LENDI 28

Koulè Blan

OGISTEN KI SEN, Evèk e Savan sakre Legliz la

(Memwa)

PRÉMIÉ LÉKTU

"Nou chanje chemen sot nan zidòl yo vin jwenn Bondye, n’ap espere Pitit li a li fè leve vivan an".

KÒMANSMAN PREMYE LÈT APOT PÒL KI SEN POU TESALONISYEN YO 1, 1-5. 8b-10

Pòl ak Silven ak Timote, pou legliz Tesalonisyen yo nan Bondye Papa a ak Granmèt Jezikri. Favè pou nou ak lapè.

N’ap di Bondye mèsi tout tan pou nou tout, antan n’ap sonje nou nan lapriyè nou san rete; n’ap sonje travay lafwa nou, lapenn nou, charite nou, epi jan nou ret fèm nan espwa Granmèt nou Jezikri devan Bondye Papa nou.

Nou konnen, frè nou yo Bondye renmen an, kijan li chwazi nou: Levanjil nou an pa t’ rive kote nou nan pawòl sèlman, men nan pouvwa ak nan Lespri Sen, ak nan anpil reyalizasyon ki kòrèk nèt, jan nou konnen kijan nou te konpòte nou kote nou poutèt nou.

Lafwa nou an, ki veritab lafwa nan Bondye a, li vanse devan tout kote, atèl pwen nou pa bezwen di anyen ankò; se yo menm menm k’ap anonse sou nou kijan nou te rive lakay nou epi kijan nou menm menm nou te chanje chemen sot nan zidòl yo vin jwenn Bondye, pou nou sèvi Bondye ki vivan an, ki vre a, pou nou tann Pitit li a k’ap sot nan syèl la, li menm li te fè leve vivan sot nan pami mò yo: Jezi, ki delivre nou anba kòlè k’ap vini an.

Pawòl Granmèt la.

SÒM REPONS 149, 1-2. 3-4. 5-6a e 9b (r.: 4a)

R/ Granmèt la jwenn plezi nan pèp li a.

Chante pou Granmèt la yon kantik nouvo; lwanj li nan legliz sen yo.

Se pou Izrayèl kontan nan sila a ki fè l’ la, se pou pitit Siyon yo danse pou wa yo a.R.

Se pou yo fè lwanj pou non l’ avèk dans, sou tanbou ak gita se pou yo chante pou li.

Paske Granmèt la jwenn plezi nan pèp li a,

L’ap fè pòv yo jwenn konsiderasyon nan delivrans la.

Se pou sen yo fete nan bèlte a, se pou yo kontan sou kabann yo.

Lwanj Bondye yo nan bouch yo: bèlte sa a pou tout sen l’ yo.R.

LEVANJIL

"Madichon pou nou, chèf avèg".

MEN BÒN NOUVÈL JEZIKRI A DAPRÈ MATYE KI SEN 23, 13- 22

Lè sa a: Jezi pale, li di:

"Madichon pou nou, pwofesè ak farizyen ipokrit, paské nou fèmin ringn sièl yo dévan moun yo ! Nou minm nou pa antré, épi moun k-ap antré yo, nou pa kité yo antré.

Madichon pou nou, profésè ak farizyin ipokrit, paské n-ap manjé kay vèv yo, pandan n-ap fè lapriyè ki long; sé pousa n-ap jouinn kondanasion ki pi rèd !

Madichon pou nou, profésè ak farizyen ipokrit, paske n’ap fè tout tou lanmè a ak savann nan pou nou fè yon disip; men lè nou fin pran l’, nou fè l’ vin tounen pitit lanfè a de fwa plis pase nou!

Madichon pou nou, chèf avèg, k’ap di: «Moun ki fè sèman sou kay sakre a, sa pa anyen; men moun ki fè sèman sou lò kay sakre a, li gen dèt». Enbesil, avèg! Ki sa ki pi gran: lò a oubyen kay sakre a ki fè lò a vin sen an?

«Epi moun ki fè sèman sou lotèl la, sa pa anyen; men moun ki fè sèman sou kado a ki sou li a, li gen dèt». Avèg! Ki sa k’ pi gran: kado a oubyen lotèl la ki fè kado a vin sen an?

Moun ki fè sèman sou lotèl la, li fè sèman sou li, ak sou tout sa k’ sou li. Moun ki fè sèman sou kay sakre a, li fè sèman sou li ak sou sila a ki abite nan li a. Moun ki fè sèman sou syèl la, li fè sèman sou fotèy Bondye a, ak sou sila a ki chita sou li a".

An nou fè lwanj ak konpliman pou pawòl Bondye a.

REFLEKSYON: «Madichon pou nou, pwofesè ak farizyen ipokrit, paske nou fèmen rèy syèl yo devan moun yo! Nou menm nou pa antre, epi moun k’ap antre yo, nou pa kite yo antre».

Lè ou mennen yon moun nan malè, ou pa montre li chemen lavi, men se chemen lanmò ou montre li. Moun ki aprann yon moun touye lòt, se pa yon pwofesè li ye men li se yon ‘‘asasen’’.

Jodi a, nou ta kapab di kè Jezi pa twò kontan; li an kòlè avèk sila yo ki di yo se lidè epi k’ap fè lòt yo pèdi chemen, y’ap fè yo pèdi gou lavi, e finalman yo fè yo pèdi menm lavi a menm: « Madichon pou nou, pwofesè ak farizyen ipokrit, paske n’ap fè tout tou lanmè a ak savann nan pou nou fè yon disip; men lè nou fin pran l’, nou fè l’ vin tounen pitit lanfè a de fwa plis pase nou!» (Mt 23,15).

Farizyen yo chèche tout fason pou yo fè lòt moun kwè nan sa yo kwè; pa nan sa ki konsène Bondye, men nan sa ki konsène yo menm.Yo vle fè moun yo tounen pitit lanfè. Lògèy yo p’ap mennen yo nan syèl la, li p’ap mennen yo nan lavi, men nan pèdisyon. Yo pa manke nan erè!

Jezi di farizyen yo: «Nou menm k'ap kondi pèp la, nou se yon bann avèg pou tèt pa nou. Nou pase lèt la nan paswa pou nou wete ti mouch ki tonbe ladan li. Men, nou vale yon chwal! » (Mt 24,24). Tout bagay tèt anba, pandan plizyè fwa Granmèt la eseye ovri zòrèy farizyen yo, men pwofèt Zakari deja di nou «Men, yo te derefize koute. Yo t'ap fè wondonmon. Yo bouche zòrèy yo pou yo pa tande» (Zakari 7,11).

Epi nan jou Jijman an, Jij la va di yo: «Mwen pa t' janm konnen nou. Wete kò nou sou mwen, nou menm k'ap fè sa ki mal» (Mt 7,23).  Sa ki enpòtan pou nou menm, frè ak sè mwen yo, se konnen verite a epi fè lòt moun konnen li antan nou rete fidèl nan sèvis Kris la. An nou sonje sa Sen Toma d’Aken te di: «Moun ki leve tèt yo, yo bese verite a!»

LAPRIYÈ: Granmèt, fè m’ konprann Pawòl ou, pou l’ pa tounen yon chay pou mwen, men pou li libere mwen.

PWOPOZISYON: Si m’ viv nan lanmou ak pwochen mwen san ipokrizi, m’a fè Bondye plezi tout bon.

DIMANCH 27

VENTEYINYÈM DIMANCH TAN ÒDINÈ, ANE A.

Koulè Vèt

PREMYE LEKTI

«M’ap mete kle kay David la sou zepòl li»

LEKTI LIV PWOFÈT IZAYI

22, 19-23

Men sa Granmèt la di Sobna, responsab kay sakre a:

«M’ap chase ou sot nan pòs ou a, m’ap retire ou sot nan sèvis ou a. Jou sa a, m’ap rele sèvitè m’ nan Elyasim, pitit Elsyas, m’ap abiye l’ ak rad ou a, m’ap mare senti l’ ak sentiwon ou nan, m’ap renmèt pouvwa ou la nan men l’; l’ap tankou yon papa pou moun yo ki abite Jerizalèm nan ak kay Jida a.

M’ap renmèt kle kay David la sou zepòl li; l’ap louvri, pèsòn p’ap kapab fèmen; l’ap fèmen, pèsòn p’ap kapab louvri. M’ap fikse l’ tankou yon poto nan yon kote ki solid, l’ap tankou yon fotèy bèlte nan lakay papa l’ la».

Pawòl Granmèt la.

SÒM REPONS 137, l-2a.2bc-3. 6 e 8bc

R/ Granmèt, kè sansib ou pou tout tan: travay men ou yo, pa lage l’.

M’ap fè lwanj ou, Granmèt, ak tout kè m’, paske ou tande pawòl bouch mwen.

Devan mesaje yo m’ap chante pou ou, m’ap adore ou nan kay sakre ou la ki sen an.R.

M’ap fè louanj pou non-ou poutèt kè sansib ou ak verite ou.

Nan nenpòt ki jou mwen rele ou, ou reponn mwen; ou mete anpil fòs nan nam mwen.R.

Sèke Granmèt la wo anlè a, li voye je sou pòv la, li rekonèt grandizè a byen lwen. Granmèt, kè sansib ou pou tout tan: travay men ou yo, pa lage l’.R.

DEZYÈM LEKTI

«Se nan sous li, se pa lantremiz li, se nan li menm tout bagay ekziste»

LEKTI LÈT APOT PÒL KI SEN POU WOMEN YO 11, 33-36

Ala wotè richès sajès ak syans Bondye! Yo pa kapab konprann jijman l’ yo, yo pa kapab sonde chemen l’ yo! Ki moun ki te konnen lespri Granmèt la? Oubyen ki moun ki te ba l’ konsèy? Oubyen ki moun ki te fè l’ favè anvan, pou l’ blije renmèt li sa? Sèke se nan sous li, se pa lantremiz li, se nan li menm tout bagay ekziste. Konpliman pou li pou tout tan! Amèn.

Pawòl Granmèt la.

LEVANJIL

«Ou se Pyè, m’ap ba ou kle peyi wa syèl la»

MEN BÒN NOUVÈL JEZIKRI A DAPRÈ MATYE KI SEN

16, 13- 20

Lèsa a:

Jezi rive nan rejyon Sezare Filip la, li poze disip li yo kesyon, li di: «Ki sa moun yo di osijè Pitit moun nan? »

Yo menm yo di: «Yon pòsyon di se Jan-Batis, yon lòt se Eli, yon lòt menm se Jeremi oubyen youn nan pwofèt yo».

Jezi di yo: «E nou menm, ki sa nou di mwen ye?»

Simon Pyè pran lapawòl, li di: «Ou se Kris la, Pitit Bondye ki vivan an».

Jezi menm pran lapawòl, li di: «Se chans pou ou, Simon, pitit Jan, paske se pa chè a ak san an ki devwale ou sa, men se Papa m’, ki nan syèl la. Mwen menm mwen di ou ou se Pyè, se pou pyè sa a menm m’ap bati legliz mwen an, pòt lanfè yo pap ranpòte laviktwa kont li. M’ap ba ou kle peyi wa syèl yo; tout sa w’ap mare sou tè a, l’ap mare nan syèl la; tout sa w’ap lage sou tè a, l’ap lage nan syèl la tou». Lè sa a atò, li pase disip li yo lòd, pou yo pa di pèsonn li se Kris la.

An nou fè lwanj ak konpliman pou pawòl Bondye a.

REFLEKSYON: Jodi a se venteinyèm dimanch tan senp (Ane litijik A).  Se jou Granmèt la (dies Domini), jou Rezireksyon, jou lavi pote laviktwa sou lanmò. Se jou solèy la leve ak tout klète li, paske se jou sa Bondye papa a te fè Pitit li a leve byen vivan sòti nan tonbo a. N’ap di Granmèt la mèsi pou kokenn chenn mèvèy sa, mèvèy ki pote lespwa yon lavi tou nèf pou tout moun. An nou gade ki mesaj pawòl Bondye a pote pou nou jodi a.

Nan premye lekti a, yo rakonte nou yon istwa ki sanble anpil ak sa nou li nan pòsyon Levanjil Matye pou jodi a. Tandiske dezyèm Lekti parèt tankou yon kantik pou fè lwanj ak konpliman pou Bondye ki kreye linivè ak yon sajès ekstrawòdinè. Sen Pòl byen eksplike nou, se Sajès Bondye ki anfante tout bagay: «se nan li menm tout bagay ekziste». (Wom 11, 36). Konsa, se pout kreyati koube byen ba devan Bondye pou adore grandè non li nan gwo chan ak tout enstriman. Paske Bondye gen kè li sansib, li pa bliye sa li kreye yo (Sòm 137).

An nou fè yon ti fikse atansyon nou sou Levanjil la kounye a. Pòsyon Levanjil sa se youn nan pasaj ki trè enpòtan nan istwa pèp Izrayèl, puiske li make ak yon dezisyon istorik Jezi te pran sou sa ki konsène Legliz la.

Deklarasyon lafwa Pyè, nan rejyon Sezare Filip la, inogire dènye etap nan ministè piblik Jezi e li prepare nou pou nou viv evénman desizif lanmò ak rezireksyon li. Aprè Jezi te fin miltipliye pen ak pwason yo, li te deside ale yon kote ki apa ansanm ak disip li yo pou li te ka apwofondi fòmasyon yo. Se atravè disip li yo ke semans Wayòm syèl la te kòmanse devwale, Legliz la.

Sa fè de dimanch depi nou te tande kijan Pyè te kòmanse koule aprè li te fin mache sou dlo a, e nou te tande repwòch Jezi te fè li: «Lafwa ou piti, pouki sa ou fè dout?» (Mt 14,31). Jodi a repwòch la vin tounen yon konpliman: «Se chans pou ou, Simon, pitit Jan» (Mt 16, 17). Pyè kontan, paske li ouvri kè li pou li akeyi revelasyon Bondye a e li rekonèt Jezi kòm Pitit Bondye a ki te vin sove limanite. Pandan tout listwa, kesyon sa a toujou kontinye poze: «Ki sa moun yo di osijè Pitit moun nan? » (…) E nou menm, kisa nou di? (Mt 16,13-15).

Nou menm tou, nan yon moman oubyen nan yon lòt, nou te dwe reponn kesyon sa yo: Kisa Jezi ye pou mwen epi kisa mwen wè nan li? Lafwa nou te resevwa nan men paran nou, pwofesè katechèz, pè yo, zanmi nou, li vin tounen yon lafwa pèsonèl nan Jezikri, e nou menm tou nou dwe tounen temwen paske se sa ki poto mitan lafwa nan Jezikri.

Se lè nou gen lafwa epi nou viv nan kominyon ak Jezikri nou kapab rive venk puisans mal la. Rèy lanmò a manifeste nan mitan nou e li fè nou soufri, li pouse nou poze tèt nou kesyon; men Wayòm Bondye a manifeste nan mitan nou tou, antan li devwale nou esperans lan. Legliz la ki se sakreman Wayòm Bondye nan mond la, ki fonde sou wòch lafwa Pyè a, li fè nou gen lespwa ak kè kontan lavi ki p’ap janm fini an. Toutotan gen moun nan mond lan, ap toujou gen nesesite pou nou pote lespwa, e toutotan li nesesè pou nou pote lespwa, misyon Legliz la nesesè; se poutèt sa pouvwa lanfè a p’ap janm ka pote laviktwa sou Legliz la, puiske Kris la k’ap mache ansanm ak pèp li a li ba nou garanti.

LAPRIYÈ: Bondye, ou menm ki fè kè fidèl yo gen yon sèl volonte, fè pèp ou yo renmen sa ou kòmande, fè yo anvi sa ou pwomèt la, pou nan mitan divès chanjman k’ap fèt sou tè a, kè yo ret fikse kote ki gen vrè kè kontan an. Pa pouvwa Jezikri.

PWOPOZISYON: Pran yon ti tan nan jounen an pou adore Jezi. Di li mèsi pou Legliz la li ba nou kòm manman nou.

SAMDI 26

Koulè Vèt

PREMYE LEKTI

"Granmèt la pa aksepte pou manke yon moun pou kontinye fanmi ou a. Sila a se papa Jese, papa David".

LEKTI LIV RUT 2, 1-3. 8-11; 4, 13-17

Elimelèk, mari Noemi te gen yon moun nan fanmi li, yon mesye ki gen pouvwa, ki gen anpil richès, yo te rele l’ Bòoz.

Rut fi Moabit la, di bèlmè l’ konsa: "Si ou pase m’ lòd, m’a pral nan jaden, m’ap ranmase zepi yo k’ap tonbe sot nan men moun k’ap fè rekòlt yo, tout kote m’a jwenn favè bon kè pèd-fanmi an pou mwen". Li reponn li: "Ale, ti fi m’". Konsa l’ale, li ranmase zepi yo dèyè moun ki t’ap rekòlte yo.

Bòz di Rut: "Koute, mafi: pa al nan lòt jaden pou ou ranmase, pa pati kite kote sa a, men ret ansanm avèk sèvant mwen yo, kote y’ap rekòlte, suiv yo; sèke mwen pase sèvitè m’ yo lòd pou pèsòn pa fè ou malonnèt; men menm si ou swaf, al nan krich yo, bwè dlo, kote sèvitè yo ap bwè a".

Li tonbe sou fas li, li adore atè a, li di l’: "Kote sa sòti pou mwen, pou m’ jwenn favè devan je ou, pou ou aksepte rekonèt mwen, mwen menm ki yon madanm etranje?"

Li reponn li: "Yo rakonte m’ tout sa ou fè pou bèl-mè-ou aprè lanmò mari ou la, kijan ou kite fanmi ou yo ak peyi ou kote ou te fèt la, epi ou vini nan yon pèp ou pa t’ konnen anvan".

Konsa, Boòz pran Rut, li resevwa l’ kòm madanm li, l’al jwenn li, Granmèt la fè l’ favè pou l’ vin ansent, pou l’ fè yon ti gason.

Medanm yo di Noemi: "Konpliman pou Granmèt la ki pa pèmèt pou ou manke yon moun pou kontinye fanmi ou an, pou rele non l’ nan Izrayèl, pou ou kapab gen yon moun ki konsole nam ou, ni okipe vyeyès ou; se nan bèlfi ou la li fèt, li menm ki renmen ou nan, ki pi bon pou ou pase si ou te gen sèt pitit gason". Noemi pran ti pitit la, li poze l’ sou lestomak li, li sèvi l’ kòm nouris ak bòn.

Medam yo ki nan vwazinaj la, yo fè l’ konpliman, yo di: "Noemi gen yon pitit gason ki fèt pou li", yo rele non l’ Obèd. Se li menm ki papa Jese, papa David.

Pawòl Granmèt la.

SÒM REPONS 127, 1-2. 3. 4-5 (r.: 4)

R/ Men kijan moun ki respekte Granmèt la beni.

Se chans pou tout moun ki respekte Granmèt la, k’ap mache nan wout li yo.

Se fii travay men ou w’ap manje,

se chans pou ou, w’ap jwenn avantaj.R.

Madanm ou ap tankou yon jaden rezen ki byen donnen sou bò lakay ou;

pitit ou yo ap tankou jèn plant pye oliv alantou tab ou a.R.

Men se konsa moun nan ap beni, sa k’ respekte Granmèt la.

Se pou Granmèt la beni ou sot Siyon, se pou ou wè byen Jerizalèm toulejou lavi ou.R.

LEVANJIL

"Yo di, men yo pa fè".

MEN BÒN NOUVÈL JEZIKRI A DAPRÈ MATYE KI SEN 23, 1-12

Lè sa-a:

Jezi pale ak foul yo epi avèk disip li yo, li di:

"Sou fotèy Moyiz la pwofesè yo ak farizyen yo chita; tou sa yo di nou, obsève l’, fè l’, sèlman pa suiv sa yo fè: sèke yo di men yo pa fè. Yo mare chaj ki lou, bagay moun pa kapab pòte, yo mete yo sou zepòl moun yo; men yo pa vle souke yo ak yon ti dwèt. Tout aksyon yo, yo fè yo pou moun yo kapab wè yo: yo laji bwat priyè yo, yo lonje fil manch yo. Yo renmen premye plas nan soupe yo, ak premye chèz nan kay reyinyon yo, ak bèl bonjou sou laplas, epi pou moun yo rele yo 'Rabi'.

Kanta nou menm pa kite yo rele nou 'Rabi'; sèke se yon sèl la ki mèt nou, nou tout se frè nou ye. Epi pa rele moun 'papa' nou sou tè a; paske se yon sèl la ki Papa nou, ki nan syèl la. Pa kite yo rele nou 'mèt'; paske se yon sèl ki mèt nou, se Jezikri.

Moun ki pi gran nan pami nou an, se pou l’ vin tounen sèvitè nou. Moun ki leve tèt li, y’ap rabese l’, men moun ki rabese tèt li, y’ap leve l’".

An nou fè lwanj ak konpliman pou pawòl Bondye a.

REFLEKSYON: «Moun ki leve tèt li, y’ap rabese l’, men moun ki rabese tèt li, y’ap leve l’".

Jodi a, Jezi envite nou gen imilite, li envite nou pou nou mete nou nan vrè plas nou: Kanta nou menm pa kite yo rele nou 'Rabi' (…). Epi pa rele moun 'papa' nou sou tè-a. Pa kite yo rele nou 'mèt' (Mt. 23,8-10). Avan nou kouri dèyè gwo tit, an nou kòmanse di Bondye mèsi pito pou tout sa nou genyen, tout sa li ba nou.

Tankou Sen Pòl di sa: «Kilès ki di ou pi bon pase lòt yo? Kisa ou genyen se pa Bondye ki ba ou li? Enben, nan kondisyon sa a, poukisa w'ap fè grandizè pou sa ou genyen an tankou si se pa Bondye ki te ba ou li? (1 Ko 4,7). Kidonk, lè nou aji yon fason pou konsyans nou pa repwoche nou, li ta pi bon pou nou di: «Se domestik nou ye, nou fè sa n' te dwe fè» (Lik 17,10).

Lòm nan tan modèn nan ta sanble gen tèt li pa dwat: anpil fwa nou viv e nou aji kòm si se nou ki mèt lavi, kòm si se nou ki kreye lemond. Yon fason kontradiktwa, Aristòt se yon sous admirasyon: daprè tewoloji natirèl li a, li pa t’ konnen sa yo rele «kreyasyon» (nan epòk li t’ap viv la, moun yo pa t’ gen revelasyon sous a), poutan, pou Aristòt, mond nou an se Bondye ki te fè li (li te eseye eksplike sa lè li te pale de yon «Koz ki pa gen koz, oubyen Premye Motè». Nan sans sa li te vle montre mond la pa ekziste pou kont li.  Jan Pòl II mande nou sonje dèt nou genyen anvè Bondye: «Fòk moun nan fè lwanj pou Kreyatè li a, antan l’ap fè ofrann, nan di Bondye mèsi, nan fè konpliman pou li pou tout sa li resevwa nan men li. Moun nan pa ka bliye dèt sa, nan pami tout kreyati yo, se li menm sèl ki ka rekonèt li».

Si nou reflechi sou lavi espirityèl nou, kolaborasyon pa nou (Bondye pa fè anyen san patisipasyon pa nou), se kite Lespri Sen an fè travay li: Kite Bondye aji!, paske se pa nou se pa nou menm k’ap fè tèt nou vin kòrèk, se Bondye ki Mèt la, li menm ki Papa nou, se li k’ap fè nou gras sa a. Antouka, si nou kwè nou gran, oubyen nou gen yon merit, ann fè jefò pou nou mete sa nou ye a nan sèvis lòt yo: «Moun ki pi grannèg nan mitan nou an, se moun k'ap sèvi nou an.» (Mt 23,11)

LAPRIYÈ: Bondye Papa, ede m’ pa fè grandizè, antan m’ap beni non w’ pou tout kado mwen resevwa nan men w’. Pa pouvwa Jezikri. Amèn.

PWOPOZISYON: M’ap aprann sèvi pwochen mwen olye mwen tann yo sèvi mwen.

VANDREDI 25

Koulè Vèt

PREMYE LEKTI

“Noemi rive avèk Rut, fi Moab la, li tounen Bètleyèm”.

KÒMANSMAN LIV RUT

1, 1. 3-6. 14b-16. 22

Nan tan yon jij, lè jij yo t’ap kòmande a, te gen grangou nan peyi a. Gen yon mesye Bètleyèm Jida ki pati pou l’ al abite nan peyi Moabit yo avèk madanm li, avèk de pitit gason l’ yo.

Elimelèk, mari Noemi, mouri; madanm nan rete avèk pitit gason l’ yo, yo marye avèk fi Moabit yo, youn yo rele Orfa, lòt la menm Rut. Yo rete la pandan dizan, de gason yo mouri: madanm nan rete san de pitit gason l’ yo ni mari a.

Li leve pou l’ tounen sot nan peyi Moabit la avèk de bèlfi l’ yo; paske li te tande kijan Granmèt la te voye je sou pèp li a, li te ba yo manje.

Yo leve vwa yo, yo pran kriye ankò. Orfa anbrase bèlmè l’, li tounen lakay li; Rut kole kò l’ sou bèlmè l’.

Noemi di l’: “Men fanmi ou an tounen al jwenn pèp li ak dye l’ yo: ale avèk li”.

Li reponn: “Pa kontrarye m’ pou m’ kite ou, pou m’ pati; sèke nenpòt ki kote w’ a prale, m’a prale tou, kote w’ap mouri a, m’ap mouri tou; pèp pa m’, Bondye w’ la se Bondye m’”.

Noemi rive avèk Rut, fi Moabit la, bèlfi l’ la, sot nan peyi kote l’ t’al abite a, li tounen Bètleèm, nan kòmansman rekòlt ble yo.

Pawòl Granmèt la.

SÒM REPONS 145, 5-6. 7. 8-9a. 9bc-10

R/ Fè lwanj Granmèt la, nanm mwen.

Se chans pou sila a Bondye Jakòb la pote l’ sekou a, sila a ki gen espwa l’ nan Granmèt Bondye l’ la, li menm ki fè syèl la ak tè a, lanmè a ak tout sa k’ nan li.R.

Li menm ki kenbe verite a pou tout tan, li fè jijman pou moun y’ap maltrete yo, li bay sa k’ grangou yo manje. Granmèt la defèt chenn yo.R.

Granmèt la klere avèg yo, Granmèt la leve sa k’ tonbe yo, Granmèt la renmen moun ki kòrèk yo, Granmèt la pwoteje etranje yo.R.

Òfelen an ak vèv la, li soutni yo, men wout pechè yo, li gaye l’. Granmèt la ap wa pou tout tan, Bondye w’ la, Siyon, pou jenerasyon ak jenerasyon.R.

LEVANJIL

“Se pou ou renmen Granmèt Bondye w’ la, ak pwochen ou tankou ou menm”.

MEN BÒN NOUVÈL JEZIKRI A DAPRÈ MATYE KI SEN 22, 34- 40

Lè sa a:

Farizyen yo tande kijan Jezi te fèmen bouch sadiseyen yo, yo rasanble ansanm. Youn nan yo ki te savan nan lalwa a poze l’ kesyon, pou l’ eseye l’: “Mèt, kilès ki gran kòmandman an nan lalwa a?”

Jezi di l’: “Se pou ou renmen Granmèt Bondye w’ la ak tout kè ou, ak tout nanm ou, ak tout lespri ou”. Sa a se pi gran, se premye kòmandman an. Dezyèm nan menm sanble avèk li: “Se pou ou renmen pwochen an tankou pwòp tèt ou”. Se nan de kòmandman sa yo tout lalwa a pandye ansanm ak pwofèt yo”.

An nou fè lwanj ak konpliman pou pawòl Bondye a.

REFLEKSYON: Men 2 kòmandman ki pi konsekan yo: Renmen Bondye Granmèt la ak tout kè ou, ak tout nanm ou ak tout lespri ou, ak tout fòs ou; renmen pwochen w’ tankou tèt pa ou. Pa gen kòmandman ki pi konsekan pase 2 sa yo. Pwofesè lalwa yo te poze Jezi kesyon sa a, paske yo te konn gen anpil diskisyon antre yo, kòm nan tan sa a jwif yo te gen anpil kòmandman pou yo mete an pratik pou yo te fè volonte Bondye tout bon vre; e yo t’ap chèchè konnen nan tout kòmandman yo kilès ki pi gran.

Frè m’ak sèm yo, jodi a Jezi ap pale ak nou tankou pèp Izrayèl la, pèp Bondye chwazi mete apa pou li a, se li menm ki sèl mèt nou, se pou nou renmen l’ ak tout kè nou, ak tout nanm nou, ak tout fòs nou, e ak tout kouraj nou. Se bagay pou nou pa janm bliye, pou nou repete nan tèt nou tout kote n’ pase, ekri yo pou nou pa jan bliye yo paske nou tout se kreyati Bondye nou ye, li renmen n’ san mezi, san kondisyon; nou menm tou se pou nou fè menm jan avèk li. Anvan tout bagay se renmen, paske li te renmen nou an premye, pa chèchè bay anyen premye plas nan lavi nou sof Bondye. Si nou rive renmen l’ tout bon vre n’a renmen pwochen n’ yo.

Pafwa nou di nou renmen Bondye, nou bliye frè ak sè ki bò kote nou, nou pa konnen si yo ekziste. Si nou di nou renmen Bondye epi nou rayi frè ak sè nou, ki enpòtans sa genyen? Èske nou konn pran tan pou n’ reflechi lè nou gade lavi Bondye ba nou gratis? Kisa n’ap fè pou li, pou n montre l’ nou renmen l’ vre? Pandan n’ap chèchè renmen pwochen n’ tankou pwòp tèt pa nou, an nou tout renmen tankou Bondye, pou lavi nou sou tè a ka bèl. Jezi mande pou nou renmen.

LAPRIYÈ: Bondye Papa, tanpri ban mwen yon kè ki ba t’ pou ou toutan, yon kè ki devwe, yon kè ki sansib pou ou tout bon.  Pa pouvwa Jezikri. Amèn

PWOPOZISYON: Jodi a m’ap reflechi sou kalite renmen mwen gen nan kè m’ pou Bondye ak pou pwochen m’ yo.

JEDI 24

Koulè Wouj

BATELEMI KI SEN,

Apot (Fèt)

PREMYE LEKTI

“Nan fondasyon yo menm, te gen douz non Apot Mouton an”.

NAN LIV APOKALIPS APOT JAN KI SEN 21, 9b-14

Zanj la pale avèk mwen, li di: “Vini, m’ap montre ou madanm nan ki fèk marye ak Mouton an”.

Li soulve m’ nan espri sou yon mòn ki gran, ki wo, li montre m’ vil ki sen an, Jerizalèm, k’ap desann sot nan syèl la, kot Bondye, li gen glwa Bondye a; limyè l’ te tankou pyè kalite siperyè, tankou pyè yo rele jasp la, tankou kristal.

Li te gen yon miray ki gran, ki wo, ki gen douz pòt; nan pòt yo te gen douz zanj, te gen non ki ekri, non douz ras pitit Izrayèl yo.

Nan direksyon olevan: twa pòt; nan direksyon nò: twa pòt; nan direksyon sid: twa pòt; nan direksyon okouchan: twa pòt. Miray vil la te gen douz kolòn, sou yo te gen douz non douz Apot Mouton yo.

Pawòl Granmèt la.

SÒM REPONS 144, 10-11. 12-13ab. 17-18

R/ Granmèt, se pou sen w’ yo fè konnen glwa peyi wa w’ la.

Se pou yo fè lwanj ou, Granmèt, tout sa ou fè yo; se pou sen ou yo fè konpliman pou ou.

Se pou yo deklare glwa peyi wa w’ la, se pou yo anonse pouvwa ou.R.

Se pou yo fè pitit moun yo konnen mèvèy ou yo, ak glwa grandè peyi wa w’ la.

Peyi wa w’ la se peyi wa tout tan, kòmandman w’ nan pou jenerasyon ak jenerasyon.R.

Granmèt la kòrèk nan tout wout li yo, li sen nan tout aksyon l’ yo. Granmèt la tou pre tout moun k’ap rele l’ yo, tout moun k’ap rele l’ nan verite.R.

LEVANJIL

“Men pitit Izrayèl tout bon vre, nan li pa gen manti”.

MEN BÒN NOUVÈL JEZIKRI A DAPRÈ JAN KI SEN 1, 45-51

Lè sa a:

Filip jwenn Natanayèl, li di l’: “Sa a Moyiz te ekri sou li nan lalwa a ak pwofèt yo, nou jwenn li, se Jezi, pitit Jozèf, moun Nazarèt la.

Natanayèl di l’: “Nazarèt! Èske yon bagay ki bon kapab sòti la?”

Filip di l’: “Vini w’a wè”.

Jezi wè Natanayèl k’ap vin kote l’, li di sou li: “Men yon pitit Izrayèl tout bon vre, nan li pa gen manti”.

Natanayèl di l’: “Kote ou konnen m’?”

Jezi reponn, li di l’: “Anvan Filip te rele ou, lè ou te anba pye figye a, mwen te wè ou”.

Natanayèl reponn li, li di: “Rabi, ou se Pitit Bondye, ou se wa Izrayèl”.

Jezi reponn, li di l’: “Paske mwen di ou “Mwen te wè ou anba pye figye a”, ou kwè: w’ap wè pi gran bagay pase sa”.

Epi li di l’: “Amèn, amèn mwen di nou: n’ap wè syèl la louvri, epi zanj Bondye yo k’ap monte-desann anlè Pitit moun nan”.

An nou fè lwanj ak konpliman pou pawòl Bondye a.

REFLEKSYON: Nan tèks nou li nan liv Apokalips Sen Jan an, nou wè vizyon Jan ki montre nou imaj Jerizalèm ki bèl, ki klere anpil. Imaj sa pèmèt nou konprannn tankou kretyen ke nou pa dwe janm dekouraje, ke nou dwe toujou kenbe fèm pou nou pa janm lage pawòl Bondye a, paske nou gen pou n’al viv nan bèlte Granmèt la ki gen tout pouvwa, pou tout tan nan kè kontan.

Yon lòt bò, imaj douz la trè enpòtan nan Bib la, paske si n’ap swiv byen, te gen douz disip ki te pwòch Jezi anpil, Izrayèl te gen douz tribi, etc… Liv Apokalips la tou pèmèt nou wè e konprann tou, kòman Bondye gran, kòman pouvwa li san limit e tout bèl pwojè li genyen pou nou kòm pitit li.

Aprè sa nou fin wè nan liv Apokalips la, Levanjil sen Jan fè nou konprann ke nou dwe kwè san nou pa wè. Paske istwa Filip ak Natanayèl la, se yon istwa ki trè klè. Nou wè kot Filip wè nan Jezi pitit Jozèf la, sa ki ekri nan lwa Moyiz la e kote Natanayèl pa ka kwè ke Nazarèt ka gen yon bagay ki bon ki sòti ladan l’.

Lè Natanayèl rive kot Jezi, li wè nonm sa konn tout sa k’ap pase, lè sa li kwè. Li enpòtan pou nou menm jodi a kòm kretyen met lafwa nou nan Bondye san nou pa wè; fòk nou pa tann se yon mirak, se yon bagay sinatirèl ki pou fè nou kwè. Paske nan Bib la Jezi fè nou konnen si nou gen lafwa, nou kapab fè anpil bagay, nou menm kapab deplase montay yo. Se poutèt sa, kòm kretyen nou dwe fè Bondye konfyans. Li konnen tout sa nou kapab fè e tout sa k’ap pase nan lavi nou.

LAPRIYÈ: Bondye Papa, fè m’ sansib ak apèl ou pou m’ ka resevwa li nan yon kè ki laj. Pa pouvwa Jezikri. Amèn

PWOPOZISYON: Mwen pran angajman pou m’ sispann viv nan manti.