JEDI 27

Koulè Blan

MONIK KI SEN (Memwa)

PREMYE LEKTI

"Se pou Granmèt la fè nou depase limit charite nou genyen youn pou lòt la".

LEKTI PREMYE LÈT APOT PÒL KI SEN POU TESALONISYEN YO          3, 7-13

Nan mitan tout kè sere ak tray nou, nou jwenn konsolasyon nan nou, frè m’ yo, poutèt lafwa nou an; koulye a nou kapab viv, paske nou menm nou kenbe fèm nan Granmèt la. Ki mèsi nou kapab renmèt Bondye pou nou pou tout kè kontan sa a n’ap jwi a poutèt nou devan Bondye nou an, antan n’ap lapriyè lannuit ak lajounen an kantite, pou nou kapab wè fas nou, pou nou konplete sa k’ manke nan lafwa nou?

Bondye Papa nou, ak Granmèt nou Jezikri, se pou l’ dirije chemen nou jous lakay nou. Nou menm menm se pou Granmèt la fè nou devlope, se pou l’ fè nou depase limit charite nou genyen youn pou lòt la ak pou tout moun, menm jan nou genyen l’ pou nou an; konsa se pou l’ kenbe kè nou fèm san repwòch nan sa ki sen an devan Bondye Papa nou, pou jou Granmèt nou Jezikri ap vini ansanm ak tout sen l’ yo. Amèn.

Pawòl Granmèt la.

SÒM REPONS 89, 3-4. 12-13. 14 e 17 (r.: 14)

R/ Plen nou, Granmèt, ak kè sansib ou a, pou nou fete.

Ou fè moun nan tounen nan pousyè; ou di: "Tounen, pitit moun yo".

Sèke mil ane devan je ou se tankou jounen yè a ki pase, ak yon vèy nan nuit.R.

Aprann nou konte jou nou yo, pou nou mete kè nou nan chemen sajès la.

Tounen, Granmèt, jouskilè? Pran pitye pou sèvitè ou yo.R.

Plen nou depi granmaten ak kè sansib ou a, n’a fete, n’a gen kè kontan tout jou nou yo.

Se pou bèlte Granmèt Bondye nou an sou nou, garanti travay men nou an sou nou, travay men nou, garanti l’.R.

LEVANJIL

"Ret pare".

MEN BÒN NOUVÈL JEZIKRI A DAPRÈ SEN MATYE 24, 42-51

Lè sa a: Jezi di disip li yo:

"Veye, paske nou pa konnen kilè Granmèt nou an gen pou l’ vini. Aprann sa, si pèd-fanmi na te konnen kilè vòlè a t’ap vini, li t’ap veye sètènman, li pa t’ap kite yo kase kay li a. Konsa nou menm tou se pou nou pare, paske nou pa konnen kilè Pitit moun nan gen pou l’ vini.

Kilès sèvitè ki fidèl, ki gen sajès, daprè nou, pou mèt li enstale 1’ sou fanmi li, pou l’ bay moun yo manje nan tan yo? Se chans pou sèvitè sa a, si lè mèt li rive, li jwenn li ap fè sa. Amèn mwen di nou, se sou tout byen l’ yo l’ap enstale l’.

Men si move sèvitè sa a di nan kè l’: 'Mèt mwen pran tan pou l’ vini', epi li kòmanse ap frape lòt sèvitè l’ yo, l’ap manje, l’ap bwè avèk moun sou yo: mèt sèvitè sa a ap rive jou li pa espere, ak lè li pa konnen; l’ap jete l’ deyò, l’ap mete pòsyon l’avèk ipokrit yo: kote sa a se rèl ak manje dan k’ap genyen".

An nou fè lwanj ak konpliman pou pawòl Bondye a.

REFLEKSYON: Pafwa nou poze tѐt nou kesyon oubyen nou poze lὸt moun ki pi gran pase nou kesyon sou desandans nou ; sa vle di, nan ki ras nou sòti, kilѐs ki te gran grann ak gran papa nou. Jezi li menm tou te fѐt nan yon fanmi, sa vle di, li te genyen yon desandans e se sa sen Matye prezante nou nan Levanjil jodi a. Jezi, non sѐlman li se Bondye men li se moun tou, paske menm jan avѐk nou li te manje, li te travay, li te pale sof peche li pa t’ konn fè.

Nan sans sa a, levanjil jodi a ap ede nou konprann dimansyon moun  nan Jezi paske li te gen yon desadans menm jan avèk nou. Matye prezante nou Jezi tankou Mesi a, sila a pwofѐt yo t’ap anonse depi lontan an e ke tout pѐp t’ap ret tann nan. Li prezante li depi Abraham jiska David paske daprè sa pwofѐt Izayi te anonse se nan ras sa a Mesi a te gen pou l’ sòti.

Nan premye moso Labib la, nan premye lѐt Pὸl ekri moun Tesalonik yo, li felisite yo pou jan Timote te bay bon temwanyaj sou yo, kὸman lafwa yo te genyen te pѐmѐt Pὸl ak Timote te jwenn rekonfὸ nan travay yo t’ap fѐ a. Pὸl te fѐ yo konnen tou kὸman l’ te kontan poutѐt yo te kenbe fѐm nan Bondye. Li te lapriyѐ Bondye pou yo pou l’ te kapab konsѐve yo nan lafwa epi pou youn toujou renmen lὸt. Nou menm tou, an nou mete an pratik tout ansѐyman nou resevwa nan men monsenyѐ, pѐ ak tout lὸt moun k’ap ede nou fѐ lafwa nou grandi ; konsa, menm jan ak pѐp Tesalonik la, n’a kenbe fѐm nan lafwa e youn va rive renmen lὸt. Konsa moun ki plase pou gide nou yo va santi yo jwenn rekonfὸ nan mitan nou menm jan ak Pὸl ak Timote.

LAPRIYE : Bondye Papa, tanpri, ban nou limyѐ pou nou rive rekonѐt Jezi tankou vrè Mesi a epi ede nou mete an pratik tout ansѐyman k’ap ede nou jwenn limyѐ pou lavi nou. Amѐn.

PWOPOZISYON:Apati jodi a, mwen vle bay plis enpὸtans ak tout ansѐyman m’ap resevwa.

MÈKREDI 26

Koulè Blan

Terèz Kònè, Vyèj, Patwòn granmoun yo.

PREMYE MOSO LABIB

“Lannuit ak lajounen n’ap travay pou nou preche levanjil la ba nou”.

PREMYE LÈT APOT PÒL KI SEN, POU TESALONISYEN YO 2, 9-13

Nou sonje, frè m’ yo, kijan nou travay, nou fatige kò nou: lannuit ak lajounen, nou t’ap travay, pou nou pa peze sou nou, pandan nou t’ap preche nou levanjil Bondye a. Nou temwen ansanm ak Bondye, kijan konduit nou te sen, kòrèk, san repwòch kote nou, nou menm ki kwè a; nou konnen kijan nou te ye ak chak moun nan nou, tankou yon papa ak pitit li yo, antan n’ap lapriyè nou, n’ap konsole nou, pou nou mache kòrèk pou Bondye ki rele nou nan rèy li a ak nan bèlte l’ la.

Se pousa nou menm nou di Bondye mèsi san rete, paske, lè nou resevwa pawòl Bondye a nou te tande nan bouch nou an, nou pa resevwa l’ tankou yon pawòl moun, men tankou sa li ye a vre, tankou pawòl Bondye a, li menm ki aji nan nou menm ki kwè yo.

Pawòl Granmèt la.

SÒM REPONS 138, 7-8. 9-10. ll-12a

R/ Granmèt, ou sonde m’, ou konnen m’.

Ki kote pou m’ ale lwen lespri ou, ki kote pou m’ sove kò m’ lwen fas ou?

Si m’ monte nan syèl, ou la; si m’ desann anba tè, ou prezan.R.

Si m’ pran zèl devan jou m’al abite nan fon lanmè, menm la men ou ap kondui m’, men dwat ou ap kenbe m’.R.

Si m’ di: “Petèt fènwa yo ap fèmen m’, lannuit la ap sèl klète alantou m’”.

Menm fènwa yo pa fè nwa devan ou, lannuit la ap klere tankou lajounen.R.

LEVANJIL

“Nou se pitit sila yo ki te touye pwofèt yo”.

MEN BÒN NOUVÈL JEZIKRI A DAPRÈ MATYE KI SEN 23,27- 32

Lè sa a: Jezi pale, li di:

“Madichon pou nou, pwofesè ak farizyen ipokrit, paske nou sanble avèk kavo blanchi, deyò yo parèt byen bèl pou lèzòm, anndan an menm plen ak zo mò avèk tout kalite bagay pouri! Se konsa nou menm tou, deyò nou parèt kòrèk vre pou lèzòm men anndan an menm nou plen ipokrizi ak mechanste.

Madichon pou nou, pwofesè ak farizyen ipokrit, nou menm k’ap bati kavo pwofèt yo, k’ap dekore tonbo moun kòrèk yo, epi n’ap di: “Si nou te nan epòk zansèt nou yo, nou pa t’ap konplis yo nan san pwofèt yo!” Se pousa se nou menm menm ki sèvi pwòp tèt nou temwen, nou se pitit sila yo ki te touye pwofèt yo. Ebyen nou menm, nou mèt fin fè sa zansèt nou yo te kòmanse fè a”.

An nou fè lwanj ak konpliman pou pawòl Bondye a.

REFLEKSYON: Pòl, nan lèt li voye bay kretyen Tesalonik yo, montre nou kòman li enpòtan pou nou travay pou wayòm Bondye a. Nou wè kòman li di kretyen yo si yo sonje lavi yo t’ap mennen an, travay ke yo te konn ap fè yo, pou anonse levanjil Bondye ki vivan. Nou menm kretyen jodi a, sa dwe motive nou travay, antan nou prale nan tout kwen pou nou rankontre sa ki pi fèb yo, pi frajil nan sosyete a, pou nou anonse levanjil la, fè sa nou kapab pou nou mennen lòt yo ki nan fènwa nan limyè. Nou menm k’ap lite jodi a pou wayòm syèl la, esperans nou pa isit la, rekonpans nou se nan men Bondye li ye. Bondye pa mechan pou l’ manje kouraj nou, li pa mechan pou l’ bliye bagay ke nou fè pou li. Anpil fwa nan lavi nou, nou konn rann moun sèvis men, kèk fwa, menm moun sa konn vle tounen kont nou, li bliye tout sa nou te konn fè pou li. Li enpòtan pou nou fè Granmèt la konfyans paske li p’ap fè nou anyen ki mal, tout sa nou fè n’ap jwenn rekonpans lan. Se pou sa nou dwe travay pou Bondye ak tout kè nou, ak tout fòs nou e ak tout nanm nou.

Nou wè tou nan levanjil Matye a, repwòch Jezi t’ap fè Skrib ak Farizyen yo, poutèt yo se kav blanchi, deyò yo pwòp men anndan yo sal. Nou menm, jodi a, nou dwe swiv konsèy Jezi yo pou nou pa menm jan avèk Skrib, Farizyen sa yo. Nan mond jodi a, nan Legliz jounen jodi a, gen anpil moun ki se kav blanchi, k’ap fè tout sa ki mal, ki nan tout vye bagay, ki tout kote, epi k’ap pran pòz yo se bon kretyen. Gen anpil moun ki wè tout sa yon lòt fè ki mal, men yo pa janm pran tan pou yo gade lavi pa yo sa yo ap fè ki pa bon devan zye Bondye. Nan levanjil sa, nou jwenn envitasyon, pou nou viv jan Jezi mande, fè tout sa ki byen, mennen yon lavi ki dwat pou nou pa kav blanchi, pou nou pa fo kretyen k’ap fè sa ki mal, ki nan tout move zafè; nou dwe evite tounen antikris.

Si nou se kretyen ki pa bon, k’ap maske lòt moun yo, nan denyè jou yo Bondye ap mete nou deyò kòm chen nan wayòm syèl la.

LAPRIYÈ: Granmèt, ou menm ki fè nou sa nou ye jounen jodi a, fè nou toujou rete vrè patizan Jezikri nan sèvis wayòm ou an. Fè nou toujou rete fidèl nan tout sa n’ap fè, pou nou pa ap maske lòt yo, pou nan dènye jou ou kabap rele nou bon e fidèl sèvitè. Ou menm ki vivan e ki wa pou tout tan gen tan. Amèn.

PWOPOZISYON: Se pou nou al tout kote fè disip pou Bondye, travay pou Wayom syèl la. Se pou nou toujou rete bon patizan Jezi Fidèl nan travay nou, mennen yon vi ki pwop pou nou kapab rive fè lot yo gen gou pou zafè Bondye e fè disip toupatou sou latè.

MADI 25

Koulè Blan

Jozèf de Kalasans, Luis de Frans

PREMYE MOSO LABIB

“Nou te vle renmèt nou pa sèlman levanjil Bondye a, men menm lavi nou tou”.

NAN PREMYE LÈT APOT PÒL KI SEN, POU TESALONISYEN YO 2, 18

Nou konnen nou menm menm, frè m’ yo, kijan nou te rive lakay nou, se pa t’ pou granmesi; men anvan sa, nou te soufri, yo te maltrete nou nan vil Filip, jan nou konnen an;, nou te gen konfyans nan Bondye nou an, pou nou anonse nou levanjil Bondye a avèk anpil swen.

Prèch nou an pa t’ sòti nan sa k’ pa laverite, ni nan sa k’ pa pwòp, ni nan riz; men, tankou moun Bondye fin eseye pou l’ konfye nou levanjil la, se konsa nou pale; se pa tankou moun k’ap chèche fè lèzòm plezi, men se Bondye nou t’ap chèche fè plezi, li menm ki eseye kè nou. Nou pa janm preche pou flate moun, jan nou konnen an, ni pou chèche fè lajan, Bondye temwen, ni pou chèche konsiderasyon nan men lèzòm, ni nan nou menm ni nan men lòt moun yo. Malgre nou te kapab fè nou santi chaj apot Jezikri te ban nou an, okontrè nou fè kò nou tou piti nan mitan nou, tankou yon nouris k’ap swen pitit li yo.

Konsa nou te si tèlman renmen nou, se pa levanjil Bondye a sèlman nou te vle ban nou men ata lavi nou, paske nou te gen anpil valè pou nou.

Pawòl Granmèt la.

SÒM REPONS 138, 1-3. 4-6

R/ Granmèt, ou sonde m’, ou konnen m’.

Granmèt, ou sonde m’, ou konnen m’, ou konnen chita m’ ak leve m’. Ou konprann panse m’ depi byen lwen, tras wout mwen ak kouche m’, ou ekzamine yo.Tout wout mwen yo, ou wè yo byen klè.R.

Sèke pawòl la pa ko sou lang mwen, epi, Granmèt, ou deja konnen tout bagay. Dèyè ak devan, ou sere m’, ou poze men ou sou mwen. Li ekstrawòdinè anpil, konesans ou sou mwen an; li wo anpil, mwen pa kapab jwenn li.R.

LEVANJIL

“Se pou nou te fè bagay sa yo, san nou pa neglije lòt yo”.

MEN BÒN NOUVÈL JEZIKRI A DAPRÈ MATYE KI SEN 23, 23-26

Lè sa a: Jezi pale, li di:

“Madichon pou nou, pwofesè ak farizyen ipokrit, nou menm k’ap bay dizyèm pòsyon sou mant la avèk lanis la avèk legim yo, men nou kite sa k’ pi konsekan nan lalwa a: jijman, kè sansib, lafwa! Se pou nou te fè bagay sa yo, san nou pa neglije lòt yo. Chèf avèg, n’ap pase mouch la nan paswa, men nou vale chamo a!

Madichon pou nou, pwofesè ak farizyen ipokrit, paske n’ap pwòpte sa k’ deyò vè a avèk plat la, men anndan an menm nou plen bagay nou vòlè, ak sa ki pa pwòp! Farizyen avèg, kòmanse pwòpte sa k’ anndan vè a avèk asyèt la, pou sa k’ deyò a kapab vin pwòp”.

An nou fè lwanj ak konpliman pou pawòl Bondye a.

REFLEKSYON:Nan premye mozo Labib jodi a, nou wè jan Sen Pòl ap eksplike kòman yo te reyalize misyon preche bòn nouvèl Jezikri a nan mitan pèp Tesalonik la, malgre eksperyans difisil yo te pase avan yo rive nan kominote sa, yo ofri pawòl la ak tout kè yo e sitou yo ofri tout nanm yo, kòm yon manman pran swen pitit li. Sa se yon bon ekzanp pou nou, nan sans ke nou dwe sèvi Bondye ak tout kè e sitou, temwaye lafwa nan Granmèt la fason nou aji. Kòm batize, nou genyen misyon pou nou pwoklame Levanjil la, men sèlman nou byen reyalize devwa sa lè nou temwaye ak lavi nou mesaj n’ap anonse a.

Sèvi Levanjil temwen vle di: viv selon eksijans Granmèt la mande nou an, renmen Bondye ak tout kè ou, renmen pwochen ou menm jan ak pwòp tèt pa ou. Bay Bondye premye plas nan lavi ou, ouvri pòt kè ou ba li, epi tou viv nan pataj, nan solidarite ak frè ak sè ou yo, pa fè yo  enjistis, ni maltrete yo,  pa viv nan ipokrizi ansanm avèk yo, viv ak yon kè sensè, san ou pa pwofite sa k’ pi piti yo.

Yon lòt aspè  nou dwe sezi nan mesaj jodi a, sèke, nou pa fèt pou n’ jije lòt yo; se pou nou gade pwòp peche pa nou, lè nou ap gade sitiyasyon lòt, nou p’ap gen tan pou nou akzamine atitid pèsonèl nou ki, pafwa pi kritik pase pa vwazen yo. Ann pran lavi kretyen nou an men, nan revize nan chak moman kòman n’ap viv li, si reyèlman vre n’ap viv li jan Bondye mande a.

LAPRIYÈ:Granmèt, ede m’ viv pawòl ou a, fè l’ tounen limyè k’ap klere lavi m’ toutan, konsa m’a va anonse l’ ak bouch mwen, sitou nan fason m’ap viv.

PWOPOZISYON: M’ap pataje nan jounen jodi a mesaj sa nan fanmi oubyen ak yon zanmi, ou byen yon vwazen.

LENDI 24

Koulè Wouj

BATELEMI KI SEN, Apot (Fèt)

PREMYE MOSO LABIB

“Nan fondasyon yo menm, te gen douz non Apot Mouton an”.

NAN LIV APOKALIPS APOT JAN KI SEN 21, 9b-14

Zanj la pale avèk mwen, li di: “Vini, m’ap montre ou madanm nan ki fèk marye ak Mouton an”.

Li soulve m’ nan espri sou yon mòn ki gran, ki wo, li montre m’ vil ki sen an, Jerizalèm, k’ap desann sot nan syèl la, kot Bondye, li gen glwa Bondye a; limyè l’ te tankou pyè kalite siperyè, tankou pyè yo rele jasp la, tankou kristal.

Li te gen yon miray ki gran, ki wo, ki gen douz pòt; nan pòt yo te gen douz zanj, te gen non ki ekri, non douz ras pitit Izrayèl yo.

Nan direksyon olevan: twa pòt; nan direksyon nò: twa pòt; nan direksyon sid: twa pòt; nan direksyon okouchan: twa pòt. Miray vil la te gen douz kolòn, sou yo te gen douz non douz Apot Mouton yo.

Pawòl Granmèt la.

SÒM REPONS 144, 10-11. 12-13ab. 17-18

R/ Granmèt, se pou sen w’ yo fè konnen glwa peyi wa w’ la.

Se pou yo fè lwanj ou, Granmèt, tout sa ou fè yo; se pou sen ou yo fè konpliman pou ou.

Se pou yo deklare glwa peyi wa w’ la, se pou yo anonse pouvwa ou.R.

Se pou yo fè pitit moun yo konnen mèvèy ou yo, ak glwa grandè peyi wa w’ la.

Peyi wa w’ la se peyi wa tout tan, kòmandman w’ nan pou jenerasyon ak jenerasyon.R.

Granmèt la kòrèk nan tout wout li yo, li sen nan tout aksyon l’ yo. Granmèt la tou pre tout moun k’ap rele l’ yo, tout moun k’ap rele l’ nan verite.R.

LEVANJIL

“Men pitit Izrayèl tout bon vre, nan li pa gen manti”.

MEN BÒN NOUVÈL JEZIKRI A DAPRÈ JAN KI SEN 1, 45-51

Lè sa a:

Filip jwenn Natanayèl, li di l’: “Sa a Moyiz te ekri sou li nan lalwa a ak pwofèt yo, nou jwenn li, se Jezi, pitit Jozèf, moun Nazarèt la.

Natanayèl di l’: “Nazarèt! Èske yon bagay ki bon kapab sòti la?”

Filip di l’: “Vini w’a wè”.

Jezi wè Natanayèl k’ap vin kote l’, li di sou li: “Men yon pitit Izrayèl tout bon vre, nan li pa gen manti”.

Natanayèl di l’: “Kote ou konnen m’?”

Jezi reponn, li di l’: “Anvan Filip te rele ou, lè ou te anba pye figye a, mwen te wè ou”.

Natanayèl reponn li, li di: “Rabi, ou se Pitit Bondye, ou se wa Izrayèl”.

Jezi reponn, li di l’: “Paske mwen di ou “Mwen te wè ou anba pye figye a”, ou kwè: w’ap wè pi gran bagay pase sa”.

Epi li di l’: “Amèn, amèn mwen di nou: n’ap wè syèl la louvri, epi zanj Bondye yo k’ap monte-desann anlè Pitit moun nan”.

An nou fè lwanj ak konpliman pou pawòl Bondye a.

REFLEKSYON: Nan tèks nou li nan liv Apokalips Sen Jan an, nou wè vizyon Jan ki montre nou imaj Jerizalèm ki bèl, ki klere anpil. Imaj sa pèmèt nou konprannn tankou kretyen ke nou pa dwe janm dekouraje, ke nou dwe toujou kenbe fèm pou nou pa janm lage pawòl Bondye a, paske nou gen pou nou al viv nan glwa Granmèt la ki gen tout pouvwa, viv pou tout tan nan kè kontan, kote p’ap gen tristès, kote kè nou ap toujou kontan, kote n’ap jwenn tout sa nou gen bezwen, kote lavi nou p’ap janm fini.

Nou wè imaj douz lan tou ki trè enpòtan nan Bib la, paske si n’ap swiv byen, te gen douz disip ki te pwòch Jezi anpil, Izrayèl te gen douz tribi, etc… Liv Apokalips la tou pèmèt nou wè e konprann tou, kòman Bondye gran, kòman pouvwa li san limit e tout bèl pwojè li genyen pou nou kòm pitit li.

Aprè sa nou fin wè nan liv Apokalips la, Levanjil sen Jan fè nou konprann ke nou dwe kwè san nou pa wè. Paske istwa Filip ak Natanayèl la, se yon istwa ki trè klè. Nou wè kot Filip wè Nan Jezi pitit Jozèf la sa ki ekri nan lwa Moyiz la e kote Natanayèl paka kwè ke Nazarèt ka gen yon bagay ki bon ki sòti ladan l’. Lè Natanayèl rive kot Jezi, li wè nonm sa konn tout sa k’ap pase, lè sa li kwè. Li enpòtan pou nou menm jodi a kòm kretyen met lafwa nou nan Bondye san nou pa wè; fòk nou pa tann se yon mirak, se yon bagay sinatirèl ki pou fè nou kwè. Paske nan Bib la Jezi fè nou konnen ak lafwa, nou kapab fè anpil bagay, nou menm kapab deplase montay yo. Se poutèt sa, kòm kretyen nou dwe fè Bondye konfyans nan tout sa n’ap fè, nan fason n’ap viv, paske se li ki sèl wa. Li konnen tout sa nou kapab fè e tout sa k’ap pase nan lavi nou.

LAPRIYÈ: Bondye papa nou, ou menm ki kreye tout bagay, fè nou toujou rete nan volonte w’, pou nou fè sa ki byen, pou nou pa janm dekouraje. Fè nou toujou rete pitit ou nan jan n’ap viv, pou nou toujou kwè ou ka fè tout bagay e kwè nan lavi ki p’ap janm fini an Amèn.

PWOPOZISYON: Nou menm kretyen jodi a, nou dwe fè Bondye konfyans nan eprèv nou yo, menm si tout bagay parèt nwa pou nou. Nou dwe toujou fè sa ki byen e viv jan Bonbye mande, se konsa n’ap kapab viv nan kè kontan pou toutan.

DIMANCH 23

Koulè Vèt

Venteyinyèm Dimanch Òdinè, Ane B

PREMYE LEKTI

"N’ap sèvi Granmèt la, paske se li menm ki Bondye nou".

LEKTI LIV JOZYE 24, l-2a. 15-17. 18b

Jou sa yo:

Jozye rasanble tout ras Izrayèl yo Sikèm, li rele ansyen yo ak chèf yo ak jij yo ak majistra yo, yo kanpe devan fas Granmèt la, li pale ak pèp la, li di: "Si nou konsidere sa mal pou nou sèvi Granmèt la, nou mèt chwazi: jodi a menm chwazi sa nou pito, sa nou pi pito sèvi, oubyen se zidòl yo zansèt nou yo te konn sèvi nan Mezopotami an, oubyen zidòl Amoreyen yo, nan peyi yo kote nou abite a; kanta mwen menm ak kay mwen, n’ap sèvi Granmèt la".

Pèp la reponn, li di: "Se pou lide sa a ret lwen nou, pou nou ta abandone Granmèt la pou nou ta sèvi dye etranje. Granmèt la Bondye nou an se li menm ki mennen nou, ni zansèt nou yo, sot nan peyi Lejip la, sot nan kay esklavaj la, li fè nou wè mèvèy ekstrawòdinè, li pwoteje nou sou tout wout kote nou pase, ak nan pèp kote nou travèse. Konsa se Granmèt la n’ap sèvi, paske se li menm ki Bondye nou".

Pawòl Granmèt la.                                                                                                         

SÒM REPONS  33, 2-3. 16-17. 18-19. 20. 21. 22-23 (r.: 9a)

R/ Goute, n’a wè kijan Granmèt la bon.

M’ap fè konpliman pou Granmèt la nan tout okazyon, tout tan lwanj li nan bouch mwen.

Nan Granmèt la nam mwen ap jwenn bèlte l’ se pou pòv yo tande, pou yo kontan.R.

Je Granmèt la sou moun ki kòrèk yo, zòrèy li sou rèl yo.

Fas Granmèt la sou moun k’ap fè mal yo, pou l’ fè souvni yo disparèt sot sou tè a.R.

Granmèt la tou pre moun ki gen kè yo kraze yo, l’ap sove sa k’ gen lespri yo boulvèse yo.  Yo rele, Granmèt la tande, nan tout tray yo li delivre yo.R.

Moun ki kòrèk yo jwenn anpil tray, men Granmèt la ap delivre yo sot nan tout.

L’ap pwoteje tout zo yo, youn nan yo p’ap kraze.R.

Mechanste a ap touye mechan an, moun ki rayi sa k’ kòrèk la, y’ap jwenn pinisyon.

Granmèt la ap delivre nam sèvitè l’ yo, tout moun ki espere nan li yo, yo p’ap jwenn pinisyon.R.

DEZYÈM LEKTI

"Sakreman sa a gran, nan Kris la ak nan legliz la".

LEKTI LÈT APOT PÒL KI SEN POU MOUN EFÈZ YO 5, 21-32

Frè m’ yo:

Se pou nou youn obeyi lòt nan respè Jezikri. Se pou medam yo obeyi mari yo tankou y’ap obeyi Granmèt la; paske mari a se tèt madanm nan, tankou Jezikri se tèt Legliz la, li menm ki sovè kò l’ la. Men menm jan legliz la obeyi Jezikri a, se konsa tou pou medam yo obeyi mari yo nan tout bagay.

Mari yo, se pou nou renmen madanm nou, tankou Jezikri te renmen legliz la, epi li te renmèt tèt li pou li, pou l’ te kapab fè l’ vin sen, antan l’ pwopte l’ ak beny dlo a nan pawòl lavi a, pou l’ te kapab prezante legliz la nan bèlte a devan li, san l’ pa gen tach ni pli, ni anyen nan sans sa a; men pou l’ sen, san defo. Konsa mesye yo dwe renmen madanm yo tou, tankou kò yo. Moun ki renmen madanm li, se pwòp tèt li li renmen. Pèsòn pa janm gen rayisans pou pwòp chè l’, men li nouri l’, li swen l’, menm jan Jezikri fè pou legliz la, paske nou se manb kò l’, nou fè pati chè l’ ak zo l’.

Poutèt sa, moun nan ap kite papa l’ ak manman l’, l’ap kole kò l’ kot madanm li, yo de a ap yon sèl chè. Sakreman sa a gran, m’ap pale pou Jezikri ak legliz la.

Pawòl Granmèt la.

LEVANJIL

"Kot ki moun pou n’ ale? Ou gen pawòl lavi tout tan an".

MEN BÒN NOUVÈL JEZIKRI A DAPRÈ SEN JAN 6, 61-70

Lè sa a:

Anpil nan disip Jezi yo te di: "Pawòl sa a rèd, ki moun ki kapab tande l’?"

Jezi konnen disip li yo t’ap babye sou sa antre yo, li di yo: "Sa dekontwole nou? Si nou te wè Pitit moun nan k’ap monte kote l’ te ye anvan an? Se Lespri a ki bay lavi, chè a pa kapab sèvi anyen. Pawòl yo mwen pale nou an, se lespri ak lavi yo ye. Men genyen nan nou ki pa kwè". Jezi te konnen depi nan kòmansman kilès ki pa t’ kwè, epi kilès ki t’ap renmèt li a.

Li di: "Se pousa mwen te di nou, pèsònn pa kapab vin jwenn mwen, si se pa yon favè Papa m’ fè li".

Depi lè sa a anpil nan disip li yo pati kite l’, yo pa mache avèk li ankò.

Jezi di douz yo: "Èske nou menm tou nou vle pati?"

Simon Pyè reponn: "Granmèt, kot ki moun pou n’ale?" Ou gen pawòl lavi tout tan an. Nou menm nou kwè, nou konnen ou se Kris la Pitit Bondye a".

An nou fè lwanj ak konpliman pou pawòl Bondye a.

REFLEKSYON: Nan 21^èm dimanch tan senp lan, pawòl Bondye a envite n’, ak linèt lafwa nou,  pou n’ dekouvri kilès Jezi (Pitit li a) ye pou nou. Jezi vini pou sove tout moun san okenn patipri, san gade sou figi pèson, sou  nasyonalite, koulè, entelijans ak kapasite.

Nan premye moso labib la (Joz 24, 1-2. 15-17), se prèske sa nou dekouvri: Bondye ki  chwazi pwofèt Jozye pou akonpanye pèp la nan ede l’ refè angajman zansèt li yo te pran pou li nan pye mòn Sinayi a. Se tankou yon deklarasyon lafwa pèp la fè anba pye bwa Sikèm nan, kot Abraam te premye adore Bondye a (Gn12,26). Pèp la rive nan laj pou l’ pran desizyon pou kont li, Jozye kòm ranplasan Moyiz, aprè l’ fin fè pèp la travèse larivyè jouden an, li fè l’ refè angajman batèm li, sa zansèt li te pran pou li depi lontan an.

Se kòmsi lè nou fin batize kòm timoun, rive yon lè nou vin gen laj pou nou angaje tèt nou pou kont nou, nou fè pwòp angajman nou.

Jezi chwazi Apot yo san yo pa t’ merite sa.Yo te vin jwenn li san yo pa fè tèt di. Li fè anpil mèvèy devan yo tankou nan nòs Kana, kote li te fè dlo tounen diven; tankou nan dezè a kote li bay senk mil moun manje avèk senk ti pen ak de ti pwason.

Nan dezyèm moso labib la (Ef. 5, 21-32), Apot Pòl pwofite rakonte nou kòman Jezi mouri e li leve pou rasanble tout moun ansanm nan yon sèl pèp, nan yon sèl kò. Men, se Lespri Sen an ki nanm kò sa a. Se li tou ki fè chak patizan Jezikri chèche wè kisa ki volonte Granmèt la. ‘‘Madanm, mache sou lòd mari w’, e mari mache sou lòd madanm ou, tankou si se sou lòd Granmèt la. Nan fanmi an, se mari a ki tèt, menm jan Kris la se tèt Legliz la, li menm ki sove kò a. Menm jan, Legliz la sou lòd Kris la, se konsa pou madanm nan sou lòd mari a nan tout bagay. Mesye, renmen madanm ou menm jan Kris la renmen legliz la. Si Kris la kòm tèt la, pa renmen Legliz la ki se kò a, se konsa tou, mari a kòm tèt fanmi an p’ap renmen madanm li.

Konsa, se pou mesye yo renmen madanm yo menm jan ak tèt yo. Sa w’ pa renmen pou tèt ou, pa renmen l’ pou madanm ou. Pasaj sa se yon bon leson katechèz pou lafanmi ki vle devlope kòmsadwa.

Nan fanmi ki divize, ki kraze, youn pa respekte lòt : manman pa ka pale ak pitit, pitit pa ka pale ak papa e papa pa ka pale ak madanm. Se chen manje chen.

Nan levanjil la, Jezi tounen ak kesyon lekaristi a nan reyinyon li t’ap fè ak foul la nan Kafanawòm: ‘‘moun ki manje kò mwen, moun ki bwè san mwen, ap gen lavi ki p’ap janm fini an’’. Pawòl sa a te lakòz anpil bougonnen ak babye nan mitan patizan l’ yo.

Jezi di yo ankò, pèsonn pa ka vin jwenn mwen si se pa Papa a ki fè l’ favè a. Nan sans sa a, Jezi vle fè nou konnen li se kanal, sèl chemen k’ap pemèt nou rive jwenn Papa a. Jezi se sila a ki gen pawòl lavi ki p’ap janm fini an. Nou menm, nou kwè, e nou konnen, Jezi se sila a Bondye chwazi a. Gras a li menm nou vin tounen pitit adpotif. E tankou Apot Pòl di nou sa, si nou se pitit nou se eritye tou.Konsa, ann travay pou nou ka resevwa bèl eritaj Papa nou ki nan syèl la.

LAPRIYÈ: Bondye Papa, tanpri, pa lantremiz Manman Mari, ede nou vin wè pi klè nan kalite misyon ou konfye nou. Amèn!

PWOPOZISYON: Sonje angajman mwen te pran ak Granmèt. Sonje ki responsabilite mwen genyen nan fanmi mwen.

SAMDI 22

Koulè Blan

MARI KI SEN, KI VYÈJ, KI RÈN

(Memwa)

PREMYE LEKTI

"Yo ba nou yon pitit gason".

LEKTI LIV PWOFÈT IZAYI 9, 2-4. 6-7

Pèp ki t’ap mache nan fènwa a, li wè yon gran limyè, moun ki te abite nan rejyon lonbraj lanmò yo, limyè klere sou yo. Ou te fè nasyon an vin anpil, men ou pa t’ ba l’ anpil kè kontan. Y’ap kontan devan ou, tankou moun k’ap fete nan rekòlt, tankou moun k’ap fete lè yo ranpòte viktwa, lè yo pran richès lagè, lè y’ap separe sa yo pran nan lagè a. Sèke jouk la ki te chaje l’ la, baton an ki te sou zepòl li a, bagèt moun ki t’ap fè l’ pase tray la, ou kraze sa, tankou nan jou Madyan an.

Yon ti pitit fèt pou nou, yo ba nou yon ti gason, kòmandman an sou zepòl li: y’ap rele non l’ "Sa a ki merite yo admire l’ la, Sa a k’ap bay konsèy la, Bondye a, Fò a, Papa syèk tan k’ap vini an, Chèf lapè a".

Peyi wa l’ la ap grandi, lapè a p’ap gen finisman; l’ap chita sou twòn David la ak sou peyi wa l’ la, pou l’ fè l’ vin solid, pou l’ asire l’ nan jijman ak jistis, depi koulye a ak pou tout tan. Se Granmèt lame yo k’ap fè sa, a fòs li anvi pou l’ sèl Wa-a.

Pawòl Granmèt la.

SÒM REPONS 112, 1-2. 3-4. 5-6. 7-8 (r.: 2)

R/ Se pou non Granmèt la beni pou tout tan.

Fè lwanj, ti moun Granmèt la, fè lwanj pou non Granmèt la.

Se pou non Granmèt la beni depi koulye a ak pou tout tan.R.

Depi sot olevan jous rive okouchan, non Granmèt la merite lwanj.

Granmèt la anlè nèt anwo tout nasyon yo, anlè syèl yo glwa li ye.R.

Kilès ki tankou Granmèt Bondye nou an, ki abite nan wotè yo,

ki voye je sou pòv yo nan syèl la ak sou tè a? R.

Li leve pòv la sot atè a, li drese malere a sot nan fatra a,

Pou l’ fè l’ chita avèk chèf yo, avèk chèf pèp li a.R.

LEVANJIL

"Men w’ap ansent, w’ap anfante yon ti gason".

MEN BÒN NOUVÈL JEZIKRI A DAPRÈ SEN LIK       1, 26-38

Lè sa a:

Bondye voye anj Gabriyèl nan yon vil Galile yo rele Nazarèt, kot yon vyèj ki te fiyanse avèk yon mesye yo te rele Jozèf, nan kay David la; non vyèj la se te Mari.

Anj la antre kote l’, li di: "Salu ou menm ki plen gras, Granmèt la avèk ou, ou beni pami tout fi". Lè l’ tande sa, li twouble poutèt pawòl li a, li t’ap kalkile ki kalite mòd salye sa a.

Anj la di l’: "Pa pè, Mari; ou jwenn gras kot Bondye: men w’ap ansent, w’ap anfante yon ti pitit gason, w’ap rele non l’ Jezi. L’ap gran, y’ap rele l’ Pitit Sa a ki anwo nèt la, Granmèt Bondye ap ba li twòn David papa l’ la, l’ap kòmande kòm wa nan kay Jakòb la pou tout tan, peyi wa li a p’ap janm fini".

Mari di anj la: "Kijan pou sa fèt, paske mwen pa gen konesans lèzòm?"

Anj la reponn, li di l’: "Espri Sen an ap vini nan ou, fòs Sa a ki anwo nèt la ap kouvri ou ak lonbraj Li. Se pousa sa a k’ap fèt nan ou a, l’ap sen, y’ap rele l’ Pitit Bondye. Men Elizabèt, kouzin ou an, li menm tou li ansent yon ti gason nan vyeyès li a; mwa sa a se sizyèm nan pou sa a yo te rele pa kapab fè pitit la; paske anyen pa enposib kot Bondye".

Mari di: "Men sèvant Granmèt la; se pou sa fèt pou mwen daprè pawòl ou a". Epi Anj la pati kite l’.

An nou fè lwanj ak konpliman pou pawòl Bondye a.

REFLEKSYON: Frѐ ak sѐ m’ yo, reflechi sou pawὸl Bondye, mete l’an pratik nan lavi nou, se pi gwo devwa yon kretyen. Se sa ki fè nou toujou pran tan pou nou pataje ansanm pawὸl lavi a.

Nan pwemye moso Labib la, pwofѐt Izayi prezante Jezi tankou limyѐ ki vini pou klere tout pѐp, tout nasyon ; konsa nou dwe fѐ kѐ nou kontan paske li vin kase tout chenn esklavaj ki te mare nou, li vin libere nou anba tout sa ki t’ap fѐ nou soufri.

Pi devan, nan Levanjil la, nou wѐ kὸman tout sa pwofet Izayi t’ap anonse sou ti pitit la, yo rive reyalize lѐ Bondye te voye lanj Gabriyѐl kote Mari, yon ti jѐn fi, moun  Nazarѐt, pou l’ te anonse l’ ke li ta pral pote Sovѐ a.

Jodi a 22 out, nan Legliz Katolik, n’ap fete Mari ki Rѐn syѐl la ak  tѐ a, li menm ki te aksepte di wi pou plan Bondye a te kapab reyalize, plan pou l’ te sove limanite. Bѐl pasaj nou li nan Levanjil jodi a fѐ nou wѐ ke jѐn ti fi Nazarѐt sa a te san peche e se Bondye ki te chwazi l’ depi lontan. Manman l’ ak papa l’ te leve l’ nan lafwa san yo pa t’ konnen li te gen pou l’ te vin manman Sovѐ a.

Nou kapab di pwen santral Levanjil jodi a, se repons Mari bay lanj Gabriyѐl, lѐ li di l’ : ‘‘Mwen se sѐvant Granmѐt la, se pou sa fѐt jan ou di a’’. Yon sѐl fraz sa a rezime imilite, konfyans Mari genyen pou l’ te abandone l’ nѐt nan men Bondye. Donk nou kapab di Mari se kanal delivrans la, paske se pa li menm Bondye pase  pou l’ pote delivrans nan lemond. Nou menm, menm jan ak manman Mari se pou nou abandone nou, bese nou byen ba, fѐ nou dosil nan fѐ volonte Bondye.

LAPRIYE:Bondye Papa, ou menm ki te prezѐve Mari de tout peche pou l’ te kapab soumѐt devan w’ pou plan sove lezὸm te kapab reyalize, ede nou imite Mari dekwa pou nou kapab sanble avèk li, pou, menm jan ak li nou tounen zouti nan men w’ pou sove frè ak sè nou yo k’ap soufri.

PWOPOZISYON:Pran manman Mari kὸm modѐl nou epi rekonѐt li kὸm rѐn syѐl ak tѐ a.