; se sa k’ fèb sou tè a Bondye chwazi pou l’ fè sa k’fò yo wont; se sa k’ san  konsiderasyon ak sa yo meprize sou tè a Bondye chwazi, ak sa k’ pa anyen, pou l’ detwi sa k’ kichòy yo, pou okenn chè pa fè grandizè devan fas li.

Se gras a li nou nan Jezikri, Jezikri sa a ki vin tounen bon konprann pou nou k`sot nan Bondye ak jistis, ak sa k`ap fè nou vin sen an, ak delivrans; konsa daprè sa k’ ekri a: “Moun k’ap leve tèt li, se nan Granmèt la pou l’ leve tèt li.

Pawòl Granmèt la.

SÒM REPONS 32, 12-13. 18-19. 20-21 (r.: 12)

R/ Se chans pou pèp la Granmèt la chwazi kòm eritaj li a.

  Se chans pou nasyon an, ki gen Granmèt la pou Bondye l’, pèp la li chwazi kòm eritaj li a.

  Nan syèl la Granmèt la gade, li wè tout pitit moun yo.R.

  Men je Granmèt la sou moun ki respekte l’ yo, sou moun ki espere sou kè sansib li,

  pou l’ delivre nam yo sot nan lanmò, pou l’ ba yo manje nan grangou.R.

  Nam nou ap konte sou Granmèt la, paske se sekou nou ak pwoteksyon nou li ye;

  paske se nan li kè nou kontan, se nan non l’ ki sen an nou espere.R.

LEVANJIL

« Pou tèt ou te fidèl nan  yon ti bagay, antre nan kè kontan mèt ou a »

MEN BÒN NOUVÈL JEZIKRI A DAPRÈ MATYE KI SEN 25, 14-30

Lè sa a Jezi di patizan l’ yo parabòl sa a:

Yon mesye t’ ap pati al nan vwayaj, li  rele sèvitè l’ yo, li renmèt yo yo byen l’ yo: li

Bay youn senk pyès lajan, youn lòt li menm  de, epi  yon lòt  menm yon sèl; chak moun daprè kapasite pa l’; aprè sa  li pati la menm. Sa k’ te resevwa senk pyès lajan an, l’ ale, li travay avèk yo, li rapòte senk lòt. Menm jan tou sa k’ te resevwa de pyès lajan an, li rapòte de lòt. Men sa k’ te resevwa  yon sèl la, l’al fouye tè a, li kache lajan mèt li a.

Aprè anpil tan, mèt pyès lajan sèvitè sa yo vini, li mande yo kont.

Sa k’ te resevwa senk pyès  lajan an  li pwoche, li prezante senk lòt pyès lajan, li di: Mèt, se senk  pyès lajan ou te ban mwen, men senk lòt mwen rapòte. Mèt la di l’: Se byen, bon sèvitè ki  fidèl: poutèt ou te fidèl sou yon ti kras, m’ap enstale  ou  sou anpil: antre nan kè kontan mèt ou a.

Sa k’ te resevwa de pyès lajan an, li pwoche  tou, li di : Mèt  se de pyès lajan ou te renmèt  mwen, men de lòt mwen rapòte. Mèt li d l’: Se byen, bon sèvitè ki fidèl : poutèt  ou te fidèl sou yon ti kras, m’ap enstale ou sou anpil : antre nan kè kontan mèt ou.

Sa k’ te resevwa yon sèl pyes lajan, li proche atò, li di: Mèt, mwen  konnen ou se yon moun ki  rèd : ou rekòlte kote w’ pa simen, ou ranmanse kote ou pa  t’ plante. Mwen te pè, m’ale, mwen kache pyès lajan ou an nan tè a, men li, pran afè w’.

Mèt li reponn, li di l’ : Move sèvitè, ou parese, ou te konnen mwen rekòlte kote mwen pa simen, mwen ramase kote mwen pa plante: ou te dwe renmèt lajan m’ nan labank, lè m’ vini mwen ta resevwa sa m’ depoze a avèk  benefis. Pran pyès lajan an nan men l’, bay moun ki gen dis pyès lanjan an ; konsa tout moun ki genyen va genyen, y’ap ba li, l’ap gen plis ; moun kipa genyen an menm, sa l’ konpran li genyen an menm, y’ap wete l’  nan men l’. Epi sèvitè sa a ki pa vo ayen an, jete l’ nan fènwa deyò yo: kote sa a ap gen rèl ak manje dan”

An nou fè lwanj ak konpliman pou pawòl Bondye a.

REFLEKSYON: Gen yon bèl chante legliz ki di, “Tout sa n’ genyen, tout sa n’ ye, se ou ki ban nou yo…”. Sa se mesaj premye lekti jodi a.  Si ou gen lespri oubyen bèlte, si ou gen kòb oubyen yon bèl kay, si ou gen sante, si anpil moun renmen ou, se pa paske ou merite l’ plis pase yon lòt moun ki pa genyen l’, men se yon favè Bondye Granmèt la fè w’.  

Menm si ou te fè anpil efò pou ou te jwenn sa ou genyen jodi a, fò ou konnen gen lòt moun ki travay plis pase ou, men yo pa t’ gen menm chans avè w’.  Pou rezon sa a, nou pa gen dwa vante tèt nou.  Se remèsye pou n’ remèsye Bondye pou lavi a ak pou tout sa li ba nou.

Chante a kontinye : “…Nou vin remèt yo nan men w’, Granmèt, pran yo pou fè sevis ou…” Epi se mesaj sa a Levanjil jodi a pote pou nou. Se pa sèlman pou nou sonje remèsye Bondye pou sa li ba nou.  Se pou nou sèvi ak sa nou gen nan men nou, ak nan tèt nou, pou nou fè travay Jezi, pou nou fè byen pou moun ki bò kote nou.

Lè yo repete refren an nan chante a, dènye pati a chanje epi yo di: “…pran yo pou sove frè n’ yo”.  Tout sa n’ genyen, tout sa n’ ye, se pa pou nou yo ye.  Se prete Granmèt la prete nou bagay sa yo pou nou fè yon misyon avè yo. Epi misyon li mande nou fè a, se pou nou youn sèvi lòt. 

Jezi pa mande manje, li mande nou bay moun ki grangou yo manje. Jezi pa mande n’ limen balèn pou li, li mande n’ pote limyè ledikasyon pou timoun yo.

PRIYÈ: Mèsi Bondye, pou tout sa ou ban mwen ! Ou merite tout kalite konpliman, men se pa konpliman ou mande. Sa ou mande m’ se pou m’ sèvi pwochen mwen ak bon kè. Sa fè kè m’ kontan ! 

PWOPOZISYON: Pou mwen montre mwen rekonesan pou sa Granmèt la fè pou mwen, m’ap separe sa li ban mwen ak moun ki poko jwenn.